Երբ քաղաքապետարանն անզոր է․ Երևանի կենտրոնում «օրինական» ծառահատումներ են կատարվում

Արդեն մի քանի օր է, ինչ Երևանում ակտիվիստները բողոքում են մայրաքաղաքի կենտրոնում՝ Մաշտոցի պողոտայում, գտնվող այգում կատարվող շինարարական աշխատանքների դեմ։ Սոցցանցերում քննարկում են, թե ինչպես կարող են երկրի նոր, «հետհեղափոխական» իշխանությունը թույլ տալ հերթական բիզնեսի բացման համար ծառ կտրել։ Մարդիկ տարակուսանքի մեջ են․ մի՞թե շարունակվում են նախորդ իշխանության ավանդույթները։

Բանը հասել է նրան, որ Երևանի քաղաքապետն իրավիճակի պարզաբանման համար ստիպված ասուլիս է հրավիրել։ Հայկ Մարությանը պնդում է, որ դեռևս նախորդ քաղաքապետի պաշտոնավարման ժամանակ այգու մի մասը մինչև 2040 թ–ը վարձակալության է հանձնվել, մի մասն էլ՝ սեփականության իրավունքով է նրան տրվել։ Այնպես որ, այժմ ոչ ոք իրավունք չունի վարձակալին և տարածքի տիրոջն արգելել որևէ գործունեություն իրականացնել տարածքում։

Բոլոր մանրամասները․ այս իրավիճակում ի՞նչ քայլերի է դիմում ներկայիս քաղաքապետը և ինչո՞ւ է հեռանում պաշտոնից մայրաքաղաքի գլխավոր ճարտարապետը։

● Երևանում պատերազմ է հայտարարվել ապօրինի շինարարությանն ու տարածքների զավթմանը

● Երևանում տրանսպորտային բարեփոխման մասին․ փոփոխությունները շուտ չեն լինելու

Բիզնեսի համար գրավիչ տարածք

Միսաք Մանուշյանի անվան պուրակն առավել հայտնի է Երևանում որպես Մաշտոցի այգի։ Այդ «կանաչ կղզյակի» շուրջ կրքերն առաջին անգամ չեն բորբոքվում։ Դեռևս 2012 թ–ին ակտիվիստները ստիպված էին լուրջ արշավ իրականացնել այգին փրկելու համար։ Բողոքի ցույցերի մասնակիցները 40 օր նախորդ իշխանություններից պահանջում էին ապամոնտաժել այգում տեղադրված կրպակները։

Այն ժամանակ ակտիվիստների շարքերում էին ընդդիմադիրներից շատերը, որոնք այժմ բարձր պաշտոններ են զբաղեցնում գործող կառավարությունում։ Նրանց թվում էր նաև ներկայիս քաղաքապետ Հայկ Մարությանը։

Այդ այգում ծառահատումների պատմությունը կրկնվեց նաև 2016 թ–ին։ Այն ժամանակ ի պատասխան JAMnews–ի գրավոր հարցմանը քաղաքապետարանը պարզաբանեց, որ «պուրակի վերակառուցում և բարեկարգում է իրականացնում»։ Ավելին՝ խոստացավ, որ «ընդլայնվելու են կանաչ տարածքներն ու նոր ծառեր են տնկվելու»։

Այժմ հասարակության վրդովմունքի առիթ են կրկին տվել ակտիվիստների արած և սոցցանցերում տեղադրված լուսանկարները, որոնցում երևում է, որ այդ նույն այգում ծառեր են հատվել։

Մամուլի ասուլիսի ժամանակ Երևանի քաղաքապետը պարզաբանել է, որ նախորդ քաղաքապետ Տարոն Մարգարյանն այգու մի մասը վարձակալության է հանձնել մի գործարարի մինչև 2040 թ–ի դեկտեմբերը։

