Հարավային Օսիայի ընտրություններում հաղթած ուժը հրաժարվում է խորհրդարան ներկայանալ
Խորհրդարանական ընտրություններ Հարավային Օսիայում
Հարավային Օսիայում տեղի է ունեցել նորընտիր խորհրդարանի առաջին նիստը։ Ընդդիմադիր «Միասնական Օսիա» կուսակցության ներկայացուցիչները չեն ներկայացել նիստին և հայտարարել են, որ «ոտք չեն դնելու խորհրդարան», քանի դեռ չեն վերանայվել հունիսի 9-ին կայացած ընտրությունների արդյունքները։
Դժգոհ հաղթողը
«Միասնական Օսիան» հաղթել է ընտրություններում, սակայն դժգոհ է մնացել պաշտոնական արդյունքներից։
«Իշխող «Նիխաս» կուսակցության օգտին են քվեարկել նորաթուխ «ընտրողներ», որոնց բերել էին Հյուսիսային Օսիայից և Վրաստանից։ Օրինակ՝ Լենինգորսկի շրջանում ապրում է 500 մարդ, իսկ «Նիխասի» թեկնածուի օգտին ինչ-որ ձևով քվեարկել է 700-ը: Վլադիկավկազի ընտրատեղամասում նույնպես եղել են «կարուսելներ» և կեղծիքներ։ Մենք դիմումներ ենք ներկայացրել Ներքին գործերի նախարարություն և Գլխավոր դատախազություն, բայց արձագանք չկա»,- ասում է «Միասնական Օսիայի» Կենտրոնական կոմիտեի նախագահ Ալան Տադտաևը։
Նրա խոսքով՝ քանի դեռ դատարանը չի քննել իրենց հայցը, «Միասնական Օսիան» խորհրդարան չի ներկայանա:
- Օգոստոս, 2008. Հարավային Օսիայի շուրջ պատերազմի ժամանակագրությունը փաստերով և լուսանկարներով
- Մեդվեդևը խոսել է Աբխազիան և Հարավային Օսիան ՌԴ կազմում ներառելու հնարավորության մասին
Մինչդեռ խորհրդարանն առանց «Միասնական Օսիայի», բայց նախագահ Ալան Գագլոևի մասնակցությամբ նիստ է անցկացրել, նշանակել նոր խոսնակ և տեղակալներ։
Խոսնակը իշխանական «Նիխաս» կուսակցության դրածոն է՝ նախագահի աշխատակազմի ղեկավար և գյուղատնտեսության նախկին նախարար Ալան Մարգիևը։
Առաջին փոխխոսնակը «Նիխաս» կուսակցության ղեկավար Զիտա Բեսաևան է։
Իսկ մյուս երկու փոխխոսնակի աթոռները զբաղեցրել են իշխանամետ Ժողովրդական և Կոմունիստական կուսակցությունների ներկայացուցիչները։
Այս երեք կուսակցություններն էլ ընտրություններում պարտվել են «Միասնական Օսիային»: «Նիխասը» հավաքել է ձայների 30 տոկոսից մի փոքր ավելի, Ժողովրդական կուսակցությունը՝ 16 տոկոսից մի փոքր ավելի, իսկ Կոմունիստական կուսակցությունը չի հավաքել նույնիսկ անհրաժեշտ յոթ տոկոսը, սակայն միևնույն է նրան տրվել է երկու մանդատ։
Վնասված քվեաթերթիկներ
Ստեղծված իրավիճակը պառակտում է առաջացրել Կենտրոնական ընտրական հանձնաժողովի (ԿԸՀ) ներսում։
ԿԸՀ նախագահ Էմիլիա Գագիևան չի ստորագրել ամփոփիչ արձանագրությունը և հրաժարվել է ճանաչել խորհրդարանական ընտրությունների պաշտոնապես հայտարարված արդյունքները։ Կենտրոնական ընտրական հանձնաժողովի որոշ այլ անդամներ նույնպես համանման դիրքորոշում ունեն։ Ինչպես «Միասնական Օսիան», նրանք էլ կարծում են, որ ընտրողների ձայները հաշվարկելիս պետք էր հաշվել բոլոր քվեաթերթիկները, այդ թվում՝ վնասվածները։
Խոսքը Վլադիկավկազի (Հյուսիսային Օսիա) ընտրատեղամասի մասին է, որտեղ «Միասնական Օսիայի» տեղեկությունների համաձայն՝ 733 քվեաթերթիկ վնասվել է և չի հաշվարկվել, ինչպես նաև Ցխինվալիի չորս ընտրատեղամասերի մասին, որտեղ ընտրողներ չեն ներկայացել և ընտրություններ, ըստ էության, այդ տեղամասերում չեն կայացել:
Սակայն ԿԸՀ քարտուղար Քրիստինա Ավլոխովան և հանձնաժողովի մի շարք այլ անդամներ հաշվել են միայն վավեր ճանաչված քվեաթերթիկները, ինչի արդյունքում «Միասնական Օսիան» և «Նիխասը» կորցրել են մեկական մանդատ՝ յոթ մանդատի փոխարեն ստացել են վեցը։
Քաղաքական-մաթեմատիկական խնդիր
Շատ մարդիկ, այդ թվում՝ այնպիսիք, ովքեր որևէ կապ չունեն քաղաքականության հետ, բայց լավ հաշվել գիտեն, ուշադրություն են հրավիրել թույլ տրված սխալների և ընտրությունների արդյունքներում առկա անհամապատասխանությունների վրա։ Օրինակ՝ ֆիզիկամաթեմատիկական գիտությունների թեկնածու Սոսլան Տաբուևը վերստուգել է պաշտոնական տվյալները.
«Ըստ ԿԸՀ տվյալների՝ քվեարկության համար տեղամասերին տրվել է 20033 քվեաթերթիկ, իսկ քվեատուփերում հայտնաբերվել է 22983 քվեաթերթիկ։ Հարց՝ որտեղի՞ց են քվեատուփերում հայտնվել 2950 ավել քվեաթերթիկներ»:
Չնայած սրան՝ ոչ դատարանը, ոչ էլ խորհրդարանը դեռևս որևէ կերպ չեն արձագանքել «Միասնական Օսիա» կուսակցության վերջնագրին: Կուսակցության ներկայացուցիչ Ալան Տադտաևը վստահ է, որ իշխանություններին չի հաջողվի «իրենց դուրս մղել քաղաքական ասպարեզից».
«Նրանց դա չի հաջողվի: Քաղաքական դաշտը միայն խորհրդարանի պատերը չեն: Մենք քաջ գիտակցում ենք, որ Հարավային Օսիայի ժողովուրդը, մշտապես այստեղ բնակվող քաղաքացիները քվեարկել են մեր օգտին»։
Փորձագետների գնահատմամբ՝ Հարավային Օսիայում ընտրությունների արդյունքների շուրջ ծավալվող վեճերը սպառնում են վերաճել քաղաքական ճգնաժամի։
