Թուրքական զենք Արցախում և 80 լրագրող մարտերի գոտում․ իրավիճակը 2020 թ-ի նոյեմբերի 5-ի դրությամբ

Տեղեկություններ Բաքվից

• Ռազմական գործողությունների մեկնարկից ի վեր ադրբեջանական կողմից զոհվել է 92 մարդ, 404-ը վիրավորվել է։

• Ադրբեջանի պաշտպանության նախարարությունը հայտարարել է, որ հայ զինվորականները հրետակոծում են Ադրբեջանի Տերտերի և Աղդամի շրջանները, սակայն հերքել է հայկական կողմի հաղորդագրություններն՝ ադրբեջանական բանակի կողմից Մարտունու և Շուշիի հրետակոծության վերսկսման մասին։

• «Թուրքիայից ոչ մի ռազմական օգնություն չի գալիս, Բաքուն պարզապես Անկարայից ժամանակակից սպառազինություն է ձեռք բերում», — հայտարարել է Ադրբեջանի նախագահ Իլհամ Ալիևը իսպանական EFE գործակալությանը տված հարցազրույցում։

• «Հիմնական սպառազինությունն Ադրբեջան է գալիս Ռուսաստանից։ Մենք զենք ենք գնում նաև այլ երկրներից։ Սակայն, չգիտես ինչու, բոլորը խոսում են միայն Թուրքիայի մասին», — հայտարարել է Ալիևը։

• «Հայաստանի վարչապետի հետ հանդիպելն իմաստ չունի։ Վերջին երկու տարվա ընթացքում ես բազմաթիվ հանդիպումներ եմ ունեցել նրա հետ, սակայն դրանք անօգուտ էին՝ բացառությամբ առաջին հանդիպումների», — հայտարարել է Ադրբեջանի նախագահը։

Տեղեկություններ Երևանից

• Հայաստանը Եվրամիությանն առաջարկել է սառեցնել Ադրբեջանի հետ Արևելյան գործընկերության ծրագիրը։

• Հայաստանին ռազմական օգնություն տրամադրելու շուրջ Ռուսաստանի հետ խորհրդակցություններն անցկացվում են «հույժ գաղտնի» ռեժիմով, մանրամասներ դեռ չեն լինելու, հայտարարել է փոխարտգործնախարարը։

• Արցախի շուրջ 33 հազար սովորող և Հայաստանի սահմանամերձ գյուղերի մոտ 10 հազար դպրոցական անցել է հեռավար ուսուցման՝ պատերազմի պատճառով, ասել է Հայաստանի կրթության փոխնախարարը։

• Ադրբեջանն ԱԹՍ-ներ է կիրառել Հայաստանի Գեղարքունիքի մարզի չորս գյուղերի դեմ։ Բոլոր սարքերը ոչնչացվել են, քրեական գործ է հարուցվել։

• «Համաշխարհային առաջնորդները թերագնահատում են հակամարտությունում Թուրքիայի դերը։ Խոսքը թուրքական տեխնոլոգիաների՝ ժամանակակից ԱԹՍ-ների, F-16 կործանիչների, Թուրքիայում պատրաստված զինվորականների մասին է, որոնք, ըստ էության, ղեկավարում են ռազմական գործողությունները», — ասել է Հայաստանի նախագահը Շվեդիայի Sveriges Radio AB հանրային ռադիոյին տված հարցազրույցում։