Ինչո՞ւ են չեչենները պայքարում արաբների դեմ Ֆրանսիայում, և ի՞նչ կապ ունեն Պուտինին աջակցող կարգախոսները
Ֆրանսիայի Դիժոն քաղաքում հունիսի 18–ին հինգ չեչեն է ձերբակալվել, որոնք մեղադրվում են տեղի չեչեն և արաբական համայնքների միջև բախումների կազմակերպման մեջ, գրում է Reuters–ը։
Զեկույց է հրապարակվել, որում ասվում է, որ չեչեն համայնքը սպառնալիք է ներկայացնում Ֆրանսիայի համար։
Սակայն «ֆրանսիացի չեչենները» ֆրանսիական ոստիկանությանն եմ մեղադրում, որն, իրենց խոսքով, միջոցներ չի ձեռնարկում «արաբ թմրավաճառների» դեմ։
Ամեն ինչ սկսվել է հունիսի 10–ին, սակայն այժմ էլ իրավիճակը մինչև վերջ չի հանդարտվել։ Դիժոնում շարունակում են պարեկություն անել այստեղ տեղափոխված հատուկ նշանակության և զինված ոստիկանության ջոկատների հազարավոր աշխատակիցներ։
• Թե ինչպես են Չեչնիայի փախստականները գրոհում Բելառուսի լեհական սահմանը
Ենթադրաբար, կոնֆլիկտը կապված է այն բանի հետ, որ արաբական խումբը, որը մեղադրվում է թմրավաճառության մեջ, չեչեն դեռահասի է ծեծել։
Դրանից հետո ողջ քաղաքով մեկ իսկական պատերազմ է սկսվել։ Սոցցանցերում հրապարակված տեսանյութերում մարդիկ զենքով և դիմակներով են, մեքենաներ են այրվում, կրակոցներ են լսվում։
Ըստ ֆրանսիական ոստիկանության հաղորդագրությունների՝ չեչեն համայնքի ներկայացուցիչները փողոցներ են փակել Դիժոնում, շատերի դեմքին դիմակներ են եղել, ձեռքին՝ ինքնաձիգներ և դանակներ։
Չեչենական կողմից կոնֆլիկտի մասնակիցներից մեկը DаilуStorm–ին ասել է, որ իրենք ուզում են արաբներին նույն կերպ վարձահատույց լինել․
«Նրանք իրենց այնպես են պահում, կարծես այստեղի տերը լինեն, թմրանյութերի վաճառքով են զբաղվում և ամենաթող ձևով ապրում։ Մենք նրանց բացատրել ենք, որ այդպես պետք չէ։ Եթե պետք լինի, էլի կբացատրենք»։
Ըստ France Info–ի տեղեկությունների՝ 16-ամյա դեռահաս չեչեն տղային ծեծելիս արաբների խումբը նրան ասել է․ «Մենք քեզ կենդանի ենք թողնում, որ ձերոնց ասես․ այսպես յուրաքանչյուրիդ հետ է լինելու»։ Դեռահասը ծանր վիճակում է։
Լրատվամիջոցները, վկայակոչելով ֆրանսիական իշխանություններին, ասում են, որ չեչեն համայնքը սոցցանցերի միջոցով կոչ է արել վրեժ լուծել տուժածի համար։ Ծեծկռտուքներին մասնակցող չեչեններից մեկի խոսքով՝ քաղաք են եկել իր հայրենակիցները, որոնք վերջին շրջանում ապրում են Ֆրանսիայում, Բելգիայում և Գերմանիայում։
Ըստ տեղական լրատվամիջոցների՝ ֆրանսիական հետախուզությունը Ֆրանսիայի իրավաբանական ոստիկանության գլխավոր վարչություն զեկույց է ուղարկել, որում չեչեն համայնքը «երկրի համար սպառնալիք» է անվանվել։
Զեկույցում ասվում է, որ վերջին տարիներին չեչենների և մյուս համայնքերի՝ հիմնականում Հյուսիսային Աֆրիկայից եկածների միջև բախումներն ավելի ու ավելի հաճախակի են տեղի ունենում։
Չեչեն պատմաբան Մայարբեկ Վաչագաևը, որն ապրում է Ֆրանսիայում, ասում է, որ իրադարձությունների նման մեկնաբանությունը սխալ է։
Պատանին ընդամենը 16 տարեկան է, նա վարժարանում է սովորում։ Նրան փորձում են ապացուցել, որ նա չի կարող ապրել այդ քաղաքում, եթե չկատարի թմրավաճառների համայնքի պահանջները։
Չեչենները Դիժոն են եկել, փնտրել են այդ թմրավաճառներին երկու օր և չեն կարողացել գտնել։ Եվ հանկարծ, հենց չեչենները կազմակերպված, տասնյակ մեքենաներով լքել են քաղաքը, նրանք անսպասելիորն հայտնվել են քաղաքում։
Նրանք ինքնաձիգներն են թափահարել և բղավել․ «Կեցցե՜ Պուտինը, որը մի լավ սպանել է չեչեններին»։ Նույնպիսի գրառումներ են հայտնվել Դիժոնի բազմաթիվ շենքերի պատերին։
Իսկ չեչեն համայնքն ընդամենը փորձել է ցույց տալ, որ չի թողնելու նեղացնել իր հայրենակիցներին, որովհետև ոստիկանությունը ոչ մի միջոց չի ձեռնարկում։
Ֆրանսիայի նախագահ Էմանուել Մակրոնն ԱԳՆ–ին հանձնարարել է ուսումնասիրել երկրից այն արտասահմանցիներին արտաքսելու հարցը, որոնք մասնակցել են Դիժոնի անկարգություններին, հաղորդում է RTL ռադիոկայանը։
