Ինչպես Ադրբեջանում ունենալ շաքարախտ ու ողջ մնալ

Պետք է միջոցներ ունենալ

Ադրբեջանում պետությունն իր վրա է վերցնում շաքարախտով բոլոր հիվանդների անվճար բուժումը, բայց նպաստ վճարում է միայն նրանց, ովքեր այդ հիվանդությունից հաշմանդամ են դարձել: Ամենամսյա այդ գումարը կազմում է 127 մանաթ (121$) առաջին խմբի հաշմանդամների համար, 50 մանաթ (48$)՝ երկրորդ և 43 մանաթ (41$)՝ երրորդ խմբի համար: Եթե հիվանդի «բախտը բերել է» և նա թոշակի անցնելու տարիքում է, պետությունը նրան 100 մանաթ (մոտ 100$) է վճարում, ինչպես մնացած թոշակառուներին: Իսկ եթե շաքարախտով հիվանդը համեմատաբար ջահել է և աշխատունակ, նրան ոչ ոք չի վճարի:

Պետք է շատ ուշադիր լինել

Բաքվի համարյա բոլոր սուպերմարկետներում շաքարախտով հիվանդների համար նախատեսված սննդի բաժիններ են լինում: Որպես կանոն, այս խմբում հազարավոր անուն ապրաք կա, բայց իրականում դրանց շատ փոքր մասն է հիվանդներին համապատասխանում:

— Շաքարախտով հիվանդների համար նախատեսված ապրանքի մեծ մասն իրականում «առողջ ապրելակերպի համար նախատեսված սնունդ» է: Դա կարող է հղիների կամ կերակրող մայրերի համար նախատեսված սննդային հավելումներ լինեն կամ հիպերտոնիկների համար մթերք կամ էլ՝ պարզապես նիհարել ցանկացողների համար, — ասաց Ադրբեջանում առողջ սննդի մատակարար ընկերության տնօրեն Հադիր Ֆեյզուլաևը:

Շաքարախտի մասին պետք է իմանալ ավելին

Բաքվի առողջության կենտրոնի բժիշկ-էնդոկրինոլոգ Գուլնարա Մամեդովան ասում է, որ շաքարախտով հիվանդների ճնշող մեծամասնությունը իրենց ախտորոշման մասին շատ քիչ բան գիտեն, ինչը վտանգավոր է. օրինակ, շատ քչերն են հասկանում՝ ինչ է մթերքի գլիկեմիկ ինդեքսը: Իսկ դա շատ կարևոր է, քանի որ բարձր գլիկեմիկ ինդեքս ունեցող սնունդը շատ արագ մարսվում է՝ բարձրացնելով արյան մեջ շաքարի մակարդակը և ենթաստամոքսային գեղձին ստիպելով կտրուկ ավելացնել ինսուլին հորմոնի արտադրումը:

Բժշկի մոտ մտնելու փորձերը պետք է ավելի համառ լինեն

Հիշեցնենք, որ պետությունը շաքարախտով բոլոր հիվանդներին երաշխավորում է անվճար բուժում: Բայց բուժման կուրսն սկսելու համար հիվանդները ստիպված են լինում տարիներով սպասել իրենց հերթին: Պետք է տեղեկանքներ հավաքել, հերթերում սպասել, վիճել, կռվել, ապացուցել: «Իսկ ժամանակը գնում է, և հիվանդությունն իրենն ասում է», — նշում է 55-ամյա բաքվեցի տաքսու վարորդ Ադալաթ Մահմուդովը: Նա իր ախտորոշումն 9 տարի առաջ է իմացել, և վերջերս նոր կարողացել է սկսել բուժումը պետական հիվանդանոցում: Ճիշտ է՝ թոշակի հարցը դեռ բաց է. ի հեճուկս Ադալաթի բոլոր ճիգերի՝ թոշակ չեն նշանակում:

Ադրբեջանում էնդոկրինոլոգների պակաս կա, և այս խնդիրն առավել ցայտուն է շրջաններում: Ադրբեջանի առողջապահության նախարարությունը խոստացել է զբաղվել այդ հարցով, մշակվել են բժիշկների քանակի ավելացմանը միտված հանձնարարականներ: Բայց, ինչպես խոստովանում է Ադրբեջանի շաքարախտով հիվանդների միության փոխնախագահ Ակիֆ Մուխտարովը, այդ հանձնարարականները մասնակի են կատարվել:
Ընդ որում, շաքարախտով հիվանդների թիվն արագորեն աճում է: Ըստ պաշտոնական վիճակագրության՝ հիմա Ադրբեջանում նրանց թիվը 5 անգամ գերազանցում է 2000 թ. ցուցանիշը: