Վրաստանում ԵՄ դեսպան Պավել Գերչինսկին լրագրողների հետ զրույցում հայտարարել է, որ նախագահի դեմ իմպիչմենտի գործընթացը երկրին չի օգնի դառնալ ուժեղ և կայուն, ինչպես կցանկանար Եվրամիությունը։
Ըստ Պավել Գերչինսկու՝ Եվրահանձնաժողովի բոլոր հանձնարարականները հավասարապես կարևոր են ԵՄ անդամակցության թեկնածուի կարգավիճակ ստանալու համար, բայց ամենից շատ Եվրամիությունը առաջընթաց է ակնկալում ապաօլիգարխացման, դատական համակարգի բարեփոխման և լրատվամիջոցների ազատության հարցերում։
Հարցին, թե նախագահ Սալոմե Զուրաբիշվիլիի հետ հանդիպմանը քննարկվե՞լ է արդյոք իմպիչմենտի թեման, Գերչինսկին պատասխանել է, որ իրենց հանդիպման հիմնական թեման Վրաստանի եվրաինտեգրումն է եղել։
Ինչպես պարզաբանում է դեսպանը, հունիսի վերջին Եվրահանձնաժողովը բանավոր հայտարարել է, որ Վրաստանն ամբողջությամբ կատարել է 12 հանձնարարականներից երեքը։ Այդ ժամանակվանից անցել է մի քանի ամիս, և Գերչինսկին ընդգծում է, որ հստակ առաջընթաց է գրանցվել որոշ կետերի ուղղությամբ, որոնք միայն մասամբ էին իրականացվել։
Վրաստանը ԵՄ անդամակցության հայտ է ներկայացրել 2022 թվականի մարտի 3-ին, ինչից հետո կառավարությունը Եվրահանձնաժողովից ձևաթուղթ է ստացել, լրացրել այն և մայիսին վերադարձրել Բրյուսել։
2022 թվականի հունիսի 17-ին Եվրահանձնաժողովը եզրակացություն է պատրաստել Վրաստանին, Ուկրաինային և Մոլդովային ԵՄ անդամակցության թեկնածուի կարգավիճակ տրամադրելու հարցի վերաբերյալ։ Ուկրաինան և Մոլդովան ստացել են այդ կարգավիճակը և պետք է կատարեն որոշակի պարտավորություններ։ Իսկ Վրաստանին հանձնարարվել է նախ կատարել 12 հանձնարարականները, և միայն դրանից հետո երկիրը հնարավորություն կունենա ստանալ թեկնածուի կարգավիճակ։
2023 թվականի հունիսի 22-ին հայտնի դարձավ, որ Վրաստանն ամբողջությամբ կատարել է տասներկու հանձնարարականներից երեքը։
Ինչ վերաբերում է Մոլդովային և Ուկրաինային, որոնց առաջընթացը նույնպես գնահատվել էր Վրաստանի հետ միաժամանակ, Մոլդովան այդ պահի դրությամբ ամբողջությամբ կատարել էր ինը առաջնահերթություններից երեքը, իսկ Ուկրաինան՝ յոթ առաջնահերթություններից երկուսը։ Այդ ամենի մասին բարձրաձայնվել է միջանկյալ բանավոր զեկույցում, որը կարևոր ազդանշան է երկրներին և ցույց է տալիս, թե որ ոլորտներին նրանք պետք է առանձնահատուկ ուշադրություն դարձնեն նախքան հոկտեմբեր ամսին Եվրահանձնաժողովի կողմից ընդլայնման և առաջարկությունների փաթեթի ներկայացումը։
Վրաստանին թեկնածուի կարգավիճակ տրամադրելու մասին որոշումը ԵՄ անդամ երկրները կկայացնեն 2023 թվականի դեկտեմբերին։
