ԱԹՍ–ների ցուցահանդես․ Երևանում ցուցադրել են Ադրբեջանի Զինված ուժերի խոցված դրոնները
Երևանում լրագրողներին ցուցադրել են ադրբեջանական անօդաչու թռչող սարքերը, որոնք հայկական կողմը խոցել է հայ–ադրբեջանական սահմանին տեղի ունեցած վերջին մարտական գործողությունների ժամանակ։ Ակտիվ մարտական գործողությունների չորս օրում հայ զինծառայողները 14 դրոն են խոցել՝ 10 հարվածային, մեկ ռազմավարական և երեք հետախուզական։
Երկու երկրների սահմանին սրացումը սկսվել է հուլիսի 12–ին՝ հրետանու և ԱԹՍ–ների կիրառմամբ։ Այս սրացումն ամենալուրջն են համարում 1990–ականներից ի վեր, երբ սկսվել է ղարաբաղյան պատերազմը։ Հուլիսի 12–16–ը մահացել է ոչ պակաս, քան 17 մարդ։ Ադրբեջանական կողմից հաղորդվում է 13, հայկական կողմից չորս մարդու մահվան մասին։ Հուլիսի 17–ին հարաբերական անդորր է սահմանվել, որը դեռևս պահպանվում է։
Հուլիսի 21–ին Հայաստանի պաշտպանության նախարարի մամուլի քարտուղար Շուշան Ստեփանյանը հաստատել է, որ սահմանին քիչ թե շատ հանգիստ իրավիճակ է պահպանվում՝ հավելելով․
«Ադրբեջանական ԶՈՒ-ը դիպուկահար հրացաններից կրակ են վարել՝ փորձելով թիրախավորել մեր զինծառայողներին։
Ադրբեջանի ԶՈՒ-ը հետևանքների մասին նախազգուշացվել են համապատասխան կապի միջոցներով»։
Իրավիճիակի մասին բոլոր մանրամասները՝ Հայաստանից։
● Տեսանյութ․ ի՞նչ է տեղի ունեցել Ադրբեջանի և Հայաստանի սահմանին, և որո՞նք են հետևանքները
● Կարծիք․ ո՞վ է սրացում հրահրել Հայաստանի և Ադրբեջանի սահմանին։ Արդյո՞ք դա կարող էր Ռուսաստանը լինել
ԱԹՍ–ների ցուցահանդես
Ցուցահանդեսին ներկայացված էին ոչ միայն ոչնչացված հետախուզական և հարվածային ԱԹՍ–ների բեկորներ, այլև ամբողջական ԱԹՍ–ներ։
Հայ–ադրբեջանական սահմանին վերջերս տեղի ունեցած բախումների ժամանակ, ըստ Հայաստանի պաշտպանության նախարարության հաղորդագրությունների, խոցվել կամ գրավվել են իսրայելական արտադրության Orbiter 3, Orbiter 2, SkyStriker, Harop դրոններ։
Հայ զինվորականները հայտարարում են, որ Հայաստանի սահմանին տեղի ունեցած վերջին մարտերը ցույց են տվել, որ իսրայելական դրոնները անպարտելի չեն։
«Առանձին ուշադրության են արժանի հայկական արտադրության ԱԹՍ–ները, որոնք ցույց տվեցին, որ ոչնչով չեն զիջում իսրայելական մրցակիցներին։ Այս մասին են վկայում վերջին մարտերի ժամանակ ադրբեջանական բանակին հասցված վնասի մասշտաբները», — նշել է գեներալ–մայոր Դանիել Բալայանը։
Ըստ հայ փորձագետների հաշվարկի՝ ԱԹՍ–ների գնից ելնելով՝ ադրբեջանական կողմը 150-200 մլն դոլարի վնաս է կրել։
Հակաօդային պաշտպանության զորքերի շտաբի պետ գնդապետ Գարիկ Մովսեսյանը ևս մեկ անգամ ընդգծել է, որ ադրբեջանական կողմը չի խոցել հայկական ոչ մի ԱԹՍ։
Նրա խոսքով՝ 2016 թ–ին Ղարաբաղում հայկական և ադրբեջանական ուժերի շփման գծում տեղի ունեցած ապրիլյան սրացումից հետո հայկական կողմը հարկ եղած եզրակացություններն արել է։ Մասնավորապես, հակառակորդի ԱԹՍ–ների չեզոքացման համար հակաօդային պաշտպանության հատուկ հաշվարկների նախապատրաստում է իրականացրել։