«Ես անձամբ եմ չեղարկել [նախկին] քաղաքապետի որոշման մի մասը՝ վարձակալության մակերեսը 1048 քառ․ մետրից նվազեցնելով մինչև 294 քառ․ մետր։ Ավելին, մենք չեղարկել ենք 386 քառ․ մետր տարածքի սեփականության իրավունքի մասին որոշումը։ Սակայն վարձակալության տրված հատվածում վարձակալն իրավունք ունի շինարարությամբ զբաղվելու։ Օրենքն այդ դեպքում վարձակալի կողմն է», — հաղորդել է Հայկ Մարությանը։

Նրա խոսքով՝ ինքն անձամբ է բանակցություններ վարել տարածքի տիրոջ հետ և պայման դրել․ նոր սրճարանն այգում պետք է կառուցվի թեթև կոնստրուկցիաներով՝ ծառերին և թփերին մեծ վնաս չհասցնելու համար։ Իսկ այն ծառերի փոխարեն, որոնք պետք է այնուամենայնիվ հատվեն, պետք է կրկին ծառեր տնկվեն։

Քաղաքապետարանի իրականացրած ծառահատումների մասին

Երևանի քաղաքապետը հայտնել է, որ անցյալ տարվա սկզբից հատուկ խումբ է ձևավորվել, որը զբաղվում է Երևանի ոչ կենսունակ ծառերի գույքագրմամբ․

«Այն ժամանակ մենք գույքագրել ենք 437 ծառ, այժմ՝ ավելի քան 500։ Այդ ծառերը պոտենցիալ վտանգ են ներկայացնում, անգամ՝ մահացու ելքով։ Վերջերս ավտոմեքենայի վրա ծառ էր ընկել, և վարորդը հրաշքով էր փրկվել։ Այդ ծառերը մենք արդեն սկսել ենք հատել»։

Նա հայտարարել է նաև, որ Երևանն ավելի կանաչ պետք է լինի, քան այսօր կա։ Եվ դրա համար աշխատանքներ են տարվում, մայրաքաղաքում ծառեր պետք է տնկվեն, որոնք լավ կհարմարվեն դրա կլիմայական պայմաններին և երկար կապրեն։ Քաղաքապետարանի մասնագետներն ուսումնասիրում են Գերմանիայի փորձը, թե ինչպես կարճ ժամանակում հին ծառերը փոխարինել նորերով։

Գլխավոր ճարտարապետը հրաժարական է տալու

Ասուլիսի ժամանակ քաղաքապետը հաստատել է այն լուրերը, որ քաղաքի գլխավոր ճարտարապետ Արթուր Մեսչյանը լքելու է իր պաշտոնը․

«Պարոն Մեսչյանը, որին մենք բոլորս անչափ հարգում ենք, դեռևս իր առաջին ասուլիսներին է հայտարարել, որ մեզ հետ աշխատելու է երկու տարի։ Այդ երկու տարին արդեն մոտենում է իր ավարտին, և բնական է, որ այդ մարդը սկզբում ինչպես ասել էր, մնում է իր խոստման շրջանակներում։ Այնպես որ, պարոն Մեսչյանը հեռանալու է սեփական դիմումի համաձայն, ինչպես խստացել է, և իր անձնական գործերով է զբաղվելու»։

Ընդ որում, Հայկ Մաությանը չի հստակեցրել, թե արդյոք գլխավոր ճարտարապետի հրաժարականի համար այլ հիմքեր կան։

Արթուր Մեսչյանը Երևանի գլխավոր ճարտարապետ է նշանակվել 2018 թ–ի հոկտեմբերին։

Նախքան այդ նշանակումը Մեսչյանը Հայաստանում ավելի շատ հայտնի էր որպես երաժիշտ, ոչ թե ճարտարապետ։ Կոմպոզիտորն ու սիրված երգերի հեղինակը հայտնի է նաև որպես մեծ հայրենասեր և ակտիվ քաղաքացիական դիրքորոշմամբ մարդ։ Այդ պատճառով էլ նրա նշանակման հետ երևանցիներից շատերը լուրջ հույսեր էին կապում։