Կորոնավիրուս․ Թրամփն ընդդեմ Առողջապահության համաշխարհային կազմակերպության

ԱՄՆ նախագահը քննադատել է Առողջապահության համաշխարհային կազմակերությանը Չինաստանին համակրելու համար և պատասխան է ստացել․ «Մի՛ քաղաքականացրեք պանդեմիան, եթե չեք ուզում, որ աշխարհում դրան զոհ գնացածների թիվն ավելանա»։

Աղբյուր՝ CNN

Ի՞նչն է զայրացրել Թրամփին

ԱՄՆ նախագահը 2020 թ–ի ապրիլի 8–ին տված մամուլի ասուլիսի ժամանակ խիստ քննադատության է արժանացրել Առողջապահության համաշխարհային կազմակերպությանը (ԱՀԿ) կորոնավիրուսի պանդեմիային արձագանքի համար։

«Մահվան ելքերը քիչ կլինեին, եթե նրանք ճիշտ վերլուծեին իրավիճակն», — ասել է Դոնալդ Թրամփը։

Ըստ Թրամփի՝ կազմակերպությունն ի սկզբանե թերագնահատել է վարակի տարածման սպառնալիքը։ Որպես օրինակ նա հիշել է այն, որ ԱՀԿ–ն հրաժարվել էր սատարել Չինաստանի հետ տրանսպորտային հաղորդակցությունը սահմանափակելու իր կոչը։

Թրամփը պնդել է նաև, որ ԱՀԿ–ն «կասկածելի համակրանք ունի Չինաստանի նկատմամբ»։

Որպես պատիժ ԱՄՆ նախագահը սպառնացել էր կտրել այդ կազմակերպության ֆինանսավորումը։

«Մենք Առողջապահության համաշխարհային կազմակերպությանը տարեկան 450 մլն դոլար ենք տալիս, – հայտարարել է նա, – իսկ Չինաստանը՝ 42 մլն։ Սակայն, ամեն ինչ արվում է ի շահ Չինաստանի։ Դա արդար չէ ոչ մեր, ոչ մնացած աշխարհի նկատմամբ»։

Ավելի ուշ նա հայտարարել էր, որ չի պատրաստվում անմիջապես կասեցնել ֆինանսավորումն, այլ միայն «հետազոտում է այդ հնարավորությունը»։

ԱՄՆ–ն արդեն երկու շաբաթ է, ինչ աշխարհում առաջատար է կորոնավիրուսով վարակվածների թվով։ Ապրիլի 9–ի դրությամբ՝ երկրում հիվանդ է 435,167 մարդ։ Նրանցից 14,797–ը մահացել են։

Առողջապահության համաշխարհային կազմակերպության ղեկավարի պատասխանը

Մեկ օր անց ԱՀԿ գլխավոր տնօրեն Թեդրոս Հեբրեսիուսը պատասխանել է Թրամփի քննադատությանը։

«Խնդրում եմ չքաղաքականացնել կորոնավիրուսի շուրջ ստեղծված իրավիճակը։ Դուք փորձում եք դրա հաշվին լուծել սեփական ներքաղաքական խնդիրները։ Եթե ուզում եք, որ մահվան ելքերն ավելի շատ լինեն, ուրեմն ճիշտ ուղու վրա եք», — հայտարարել է Հեբրեսիուսը։

Նա հիշեցրել է կորոնվիրուսի տարածման հետ կապված իրավիճակում Առողջապահության համաշխարհային կազմակերպության գործողությունների մասին․

● 2020 թ–ի հունվարի 1–ին ԱՀԿ–ն զգուշացրել է նոր կորոնավիրուսի վտանգի մասին։

● Հունվարի 5–ին իր առաջարկություններն է հրապարակել ԱՀԿ անդամ երկրների կառավարություններին՝ համաճարակին հակազդելու վերաբերյալ։

● Հունվարի վերջին կատարվածն անվանել է «գլոբալ սպառնալիք բնակչության առողջությանը»․ կազմակերպության դասակարգման մեջ դա տագնապի բարձրագույն մակարդակն է։

Ֆաքթչեքինգ

CNN–ը ստուգել է նախագահ Թրամփի պնդումների ճշմարտացիությունը։

Առողջապահության համաշխարհային կազմակերպությունն իրոք չի սատարել Չինաստանի հետ տրանսպորտային հաղորակցության սահմանափակման վերաբերյալ նրա կոչը։ Սակայն դա կազմակերպության ստանդարտ պրակտիկան է․ այն անարդյունավետ է համարում տրանսպորտային բլոկադան։

ԱՀԿ–ն արժանանում է լրատվամիջոցների և մասնագետների քննադատությանն այն բանի համար, որ իր վերլուծությունում հիմնվել է չինական իշխանությունների պաշտոնական վիճակագրության վրա, որը վստահություն չի ներշնչում։

Սակայն նման դժգոհություն նախագահ Թրամփն ԱՀԿ–ին չի հայտնել։

Ինչո՞ւ Թրամփը երկու ամիս չէր արձագանքում իր խորհրդատուների և հետախուզության զգուշացումներին

ԱՄՆ հետախուզական վարչության ներկայացուցիչները պնդում են, որ դեռևս 2020 թ–ի հունվարի սկզբին բժշկության ոլորտի հետախուզական վարչությունը նախագահ Թրամփին զգուշացրել է վարակի վտանգի մասին, որը տարածում էր գտել Ուհանում։

Հունվարի 15–ին ԱՄՆ նախագահի առևտրի հարցերով հատուկ ներկայացուցիչ Նավարոն Թրամփին նույն բանն էր հաղորդել։

Այդ երկու նախազգուշացումներն անտեսվել էին։

Ամերիկյան լրատվամիջոցներում ենթադրություններ են արվում, որ ԱՄՆ նախագահի դիրքորոշման վրա ազդել են նրա գլխավոր բիզնեսի՝ հյուրանոցների և գոլֆ–ակումբների շահերը, որոնք կարանտինի պայմաններում մեծ վնասներ են կրում։