Չցուցադրված մոդելների մասին
Չեն ցուցադրվել Hermes 900 ռազմավարական հետախուզական դրոնի բեկորները, որի չեզոքացման մասին հայկական կողմը հաղորդել է հուլիսի 14–ին տեղի ունեցած ռազմական գործողությունների ժամանակ։
Այդ մոդելի բացակայությունը գեներալ–մայոր Դանիել Բադալյանը նրանով է բացատրել, որ ԱԹՍ–ն խոցվել է մեծ բարձրության վրա, ինչը դժվարացնում է բեկորների հավաքագրումը։
Ներկայացված չէր նաև հարվածային SkyStriker–ը։ Ինչպես բացատրել են զինվորականները, դրա լիցքը չի պայթել և վնասազերծման կարիք ունի։
Վիրավորների վիճակը
Ըստ Հայաստանի պաշտպանության մամուլի քարտուղար Շուշան Ստեփանյանի՝ հայ–ադրբեջանական սահմանին տեղի ունեցած ռազմական գործողությունների հետևանքով վիրավորված զինծառայողներից մեկի վիճակը շարունակում է ծայրահեղ ծանր մնալ։ Մնացածների մոտ դրական դինամիկա է նկատվում։
Ընդհանուր առմամբ, վիրավորվել է 36 մարդ։
«Նրանցից 20-ն է բուժօգնություն ստացել, մյուս 16-ը միանգամից վերադարձել են ծառայության, քանի որ շատ թեթև էին, քերծվածքատիպ վնասվածքներ էին ստացել: 20-ից 10-ն է հիմա բուժում ստանում»։
Հայաստանը բացառում է Թուրքիայի մասնակցությունը կարգավորմանը
Հայաստանի ԱԳՆ ղեկավար Զոհրաբ Մնացականյանը հարցազրույց է տվել France24 հեռուստատեսությանը, որում հայտնել է, որ Ադրբեջանի հետ հակամարտության կարգավորման գործընթացում «Թուրքիան ոչ մի դերակատարում չունի»․
«Խաղաղ կարգավորումը վերաբերում է Հայաստանին, Արցախին և Ադրբեջանին, և Արցախի հետ միասին մենք շատ կառուցողական ձևով կշարունակենք սերտ համագործակցել Ադրբեջանի հետ լուծում գտնելու ուղղությամբ: Մենք պետք է աշխատենք հրադադարի կայուն ամրապնդման ուղղությամբ, մենք պետք է Ադրբեջանից լսենք ուժի սպառնալիքի կամ ուժի կիրառման մերժում»։
ԱԳՆ ղեկավարը ևս մեկ անգամ մեկնաբանել է Հայկական ատոմակայանին հարվածելու Բաքվի սպառնալիքները․
«Սա ավելի լայն տարածաշրջանին ուղղված սպառնալիքի, անպատասխանատվության ցայտուն դրսևորում է, փաստացի սպառնալիք նաև սեփական ժողովրդի հանդեպ: Սա շատ մտահոգիչ է և ի ցույց է դնում բանականության ճգնաժամը: Կարծում եմ, որ շատ կարևոր է, որ Բաքվում գան ողջամտության դաշտ»։
Այն հարցին, թե արդյո՞ք Հայաստանի և Ադրբեջանի առաջնորդների հանդիպումը կարող է վճռորոշ դեր խաղալ երկրների միջև լարվածության թույլացման հարցում, Զոհրաբ Մնացականյանը պատասխանել է․
«Ղեկավարների միջև հանդիպումները գործընթացի մաս է․․․ Սակայն այս հանդիպումները պետք է զգուշորեն նախապատրաստվեն․․․ Արտգործնախարարներն են նախապատրաստում իրենց առաջնորդների աշխատանքը․․․ Ղեկավարների հանդիպումը տեղի կունենա միայն այն ժամանակ, երբ մենք լավ հիմքեր կնախապատրաստենք նմանօրինակ հանդիպման համար, որպեսզի բանակցություններում առաջընթաց գրանցվի»։
