«Թրամփի վարչակազմի համար հայ գերիների ազատ արձակումն առաջնահերթություն է»․ Ջարեդ Գենսեր
Թրամփն ու հայ գերիների ազատ արձակումը
«Մեր խնդրանքը ԱՄՆ նոր վարչակազմին հստակ է՝ հայ քրիստոնյա ռազմագերիների ազատ արձակման գործարքը պետք է նախապայման լինի [խաղաղության համաձայնագրի] առաջընթացի համար, ինչը եղել է վարչակազմի դիրքորոշումը»,- Catholic News Agency-ի հետ զրույցում նման հայտարարությամբ է հանդես եկել միջազգային փաստաբան, իրավապաշտպան Ջարեդ Գենսերը։
Նա հայտարարել է՝ բանտարկյալների ազատ արձակումը ԱՄՆ նոր վարչակազմի «գլխավոր առաջնահերթությունն է»:
Գենսերի փոխանցմամբ՝ իրենց ասվել է, որ գերիների ազատությունը պետք է լինի նախապայման, որպեսզի «նախագահ Թրամփը, ի վերջո, օրհնի խաղաղության գործարքը»։ Թե ո՞վ է փոխանցել ԱՄՆ նոր վարչակազմի այդ ուղերձը, նա չի մանրամասնել։
Ջարեդ Գենսերը Լեռնային Ղարաբաղի նախկին պետնախարար Ռուբեն Վարդանյանի փաստաբանն է։ Տևական ժամանակ է, ինչ ահազանգում է Ադրբեջանում պահվող Վարդանյանի և մյուս հայերի իրավունքների խախտումների, ընթացող շինծու դատավարությունների մասին։ Իրավապաշտպանը նկատել է՝ ինքը ներկայացնում է «բարձր հեղինակություն ունեցող քաղբանտարկյալի», սակայն կատարած աշխատանքը վերաբերում է նաև մյուս բոլոր հայ գերիներին։
Լրատվամիջոցը Ադրբեջանում պահվող հայ քրիստոնյա գերիների վերաբերյալ պարզաբանում է ստացել նաև ԱՄՆ Պետդեպարտամենտից։ Պետդեպից միայն նշել են, որ բոլոր կալանավորված անձանց իրավունքները պետք է հարգվեն։
«Եթե նրանց քրեական մեղադրանք է առաջադրվել, նրանց պետք է տրամադրվեն արդար դատավարության բոլոր երաշխիքները»,- ասված է Catholic News Agency-ի հրապարակման մեջ։
Գենսերի հայտարարությունները՝ հակիրճ
- «ԼՂ-ի նախկին ղեկավարների նկատմամբ Բաքվում հոգեներգործուն միջոցներ են կիրառվում». Փաշինյան
- «Բռնապետությունը չի կարող արդար դատել»․ ԼՂ-ի նախկին պաշտոնյաները՝ դատարանի առաջ
- «Բաքուն օգտագործում է գերիներին՝ որպես Հայաստանի վրա ճնշման լծակ»․ կարծիք Երևանից
- «Եթե Թրամփը մեկուսացման քաղաքականություն չվարի, ՌԴ դերը Կովկասում կնվազի»․ կարծիք
Ադրբեջանում ընթանում է ԼՂ-ի նախկին ռազմաքաղաքական ղեկավարության դատավարությունը։ Բաքուն ծանր հանցագործությունների մեջ է մեղադրում 8 նախկին պաշտոնյաների՝ նախագահներ Արկադի Ղուկասյանին, Բակո Սահակյանին, Արայիկ Հարությունյանին, ԱԺ նախագահ Դավիթ Իշխանյանին, պետնախարար Ռուբեն Վարդանյանին, ՊԲ հրամանատար Լևոն Մնացականյանին, ՊԲ հրամանատարի տեղակալ Դավիթ Մանուկյանին և ԱԳ նախարար Դավիթ Բաբայանին։
Նրանք մեղադրվում են ցեղասպանության, ահաբեկչության և խաղաղ բնակչության բռնի տեղահանում կազմակերպելու մեջ։ Ըստ ամենայնի՝ նրանց սպառնում է ցմահ ազատազրկում։ Սակայն մեղադրյալները նույնիսկ հնարավորություն չեն ունեցել լիարժեք ծանոթանալու քրեական գործի նյութերին։
Նախկին պետնախարար Ռուբեն Վարդանյանի գործը քննվում է առանձին։ Վարդանյանը ի նշան դատական ֆարսի դեմ բողոքի երկու անգամ հացադուլ է հայտարարել։
