ՌԴ-ն աբխազ լրագրող Ինալ Հաշիգին օտարերկրյա գործակալ է հայտարարել
Ինալ Հաշիգը հայտարարվել է օտարերկրյա գործակալ
Ռուսաստանի արդարադատության նախարարությունը աբխազ հայտնի լրագրող, «Չեգեմսկայա պրավդա» թերթի գլխավոր խմբագիր Ինալ Հաշիգին հայտարարել է օտարերկրյա գործակալ։ Նախարարության որոշման մեջ նշվում է, որ Հաշիգը
…տարածել է ոչ հավաստի տեղեկատվություն Ռուսաստանի Դաշնության հանրային իշխանության մարմինների կողմից ընդունվող որոշումների և նրանց կողմից իրականացվող քաղաքականության, ինչպես նաև ընտրական համակարգի մասին։ Համագործակցել է օտարերկրյա քաղաքական գործիչների հետ։
Սա առաջին դեպքն է, երբ Ռուսաստանը օտարերկրյա գործակալ է հայտարարում Աբխազիայի քաղաքացու։
Լրագրողն ինքը նշում է, որ միշտ գրել է բացառապես աբխազական թեմայով և չի հասկանում, թե ինչով չի գոհացրել Ռուսաստանի արդարադատության նախարարությանը։
«[Ըստ երևույթին], Աբխազիայի ինքնիշխանության մասին խոսելն այժմ արդեն ապստամբություն է», — զարմանում է Ինալ Հաշիգը։
Ինալ Հաշիգը հայտարարում է, որ կփորձի վիճարկել այս որոշումը, իսկ օտարերկրյա գործակալի կարգավիճակը հազիվ թե ազդի նրա հետագա մասնագիտական գործունեության վրա. նա կշարունակի գրել Աբխազիայում տեղի ունեցող իրադարձությունների մասին։
Լրագրողը պատմում է, որ արդարադատության նախարարության որոշման հրապարակմանը հաջորդած երկու օրերի ընթացքում նա տարբեր մարդկանցից արդեն ստացել է հսկայական քանակությամբ զանգեր և հաղորդագրություններ՝ ի աջակցություն իրեն։ Իսկ ահա Աբխազիայի իշխանությունները մինչ այժմ որևէ կերպ չեն արձագանքել։
«Երկու օրվա ընթացքում հարազատ աբխազական իշխանության ներկայացուցիչներից աջակցության խոսքեր պարունակող ոչ մի զանգ, ոչ էլ առավել ևս որևէ պաշտոնական մեկնաբանություն չեմ լսել։
Ի վերջո, ես ձեր քաղաքացին եմ, և դուք ղեկավարում եք փոքր, բայց, այնուամենայնիվ, ինքնիշխան պետություն։ Ասեք ինչ-որ բան։ Տարբերություն չկա՝ կողմ, թե դեմ։ Բայց ասեք»,— վրդովվում է Հաշիգը։
Նրա խոսքով՝ իշխանության հետ փոխկապակցված տելեգրամյան ալիքները հրապարակում են գրառումներ, որոնցում համաձայնություն են հայտնում ռուսական արդարադատության նախարարության որոշման հետ։
Ռուսական կողմից ի պաշտպանություն Ինալ Հաշիգի հանդես է եկել քաղաքագետ Սերգեյ Մարկեդոնովը։ Նրա դիտարկմամբ՝ արդարադատության նախարարության որոշումը «հարցեր է առաջացնում», քանի որ Հաշիգը երբեք ռուսատյաց չի եղել։
«Ինձ համար անհասկանալի է, թե ինչու է Ռուսաստանը մոդերատորից և միջնորդից վերածվում գրաքննիչի։ Ինալին՝ դիմացկունություն։ Համոզված եմ, որ արդարությունը կհաղթի»,- գրել է Մարկեդոնովը։
