Ինչպե՞ս է Վրաստանը «դիմավորել» կորոնավիրուսի առաջին դեպքը։ Իշխանությունների և քաղաքացիների արձագանքը
Նոր կորոնավիրուսի առաջին դեպքը Վրաստանում հաստատվել է փետրվարի 26–ին։
Ուշ երեկոյան արտակարգ ճեպազրույցի ժամանակ առողջապահության նախարար Եկատերինա Տիկարաձեն հայտարարել է, որ վարակը հայտնաբերվել է Վրաստանի քաղաքացու մոտ, որն Իրանից է ժամանել Ադրբեջանի տարածքով փետրվարի 25–ին։
Նա մոտ հիսուն տարեկան է։ Ըստ բժիշկների՝ այս պահին նա իրեն լավ է զգում, ջերմությունը ցածր է (37 աստիճան), նա բուժման կուրս է անցնում Թբիլիսիի ինֆեկցիոն հիվանդանոցի մեկուսացված պալատում։
Տղամարդն ինֆեկցիոն հիվանդանոց է տեղափոխվել հենց վրաց–ադրբեջանական սահմանից։ Այնտեղ մաքսատան աշխատակիցները հեռահար չափել են նրա ջերմությունն, իսկ քանի որ այն բարձր է եղել, և ինքն էլ Իրանից է եկել, հիվանդն անմիջապես բուժզննման է ուղարկվել։
Այնուամենայնիվ, առողջապահության նախարարը հայտարարել է, որ Վրաստանում համաճարակի առաջացման ռիսկ չկա։ Իսկ վարչապետը հայտարարել է, որ համապատասխան մարմիններն ամբողջությամբ վերահսկում են իրավիճակը երկրում, և խուճապի համար որևէ հիմք չկա։
Ի՞նչ է հայտնի վարակվածի տեղաշարժի և նրա հետ շփված մարդկանց մասին
Վարակված տղամարդու բուժմանը զուգահեռ մասնագետներն այժմ հետաքննում են նրա հիվանդանալու պատմությունը և այն, թե ում հետ է նա շփվել՝ Իրանի տարածքից սկսած։
Հայտնի է, որ նա Վրաստան է ժամանել միկրոավտոբուսով։
Հիվանդությունների դեմ պայքարի ազգային կենտրոնի ղեկավար Ամիրան Գամկրելիձեն ճեպազրույցի ժամանակ հայտարարել է, որ մի քանի մարդ է հայտնաբերվել, որոնց հետ միասին նա միկրոավտոբուսով եկել է։ Գամկրելիձեն չի հստակեցնում, թե արդյոք նրանք Վրաստանի քաղաքացիներ են։
Նա ասել է, որ նրանցից ոմանք կարանտինի մեջ են Ադրբեջանում։ Իսկ վարակվածի անմիջական ուղեկիցը կարանտինում է Թբիլիսիի ինֆեկցիոն հիվանդանոցում, արդեն թեստ է հանձնել, և նրա մոտ կորոնավիրուս չի հաստատվել։
Կարանտինում են նաև մաքսատան այն աշխատակիցները, որոնք սահմանին շփվել են վարակվածի հետ։ Նախարարի խոսքով՝ մաքսատան աշխատակիցները պաշտպանիչ համազգեստով են եղել, ինչը նվազեցնում է վարակվելու ռիսկը։
Արդյո՞ք Վրաստանում այլ կասկածելի դեպքեր են եղել
Թբիլիսիի Լուգարա լաբորատորիան այսօր պետք է պատասխանի, թե արդյոք Վրաստանի ևս երկու քաղաքացիներ վարակված են կորոնավիրուսով, որոնք հոսպիտալացվել են Թբիլիսիի ինֆեկցիոն հիվանդանոցում փետրվարի լույս 26–ի գիշերը։ Նրանք երկուսն էլ Իրանում են եղել, և Վրաստան են վերադարձել փետրվարի կեսերին։
Առողջապահության նախարարի խոսքով՝ ներկա պահին ինֆեկցիոն հիվանդանոցում միայն տասը կասկածելի մարդ կա, որոնցից հինգն Իտալիայից է ժամանել (մեկն իտալացի է, չորսը՝ Վրաստանի քաղաքացի) մյուս հինգն՝ Իրանից (մեկը Վրաստանի քաղաքացի է, մյուսներն՝ Ադրբեջանի)։
Եվս 13 քաղաքացի 14-օրյա ինկուբացիոն փուլը կանցկացնեն կարանտինում՝ չնայած նրան, որ նրանց մոտ կորոնավիրուս չի հայտնաբերվել։ Նրանց տեղավորել են հատուկ նախապատրաստած հյուրանոցներում Վրաստանի տարբեր շրջաններում։
Որքանո՞վ է պատրաստ առողջապահական հատվածը
