Խուզարկություններ Վրաստանում: Ծեծի է ենթարկվել ընդդիմության առաջնորդներից Նիկա Գվարամիան
Խուզարկություններ վրացի ընդդիմադիրների տանն ու գրասենյակներում
Թբիլիսիում և այլ քաղաքներում բազմահազարանոց բողոքի ցույցերի ֆոնին, որտեղ քաղաքացիները պահանջում են երկիրը վերադարձնել եվրաինտեգրման ուղի, այսօր՝ դեկտեմբերի 4-ին Վրաստանի ոստիկանությունը խուզարկություններ է իրականացնում ընդդիմադիր գործիչների և ակտիվիստների գրասենյակներում ու բնակարաններում:
Նախօրեին վարչապետ Իրակլի Կոբախիձեն կրկին ընդդիմության առաջնորդներին «լիբերալ ֆաշիստներ» էր անվանել և նախազգուշացրել, որ նրանց պատասխանատվության կկանչեն, իբր, բողոքի ցույցեր կազմակերպելու համար։ «Ընդդիմության ռադիկալ առաջնորդները և «հարուստ ՀԿ-ները» թաքնվում են իրենց գրասենյակներում, բայց նրանք պատասխանատվություն են կրում վերջին օրերին Ռուսթավելու պողոտայում տեղի ունեցած բռնությունների և անկարգությունների համար»,- ասել էր նա։
Խուզարկություններ են անցկացվել «Ազգային շարժում» կուսակցության երիտասարդական թևի, «Հանուն փոփոխությունների» կոալիցիայի և դրա մեջ մտնող կուսակցությունների գրասենյակներում, ինչպես նաև ակտիվիստ Իլո Գլոնտիի տանը, ով ֆեյսբուքյան Daitove խմբի ադմինիստրատորն է: Խումբն ավելի քան 200 000 մասնակից ունի, աջակցում է բողոքի ցույցերին։ Գլոնտին հայտնել է, որ իրենից վերցրել են նոութբուքն ու հեռախոսը։
Daitove խումբը հիմնադրվել է 2024 թվականի սկզբին՝ «օտարերկրյա գործակալների» մասին օրենքի դեմ բողոքի ցույցերի ժամանակ, մասնակիցները տրանսպորտ և կացարան էին տրամադրում երկրի տարբեր հատվածներից Թբիլիսի ժամանող ցուցարարներին։
Հաղորդվում է, որ Գլոնտիին մեղադրում են բռնության հրահրման և անկարգությունների կազմակերպման մեջ։
Հայտնի է դարձել, որ խուզարկություններ են անցկացվում նաև Նենսի Վոլանդի տանը, ով նույնպես Daitove խմբի ադմինիստրատորներից է։
Դաժան ծեծի է ենթարկվել և ձերբակալվել ընդդիմադիր «Ախալի» կուսակցության առաջնորդ Նիկա Գվարամիան
Դա տեղի է ունեցել «Դրոա» կուսակցության գրասենյակի մոտ, որտեղ խուզարկություն էր տեղի ունենում։ Այս պահին հայտնի չէ, թե ուր են տարել Գվարամիային։ Ձերբակալվել է նաև կուսակցության անդամ Գելա Խասաիան։
Nika Gvaramia, leader of the opposition party 'Ahali' pic.twitter.com/OeHu3W3036
— JAMnews (@JAMnewsCaucasus) December 4, 2024
Ձերբակալությանը նախորդել է Գվարամիայի առճակատումը ոստիկանության հետ։ Քաղաքական գործիչը խնդրել է իրեն՝ որպես ընդդիմության ներկայացուցիչ, թույլատրել մտնել գրասենյակ և հետևել խուզարկության ընթացքին: Ոստիկանության աշխատակիցները թույլ չեն տվել։
Իրավապահները նրան հայտնել են, որ քննչական գործողություններն արդեն սկսվել են, տեղում ներկա է ներկայացուցիչը, և «միջամտության դեպքում նրանք կգործեն օրենքին համապատասխան»։
Դրանից որոշ ժամանակ առաջ ոստիկանությունը խուզարկություն էր սկսել «Ախալի» կուսակցության գրասենյակում, և Նիկա Գվարամիան ուղիղ եթերում հեռարձակել էր նրանց գործողությունները։ Այդ ժամանակ նա հարցազրույց էր տվել «Մտավարի» հեռուստաալիքին՝ նշելով, որ չգիտի, թե ինչ հիմքով են ՆԳՆ աշխատակիցները մտել կուսակցության գրասենյակ։
«Սա ավտորիտարիզմ է, այն արդեն վերածվում է բռնապետության։ Քաղաքական կուսակցությունների խուզարկությունները, առգրավումները, քաղաքական առաջնորդների ձերբակալությունները նորմալ երևույթ են բռնապետությունների համար։ Եթե ինչ-որ մեկը դեռ պատրաստ չէ դրան, ապա ես կրկին կասեմ՝ Վրաստանի հասարակությունն իրականում սկսել է ազատագրական շարժում»,— ասել է Գվարամիան։
Դեկտեմբերի 3-ին ոստիկանությունը խուզարկել էր ակտիվիստ Դոդի Խորխելիի տունը։ Նրան ձերբակալել էին հենց մանկապարտեզի մոտ, ուր նա բերել էր իր երեքամյա որդուն։
Իշխող «Վրացական երազանք» կուսակցությունից վարչապետ Իրակլի Կոբախիձեն հայտարարել է, որ ընդդիմադիրները պատասխանատվության կենթարկվեն իրենց գործողությունների համար։
Ընդդիմությունը և քաղաքացիական հասարակության խմբերը պնդում են, որ իշխող կուսակցությունն իրականացնում է այլախոհությունը ճնշելու իր նախընտրական խոստումը, քանի որ կառավարության քաղաքականության դեմ բողոքները շարունակում են ուժեղանալ։
Հետևեք մեզ — Facebook | Youtube | Telegram
Խուզարկություններ վրացի ընդդիմադիրների տանն ու գրասենյակներում
