Կամավոր ատեստավորված ուսուցիչները կստանան բարձր աշխատավարձ. նոր որոշում Հայաստանում
Ատեստավորված ուսուցիչների դրույքաչափի փոփոխություն
Հայաստանի կառավարության որոշմամբ՝ կամավոր ատեստավորված ուսուցիչների դրույքաչափը կլինի 200.000 դրամ՝ նախկին 108.000-125.000 դրամի փոխարեն: Գործադիրը նման որոշում էր կայացրել դեռևս ապրիլի վերջին:
Որոշումից երկու շաբաթ անց ՀՀ կրթության, գիտության, մշակույթի և սպորտի փոխնախարարը հայտնել է, որ 478 ուսուցիչներ մայիսից կստանան ավելի բարձր աշխատավարձ՝ ընդգծելով, որ ամենաբարձր վարձատրությունն այս պահին կազմում է շուրջ 533 հազար դրամ՝ առանց տարակարգի հաշվի առնման: Տարակարգի գումարն ավելացնելուց հետո ատեստավորված ուսուցիչների աշխատավարձերն ավելի կբարձրանան։
Կառավարության որոշման մանրամասները:
Հայաստանում առաջին անգամ ուսուցիչների կամավոր ատեստավորում է իրականացվել նախորդ տարի՝ 2021 թ.-ին: Ատեստավորման փորձնական փուլին մասնակցելու հնարավորություն է տրվել 7-12-րդ դասարաններում դասավանդող ուսուցիչներին՝ միայն յոթ առարկաների գծով: Այս տարվա ատեստավորումը նախատեսվում է սեպտեմբեր ամսին: Իրենց մասնագիտական գիտելիքները ստուգելու հնարավորություն են ունենալու 5-12-րդ դասարաններում դասավանդողները՝ բոլոր առարկաների գծով:
2021 թ.-ի ատեստավորմանը մասնակցած ուսուցիչների աշխատավարձն արդեն իսկ բարձրացել է 30-50%-ով՝ կախված ատեստավորման արդյունքներից: Նոր որոշման նախագծի հիմնավորման համաձայն՝ «միայն հավելավճարի տրամադրումը վարձատրության էական բարելավում չի ապահովում»։
Իսկ արդեն դրույքաչափի փոփոխությունից հետո նվազագույն՝ 30%-ով բարձրացված աշխատավարձը կկազմի 260 հազար դրամ:
2022 թ.-ի մայիսից կիրառվող դրույքաչափի փոփոխությունը տարածվում է նաև 2021 թ.-ին ատեստավորված ուսուցիչների վրա:
Հայաստանի վարչապետը կամավոր ատեստավորման անցկացումը համարում է սկզբունքային նշանակության բարեփոխում: Ասում է՝ ստեղծվել է հնարավորություն, որ «ուսուցիչն ինքը որոշի՝ որքան է իր աշխատավարձը»:
Ատեստավորման գործընթացի արդյունքում, ըստ Փաշինյանի, բարձրանում է ոչ միայն մանկավարժների վարձատրության չափը, այլև ուսուցչի աշխատանքի գրավչությունը:
Ըստ նախագծի հիմնավորման՝ կամավոր ատեստավորման համակարգի փորձնական ծրագիրը
- շարունակաբար կխրախուսի ուսուցիչների մասնագիտական զարգացումը,
- հավելավճարի տրամադրման միջոցով կնպաստի դասավանդման որակի և արդյունավետության բարձրացմանը,
- կխթանի արական սեռի մանկավարժների մուտքը հանրակրթական ուսումնական հաստատություններ։
Կրթության, գիտության, մշակույթի և սպորտի նախարար Վահրամ Դումանյանի հավաստիացմամբ՝ որակյալ ուսուցչական կազմ ունենալու նպատակով ատեստավորման գործընթացից բացի գերատեսչությունն իրականացնում է նաև վերապատրաստումներ: 2021 թ.-ին ուսուցիչները վերապատրաստվել են ԿԳՄՍՆ կողմից երաշխավորված տարբեր կազմակերպություններում։
Վարչապետ Փաշինյանի խոսքով՝ տարբեր ոլորտներում հանդիպող բացերը կապված են կրթության ոլորտի համակարգային խնդիրների հետ, ուստի դրանց լուծումն առաջնահերթություն է գործադիրի համար:
2021 թ. -ին կամավոր ատեստավորմանը դիմած 1372 դասավանդողից գործընթացին մասնակցել է 996 ուսուցիչ: Անցողիկ շեմը հաղթահարել է 468 ուսուցիչ, այսինքն՝ 47,2%-ը, չի կարողացել հաղթահարել կեսից ավելին՝ 528 մանկավարժ։
Ատեստավորման արդյունքի հիման վրա ուսուցչի վարձատրության բարձրացման համակարգի ներդրման արդյունքում 50% հավելավճար է ստացել 166, 40% հավելավճար՝ 153, 30% հավելավճար՝ 159 ուսուցիչ:
Փաշինյանն ընդգծել է, որ նախորդ տարի ատեստավորմանը մասնակցած ուսուցիչները ունեն հնարավորություն նորից մասնակցելու, ստանալու ավելի բարձր միավոր, ըստ այդմ՝ նաև ավելի բարձր աշխատավարձ:
«Մենք բոլոր ուսուցիչներին մի քանի անգամ այս հնարավորությունը տալու ենք, բայց իքս պահից սկսած ատեստավորում չանցած ուսուցիչը դպրոցում ուղղակի չի աշխատելու, ուզում եմ այս ուղերձը շատ հստակ բոլորը արձանագրեն»,- ասել է վարչապետը:
Ուսուցիչների աշխատավարձի բարձրացման վրա ազդում է ինչպես ատեստավորումը, այնպես էլ տարակարգի հավելավճարի չափը:
Սա հաշվի առնելով էլ դեռևս ապրիլի 28-ին Վահրամ Դումանյանը հայտարարել էր, որ «տեսականորեն ուսուցիչը մինչև 400.000 դրամ աշխատավարձ կարող է ստանալ»: Որոշման ընդունումից երկու շաբաթ անց ԿԳՄՍ նախարարի տեղակալ Ժաննա Անդրեասյանը հայտնել է 478 ուսուցիչների վարձատրության նոր չափերը՝ առանց տարակարգի հավելավճարի.
«Ունենք երկու տասնյակից ավել ուսուցիչներ, որ մայիսից հաշվված արդեն կստանան շուրջ 400 հազար և ավել վարձատրություն՝ կախված իրենց դասավանդվող ժամերից։ Ունենք ուսուցիչներ, որոնց վարձատրությունը կհասնի 450 հազարի, ամենաբարձր վարձատրությունն այս պահին առանց տարակարգի հաշվի առնման կկազմի շուրջ 533 հազար դրամ»:
Տարակարգ ունեցող ուսուցիչների դեպքում գումարվելու է նաև դրա հավելավճարի չափը։
Փոխնախարարի տեղեկացմամբ՝ առաջիկայում կներկայացնեն ամբողջական և ամփոփ տեղեկատվություն:
Ատեստավորված ուսուցիչների դրույքաչափի փոփոխություն
