«Թեթև և ասիմպտոմ դեպքերը ընդհանրապես չեն հոսպիտալացվի, կմնան տանը» - առողջապահության նախարար

Հայաստանում կորոնավիրուսից մահվան ևս մեկ դեպք է արձանագրվել։ Մահացածների ընդհանուր թիվը հասավ 29-ի։

Առողջապահության նախարարության մամուլի խոսնակ Ալինա Նիկողոսյանի խոսքով՝ պացիենտը եղել է 80 տարեկան և ունեցել է ուղեկցող խրոնիկական հիվանդություններ:

Ապրիլի 27-ի դրությամբ կորոնավիրուսով վարակվածների թիվն ավելացել է 62-ով և հասել 1808-ի։ Հիվանդությունից բուժվածների թիվն ավելացել է 15-ով, նրանց ընդհանուր թիվը կազմում է 848: Շարունակում են բուժում ստանալ 931 մարդ:

Հայաստանի իշխանությունները մեղմում են արտակարգ դրության ռեժիմը՝ ավելի շատ ձեռնարկություններ կարող են վերսկսել աշխատանքը

Տեսանյութ․ Հայաստանի տնտեսությունը կկարողանա՞ արագ հաղթահարել կորոնավիրուսի համավարակի հետևանքները

Առողջապահության նախարար Արսեն Թորասյանը «Ազատություն» ռադիոկայանին տված հարցազրույցի ընթացքում խոսել է Հայաստանում կորոնավիրուսի դեմ պայքարի արդյունավետության մասին։ Նա հատկապես հաջող է համարում կարանտինում մարդկանց պահելու փորձը։ Նախարարի խոսքով, արտերկրից Հայաստան ժամանող քաղաքացիներից 10-15% –ի դեպքում կարանտինում 14–օր մնալուց հետո թեստը եղել է դրական։ Ինչն էլ վկայում է այս մեթոդի արդյունավետության մասին։

Նախախարը խոսել է նաև սխալի մասին, որն, իր կարծիքով, թույլ է տվել Հայաստանը կորոնավիրուսի դեմ պայքարում․ 

«Մեր սխալն այն էր, որ մենք թույլ տվեցինք մեկուսացված քաղաքացիներից մեկին դուրս գալ և մասնակցել սգո արարողությանը, տեղի ունեցավ պարզ կանոնների խախտում, ինչից հետո մենք ընդհանրապես դադարեցրեցինք նման պրակտիկան, քանի որ այն իր մեջ պարունակում է նման ռիսկ»։

Խոսքը գնում է Նորաշեն գյուղի մասին, որի բնակչին կարանտինում եղած ժամանակ թույլատրվել է մասնակցել հարազատի հուղարկավորությանը, որտեղ նա՝ էմոցիաներին տեղի տալով, գրկախառնվել էր համագյուղացիների հետ։ Քանի որ դրանից հետո նրա մոտ հաստատվել էր կորոնավիրուսի առկայությույնը, գյուղը փակվեց կարատինի։

Սակայն այս պահին առողջապահության համակարգը դիտարկում է իրադարձությունների զարգացման հնարավոր տարբերակները և իր կողմից դրանց արձագանքման այլ մոտեցումներ է նախատեսում։

«Մինչ օրս յուրաքանչյուր հաստատված դեպքի հետևից մենք գնում ենք, ես չեմ ուզում, իհարկե, որ գա այդ օրը, բայց գալու է մի օր, որ մենք չենք կարողանալու գնալ յուրաքանչյուր դեպքի հետևից, այդ թվում նաև իմաստ չի ունենալու փակել որևէ բնակավայր: Եվ մեր ամբողջ խնդիրն այս ընթացքում եղել է այդ օրը հեռվացնելը։

Պատրաստվում ենք հաջորդ սցենարին․ հնարավոր է, որ մենք բոլորին չհոսպիտալացնենք կամ հյուրանոցներում չպահենք, այլ գնանք մյուս երկրների օրինակով, երբ թեթև և ասիմպտոմ դեպքերը  ընդհանրապես չեն հոսպիտալացվի, կմնան տանը։ Միևնույն է, հնարավոր չէ բոլորին պահել հիվանդանոցներում։ Այս դեպքում մեր միակ խնդիրը կլինեն միջին և ծանր դեպքերը, որոնք առողջական լուրջ խնդիր կունենան։ Մեր առողջապահական համակարգը կփորձի լուծել իրենց խնդիրները, որպեսզի նրանք արագ ապաքինվեն, իսկ ծայրահեղ ծանրերը՝ չմահանան», — ասել է առողջապահության նախարարը։

Հաաստանում արտակարգ դրություն է գործում մարտի 16–ից։ Այն հայտարարված էր մեկ ամսով։ Ապրիլի 13–ին կառավարությունը որոշեց երկարաձգել արտակարգ դրության ռեժիմը ևս մեկ ամսով։

Մարտի 25–ից գործում է նաև մարդկանց տեղաշարժի խիստ սահմանափակում։ Տնից կարելի է դուրս գալ միայն ծայրահեղ անհրաժեշտության դեպքում՝ անձնագրով և տեղաշարժի թերթիկով։ Խախտումներին հետևում է ոստիկանությունը։ Չի աշխատում ողջ հանրային տրանսպորտն, այդ թվում՝ մետրոն։