ՀՀ-ում խաղադրույքների ծավալը վերջին տարիներին աճել է 17 անգամ․ մանրամասներ
Խաղադրույքների ծավալի աճ ՀՀ-ում
Հայաստանում նախորդ տարի կատարվել է 7 տրլն 236 մլրդ 490 մլն դրամի, կամ 18 մլրդ 248 մլն դոլարի խաղադրույք, մեծամասամբ՝ ինտերնետ շահումով խաղերում։ Պետական եկամուտների կոմիտեի ներկայացրած տվյալներից պարզ է դառնում, որ խաղադրույքների ընդհանուր ծավալը 2018 թ․-ի համեմատ 2024 թ․-ին ավելացել է 17 անգամ։
Վարչապետ Նիկոլ Փաշինյանի խոսքով՝ կառավարությունը փորձում է խոչընդոտներ ստեղծել, բայց չի կարող առհասարակ արգելել գործունեության այդ տեսակը, որը կա ամբողջ աշխարհում։
«Հայաստանում չեն անի, ուրիշ երկրում կանեն, ինտերնետ խաղադրույք է: Ինտերնետը սահմանափակենք, համոզված եմ՝ շատ կլինի մեկնաբանություն, թե մարդկանց ազատությունը սահմանափակում ենք, բռնապետական քայլ է»,- օրեր առաջ կազմակերպված մամուլի ասուլիսի ժամանակ հայտարարել էր Փաշինյանը։
- ՀՀ-Վրաստան ապրանքաշրջանառությունը 2024 թ.-ին․ նկատելի անկում՝ լավատեսության ֆոնին
- «ՀՀ-ն պետք է ընտրի՝ լինել առաջատա՞ր, թե՞ արձագանքողի դերում»․ ՏՏ ոլորտի մասնագետ
- Երևանի տրանսպորտի բարեփոխումները․ ինչո՞ւ են դժգոհում ուղևորներն ու վարորդները
2024 թ․-ի խաղադրույքները 5․4 մլրդ դոլարով ավելի են ՀՀ պետական պարտքից
Ընդհանուր առմամբ, նախորդ տարի կատարվել է 7 տրլն 236 մլրդ 490 մլն դրամի խաղադրույք։ Factor.am-ի հարցմանն ի պատասխան Պետական եկամուտների կոմիտեն հայտնել է, որ՝
- 106․4 մլրդ դրամ խաղադրույքը կատարվել է խաղատներում,
- 7 տրլն 130 մլրդ դրամը՝ ինտերնետ շահումով խաղերում։
«Այս գումարից խաղերի մասնակիցներին վերադարձել է 98%-ը՝ 7 տրլն 94 մլրդ դրամ՝ որպես շահում»,- տեղեկացնում են ՊԵԿ-ից։
Սակայն հայտնի չէ՝ քանի՞ մարդ է կատարել այդքան խաղադրույք և ո՞ր երկրներից են խաղադրույք կատարողները։
Կոմիտեի փոխանցմամբ՝ խաղատներում և առցանց խաղադրույք կատարած անձանց քանակի վերաբերյալ տեղեկատվություն առկա չէ, իսկ երկրների մասով առանձին վիճակագրություն չի վարվում։
Առկա վիճակագրությունից պարզ է դառնում, որ երկրում խաղային ոլորտի թռիչքային աճը պայմանավորված է ինտերնետ շահումով խաղերով։ Մասնավորապես՝ խաղատներում խաղադրույքների ծավալը 2018 թ․-ի համեմատ 2024 թ․-ին աճել է մոտ 20%-ով։ Նույն ժամանակահատվածում ինտերնետ շահումով խաղերում խաղադրույքների ծավալն աճել է ավելի քան 21 անգամ։
Ուշադրության է արժանի այն հանգամանքը, որ մեկ տարում երկրում կատարված խաղադրույքները 5․4 մլրդ դոլարով գերազանցում են Հայաստանի պետական պարտքը։ 2024 թ․-ին երկրի պետական պարտքը կազմել է 12 մլրդ 842 մլն դոլար, արվել են 18 մլրդ 248 մլն դոլարի խաղադրույքներ։
«Քաղաքական կամքի պակաս չի եղել»․ Փաշինյան
Վարչապետի խոսքով՝ ռիսկերը կառավարելու համար խաղադրույքների հետ կապված որոշ կարգավորումներ արդեն իսկ արվել են։ Օրինակ է բերել խաղադրույքների գովազդների արգելքը։
«Բայց չեմ բացառում, որ «սև ինտերնետում» կան գովազդներ: Դա գոնե հիմա չենք կարողանում կառավարել»,- նկատել է նա։
Նիկոլ Փաշինյանի փոխանցմամբ՝ բոլոր երկրներում էլ կա կազինոյի գործունեության տեսակը։ Արգելել չեն կարող, կարող են միայն հնարավորինս շատ խոչընդոտներ ստեղծել, ինչն էլ փորձում են անել։ Հիշեցրել է՝ փակվել են բուքմեյքերական գրասենյակները, գազալցակայաններից հանվել են խաղային բոլոր ապարատները։ Վստահեցրել է՝ չի եղել «քաղաքական կամքի պակաս»․
«Կոնկրետ գործողություններ են եղել, բայց թվերն աճում են: Այստեղ էլ պետք է վերադառնանք՝ կարո՞ղ է մի բան սխալ ենք անում: Եվ ես դա չեմ բացառում»։
Ըստ վարչապետի՝ ամոթ չէ խոստովանել, որ մասնավոր ընկերությունների՝ այդ ոլորտի տեխնոլոգիաներն ավելի արագ են զարգանում, քան կառավարությունը դրանց հետևից հասնում է:
«Չեք պատկերացնի, թե դա ինձ ինչքան է մտահոգում: Դա այն ոլորտներից է, որտեղ ամենաշատ քայլերն ենք արել՝ մեծ դիմադրություններ հաղթահարելով»,- շեշտել է նա։
Նաև տեղեկացրել է լրագրողներին՝ հետագա խաղադրույքների համար լրացուցիչ խոչընդոտներ ստեղծելու նպատակով կառավարությունը կփորձի նաև «ոլորտում հարկային բեռն ավելի էֆեկտիվ դարձնել»։
Հետևեք մեզ — Facebook | Youtube | Telegram
Խաղադրույքների ծավալի աճ ՀՀ-ում
