«Ի՞նչ է լինելու Թբիլիսիում ապաստան հայցողների հետ»․ Վրաստանի և Բելառուսի հատուկ ծառայությունների համաձայնագրի մասին

Վրաստանը սկսում է համագործակցել Բելառուսի ՊԱԿ-ի հետ

2021 թ-ի օգոստոսի 14-ին ուժի մեջ է մտել համագործակցության լայն սպեկտրի մասին համաձայնագիրը Վրաստանի և Բելառուսի պետական անվտանգության կառույցների միջև։ Այս մասին հաղորդագրություն է տարածել բելառուսական reform.by պարբերականը, ինչը բուռն բացասական արձագանք է առաջացրել Վրաստանի հասարակությունում։

«Կա՞ մեկը, որ չգիտի, թե ինչ է Լուկաշենկոյի ՊԱԿ-ը։ Նա տանջում և սպանում է իր քաղաքացիներին։ Նա գրավում է այլ երկրների ինքնաթիռները և առևանգում դիսիդենտ լրագրողներին։ Նա պայմաններ է ստեղծում, որ Իրաքից հազարավոր միգրանտներ հատեն Լիտվայի սահմանն ու ապակայունացնեն Եվրամիությունը։ Այդ ամենն անում է այդ երկրի կառույցը, որը կապված է Ռուսաստանի ՊԱԿ-ի հետ», — սոցցանցերում գրում է «Վերլուծական խորհուրդ» վրացական կազմակերպության հետազոտող Էտո Բուզիաշվիլին։

Համաձայնագրի տեքստում խոսվում է վրացական և բելառուսական պետական անվտանգության կառույցների միջև տեղեկությունների փոխանակման մասին այնպիսի ոլորտրներում, ինչպիսիք են հանցագործությունները պետական անվտանգության դեմ, ահաբեկչությունն ու կիբերահաբեկչությունը, կազմակերպված հանցավորությունը, զենքի ապօրինի շրջանառությունը, կոռուպցիան, գաղտնի տեղեկությունների հրապարակումը և այլն։

Ներառված է նաև պայմանավորվածությունը համատեղ միջոցառումների անցկացման և «պետանվտանգության ծառայությունների ներկայացուցիչների փոխայցելությունների մասին մյուս պետության տարածք որոշակի կամ անորոշ ժամկետով»։

Բացի այդ, համաձայնագիրը ենթադրում է քաղաքացիների անձնական տվյալների փոխանակում։

«Արդյո՞ք բոլորն են հասկանում իրադարձությունների զարգացումը, երբ բելառուս դիսիդենտ լրագրողը կամ ակտիվիստն ապաստան փնտրի Վրաստանում։ Իսկ եթե Ռուսաստանը Բելառուսից տեղեկություններ պահանջի Վրաստանի քաղաքացիների մասի՞ն․ կրկի՞ն բոլորն են հասկանում, թե ինչ տեղի կունենա», — գրում է Բուզիաշվիլին։

Reform.by կայքի տեղեկությունների համաձայն՝ այս համաձայնագիրը ստորագրվել է դեռևս հինգ տարի առաջ՝ 2016 թ-ին, սակայն մինչ օրս չէր վավերացվել որոշակի ընթացակարգերի պատճառով։

Համաձայնագրի դեմ բողոք է արտահայտել «Դրո» («Ժամանակ») քաղաքական կուսակցությունը․

«Համաձայնագիրը ոչ միայն օրինականացնում է Լուկաշենկոյի սարսափելի և ապօրինի ռեժիմը, որը պատասխանատվություն է կրում հազարավոր մարդկանց մահվան, խոշտանգման և քաղաքական բանտարկության համար։ Այս փաստաթուղթը սպառնում է բելառուսների կյանքին, որոնք ապաստան են փնտրում Վրաստանում»։

«Այս քաղաքական ուժի իշխանության մնալու յուրաքանչյուր լրացուցիչ օրը սպառնալիք է վրացի ժողովրդի համար։ Ընտրությունների միջոցով իշխանափոխությունը վճռորոշ նշանակություն ունի Վրաստանի՝ որպես պետության ապագայի համար», — ասված է կուսակցության հայտարարությունում։

• «Օդահենությունը» և եվրոպական պատասխանը․ Բելառուսի հետ ավիահաղորդակցության կասեցում
• Nexta Telegram-ալիքը փաստացի գլխավորել է ցույցերը Բելառուսում։ Ովքե՞ր են նրանք, և ինչպե՞ս է այն աշխատում
• Բռնաճնշումները Բելառուսում․ կալանավորվել է TUT.by պարբերականի ողջ ղեկավարությունն ու լրագրողներ

Վրաստանը Բելառուսի ՊԱԿ-ի հետ համագործակցություն է սկսում այն դեպքում, երբ արևմտյան երկրները պատժամիջոցներ են կիրառում Մինսկի դեմ, իսկ Եվրամիությունը Լուկաշենկոյին օրինական ճանապարհով ընտրված նախագահ չի ճանաչում

ԱՄՆ-ն պատժամիջոցներ է սահմանել Բելառուսի արդեն 43 քաղաքացու, այդ թվում՝ բարձրաստիճան պաշտոնյաների դեմ, որոնք «պատասխանատու են երկրում ժողովրդավարության խաթարման համար»։

Մեծ Բրիտանիան նույնպես ընդլայնում է բելառուս պաշտոնյաների դեմ պատժամիջոցների ցանկը, որոնք պատասխանատու են բռնաճնշումների և մարդկանց իրավունքների խախտման համար։ Նրանց թվում են դատավորներ, ուժայիններ, պաշտոնյաներ և պրոպագանդիստներ։

Լուկաշենկոյի ռեժիմի դեմ զանգվածային ցույցերը շարունակվում են Բելառուսում արդեն մեկ տարուց ավելի՝ 2020 թ-ի օգոստոսի 9-ի նախագահական ընտրություններից հետո։ Ցույցերը ցրելիս մի քանի ցուցարար է սպանվել, հազարավոր մարդիկ են ձերբակալվել, նրանցից շատերը կտտանքների և անմարդկային վերաբերմունքի են ենթարկվել։

Ընդդիմության որոշ առաջնորդներ կալանավորվել են։ Մյուսները, այդ թվում՝ Սվետլանա Տիխանովսկայան, որին ռեժիմի հակառակորդներն ընտրված նախագահ են համարում, ստիպված էին փախչել երկրից։

Բլոգեր և լուսանկարիչ Ռոման Պրոտասևիչը, որը պոպուլյար ընդդիմադիր Telegram-ալիքի հիմնադիրն է, Բելառուսում կալանավորվել է օդում ինքնաթիռի ֆիզիկական գրավման միջոցով, որով Պրոտասևիչը Հունաստանից Լիտվա էր մեկնում։

Օգոստոսի 9-ին Եվրամիությունը հայտարարել է Բելառուսի նախագահ Ալեքսանդր Լուկաշենկոյի դեմ նոր պատժամիջոցների հնարավորության մասին։ «Արևմուտքը Լուկաշենկոյին ոչ լեգիտիմ առաջնորդ է համարում։ Մենք նրան կոչ ենք անում դադարեցնել դաժանությունը ցուցարարների նկատմամբ, բանակցություններ սկսել ընդդիմության հետ և նոր անկախ նախագահական ընտրություններ անցկացնել», — ասված է Եվրամիության հայտարարությունում։