Այն պահից, երբ Վրաստանում գրանցվել է կորոնավիրուսի առաջին դեպքը, երկիրը ցածր ռիսկի գոտուց վերածվել է բարձր ռիսկի գոտու, ինչը նշանակում է, որ գործարկվել է «պլան Բ»–ն․ այն ենթադրում է հիվանդների ընդունելությանը բուժանձնակազմի պատրաստվածություն։
Ամիրան Գամկրելիձեի խոսքով՝ երկրի առողջապահական համակարգի բոլոր օղակները դրան պատրաստ են՝ սկսած լաբորատոր հետազոտություններից, ավարտած հիվանդամահճակալների առկայությունով և վերակենդանացման բաժանմունքների պատրաստվածությամբ։
Վրաստանում կորոնավիրուսի թեստերն անցկացվում են Լուգարայի անվան վրաց–ամերիկյան լաբորատորիայում, որի տնօրինության տակ ավելի քան երկու հազար թեստ կա։ Անալիզը 4-5 ժամ է տևում։
500 տեղանոց չորս ինֆեկցիոն հիվանդանոցներ (Թբիլիսիում, Քութայիսիում, Բաթումում և Զուգդիդիում) պատրաստ են հիվանդներ ընդունել ողջ երկրից։ Եթե վարակվածների թիվն ավելի մեծ լինի, նրանք կտեղավորվեն բազմապրոֆիլային հիվանդանոցներում։ Ընդհանուր առմամբ, երկրում 14 000 հիվանդամահճակալ և 120 մեկուսացված պալատ (բոքս) կա։
Ըստ Ամիրան Գամկրելիձեի՝ լիովին պատրաստ են բժիշկները, որոնք աշխատանքային փորձ ունեն այլ պանդեմիկ գրիպի ոլորտում։ Նրանք ապահովված են համազգեստով, որը տվյալ փուլում անհրաժեշտ է։
Ինչ վերաբերում է կանխարգելիչ միջոցառումներին, ապա Վրաստանն արդեն չեղարկել է չվերթներն Իրան և Չինաստան։ Սակայն կորոնավիրուսի առաջին դեպքից հետո Իրանի հետ հաղորդակցությունը գործնականում դադարեցվել է երկու շաբաթով․ Վրաստանի քաղաքացիները չեն կարող Իրան մեկնել, իսկ Իրանի քաղաքացիները՝ Վրաստան։
Առողջապահության նախարարի խոսքով՝ տվյալ փուլում Վրաստանում արտակարգ իրավիճակ հայտարարելու անհրաժեշտություն չկա։
Չի պլանավորվում նաև դադարեցնել ուսումնական պրոցեսը։
«Համաճարակային սպառնալիք չկա», — ասել է Եկատերինա Տիկարաձեն։
Վարչապետ Գիորգի Գախարիան հատուկ ստեղծված Միջգերատեսչական խորհրդին հանձնարարել է ամեն օր հասարակությանն իրազեկել կորոնավիրուսի մասին։
«Մեր կառավարության, առողջապահական համակարգի առանցքային խնդիրը (սպառնալիքը) ժամանակին հայտնաբերելն է, միաժամանակ որպես քաղաքացի մեր գլխավոր խնդիրն է անձնական հիգիենայի հիմնական կանոնների պահպանումը։ Ինչը դժվար չէ», — հայտարարել է վարչապետը։
Քաղաքացիների արձագանքը
Չնայած այս հայտարարություններին՝ Վրաստանում կորոնավիրուսի առաջին դեպքն իսկական խուճապ է ստեղծել։
Նախևառաջ, դա արտահայտվում է դեղատներում գոյացող հսկայական հերթերով․ քաղաքացիները ձգտում են բժշկական դիմակներ և դեղորայք գնել։
Վարակի առաջին դեպքի մասին տեղեկության տարածմանը հետևած երկու ժամում Թբիլիսիի խոշոր սուպերմարկետների վաճառասեղանները գրեթե դատարկվել են․ մարդիկ զանգվածաբար սկսել են մթերք գնել, հատկապես՝ արագ փչացող։
Այդ ամենը բազում կատակների առիթ է տվել Ֆեյսբուքի վրացական տիրույթում։ Խուճապային գրառումներին զուգահեռ հայտնվել են բազմաթիվ հումորիստական գրառումներ և մեմեր։
Օրինակ, օգտատերերին առանձնահատուկ կերպով զվարճացրել է այս տեսանյութը, որը լրագրողներն արել են ինֆեկցիոն հիվանդանոցում։
Այստեղ Իրանի՝ կարանտինում գտնվող քաղաքացին լրագրողներին ասում է, որ առողջ է, իր մոտ վարակ չի հայտնաբերվել, և ինքը կարող է տուն վերադառնալ։ Այդ պահին դուրս են գալիս բժիշկներն ու նրան հետ հիվանդանոց տանում։ Շուրջ տասը հազար մարդ է կիսվել այս տեսանյութով։