Ղարաբաղի նախկին ղեկավարները ձերբակալվել են 2023 թվականի սեպտեմբերին ԼՂ-ում տեղի ունեցած ռազմական գործողություններից հետո։ Ադրբեջանը «հակահաբեկչական գործողություն» իրականացնելու մասին էր հայտարարել Լեռնային Ղարաբաղում ավելի քան 100 հազար հայերի 10 ամիս շրջափակման մեջ պահելուց հետո։ Ռազմական գործողությունների ավարտից և Լաչինի միջանցքի բացումից հետո ողջ հայ բնակչությունը ստիպված եղավ լքել իր հայրենիքը։
«Թրամփը խոստացել է պաշտպանել հայ քրիստոնյաներին»

Միջազգային փաստաբան Ջարեդ Գենսերը հիշեցրել է Դոնալդ Թրամփի նախընտրական խոստումները։ Մասնավորապես՝ Թրամփը նախընտրական քարոզարշավի ընթացքում խոստացել էր պաշտպանել հալածանքների ենթարկվող հայ քրիստոնյաներին, դատապարտել էր 2023 թ․-ի սեպտեմբերին Լեռնային Ղարաբաղում տեղի ունեցածը՝ այն որակելով «էթնիկ զտում»:
Իրավապաշտպանը Թրամփի վարչակազմին կոչ է արել իրագործել նախընտրական խոստումը։
Խոսելով իր պաշտպանյալի՝ Ռուբեն Վարդանյանի մասին՝ նկատել է՝ Հայ Առաքելական եկեղեցու հետևորդ Վարդանյանին չի թույլատրվել ունենալ Աստվածաշունչ․
«Սա միայն ամրապնդում է այն, որ նրա և Լեռնային Ղարաբաղի այլ առաջնորդների հալածանքը բացառապես այն պատճառով չէ, որ նրանք եղել են, այսպես կոչված, «անկախացող հանրապետության» ներկայացուցիչներ, այլ պայմանավորված է նաև նրանց քրիստոնյա լինելու հանգամանքով»:
Պատահական չի համարում այն հանգամանքը, որ ԼՂ-ում տեղի ունեցած էթնիկ զտումից հետո Ադրբեջանը ոչնչացնում է հայկական կրոնական և մշակութային ժառանգությունը։
«Առանց գերիների հարցի լուծման խաղաղության գործընթացը կարող է հանգեցնել նրանց զոհաբերման»
Գենսերի դիտարկմամբ՝ խաղաղության հաստատումը հնարավոր չի լինի, քանի դեռ հայ-ադրբեջանական խաղաղության պայմանագրի շրջանակներում «չեն բացահայտվել, բանակցվել և լիովին լուծվել» բոլոր խնդիրները․
«Խաղաղության պայմանագիրը, որը չլուծված է թողնում Լեռնային Ղարաբաղի ժողովրդի ապագայի և հայ քրիստոնյա գերիների ազատ արձակման խնդիրները, կարող է հանգեցնել այդ բանտարկյալների զոհաբերմանը՝ որպես այդ համաձայնության մի մաս»։
Միջազգային փաստաբանի խոսքով՝ վերոնշյալ կարևոր հարցերից ոչ մեկը ներառված չէ խաղաղության պայմանագրում, դրանք չկան նաև Երևան-Բաքու երկկողմ օրակարգում:
«ԱՄՆ նոր վարչակազմը կարող է ցնցել բռնապետ Ալիևին»
Իրավապաշտպանը Թրամփի վարչակազմին խրախուսել է «ցնցել» Ադրբեջանի նախագահին՝ Ալիևին բնորոշելով որպես բռնապետ: Չի հստակեցրել՝ ի՞նչ մեթոդներ է պետք կիրառել Իլհամ Ալիևի վրա ճնշում գործադրելու համար․
«Բռնապետները քաղբանտարկյալներին ազատ են արձակում միայն այն ժամանակ, երբ ստիպված են դա անել: Նրանք երբեք դա չեն անում մեծահոգությունից կամ մարդասիրական մղումներից ելնելով»։
Գենսերի խոսքով՝ ազատ արձակում տեղի է ունենում այն ժամանակ, երբ «բռնապետը տեսնում է, որ քաղբանտարկյալին կամ քաղբանտարկյալներին կալանքի տակ պահելն իր վրա ավելի թանկ է նստում, քան նրանց ազատ արձակելը»։
Հետևեք մեզ — Facebook | Youtube | Telegram
Թրամփն ու հայ գերիների ազատ արձակումը