Լուկաշենկոյի գույքը Աբխազիայում․ Բելառուսի նախագահը հողակտոր ունի Սև ծովի ափին
Լուկաշենկոյի գույքը Աբխազիայում
Ալեքսանդր Լուկաշենկոն Սև ծովի ափին մի հողակտոր ունի։ Այդ մասին հայտնում է բելառուսական «Եվրոռադիո» պարբերականը։ Բելառուսի նախագահն այն ստացել է 2022 թվականի սեպտեմբերին՝ ռուսների կողմից օկուպացված Աբխազիա այցելելու հաջորդ օրը։
Ինչպես պարզել են Բելառուսի հետաքննական կենտրոնի աշխատակիցները, Կինդիգ գյուղում գտնվող 20 հեկտար հողատարածքը «խոշոր ներդրումային ծրագիր իրականացնելու համար» հատկացվել է Աբխազիայում գրանցված «Ժեմչուժինա 2010» ՍՊԸ-ին։ Այս ընկերության 90 տոկոսը պատկանում է Լուկաշենկոյի նախկին թիկնապահ Ալեքսանդր Ռոմանովսկուն, իսկ 10 տոկոսը՝ Աբխազիայի քաղաքացի Դատո Կվիցինիային։
Կվիցինիան լրագրողների հետ զրույցում հաստատել է, որ ինքը փաստաթղթերի ձևակերպմանը ձևական մասնակցություն ունեցած անձ է։
«Ես ընդհանրապես տեղյակ չեմ… Թղթերը, կարծես թե, իմ անունով են արված։ Ես նույնիսկ տեղյակ չեմ, թե այնտեղ ինչ են անում, ինչ չեն անում»,— ասել է «Ժեմչուժինա 2010»-ի համասեփականատերը։ Հավելել է, որ իրեն վճարել են ընկերությունում ձևական մասնակցություն ունենալու համար՝ «ճանապարհի համար, որ գնացել եմ, իմ ծառայությունների համար, իսկ որ հենց այնպես ինձ վճարեին… առանձնապես մեծ գումար չեն տվել»։
Ռոմանովսկին վաղուց հայտնի է որպես Լուկաշենկոյի «տնտեսվար» Վիկտոր Շեյմանի հետ կապված բիզնեսների համասեփականատեր։
Հողակտորի ճշգրիտ արժեքը հայտնի չէ։ Սակայն մոտակայքում մեկ հեկտար հողը վաճառվում է 320 հազար դոլարով։ Այսինքն՝ Լուկաշենկոյի ստացած հողակտորը կարող է արժենալ մոտ 6,5 միլիոն դոլար։
