«Այսպես կոչված ընկերները փորձում են իշխանափոխություն անել». Թբիլիսիի քաղաքապետ

Թբիլիսիի քաղաքապետ Կախա Կալաձեն «Իմեդի» հեռուստաընկերության եթերում հայտարարել է, որ Վրաստանի, այսպես կոչված, բարեկամները փորձում են ինչ-որ կերպ երկրում իշխանափոխություն անել։ Նրա խոսքով՝ ինքը լավ ծանոթ է եվրոպական արժեքներին, «բայց երբ քեզ ասում են, որ պետք է ստրուկ լինես, դա անընդունելի է»։

Էլ ի՞նչ է ասել Թբիլիսիի քաղաքապետը Եվրամիության մասին.

● «Կառավարությունը վստահեցնում է, որ ամեն ինչ կարվի [ԵՄ թեկնածուի] կարգավիճակ ստանալու համար։ Բայց ես, դարձյալ 100 տոկոսով վստահ չեմ, որ կարգավիճակի վերաբերյալ դրական որոշում կլինի, քանի որ այն օգտագործվում է որպես քաղաքական զենք»։

● «Իմ ամբողջ անցած կյանքը կապված է Եվրոպայի հետ, իմ բոլոր հաջողությունները կապված են Եվրոպայի հետ։ Ես ապրել եմ Եվրոպայի լավագույն քաղաքներից մեկում և հրաշալի գիտեմ, թե ինչ են իրենցից ներկայացնում եվրոպական արժեքները, լավ գիտեմ, թե որքան քաղաքակրթություն կարող է բերել եվրոպական զարգացումը։ Բայց, ընկերներ, երբ քեզ ասում են, որ դու պետք է ստրուկ լինես, դա կտրականապես անընդունելի է։ Մենք պետք է գլուխներս բարձր քայլենք, պետք է անցնենք ողջ Եվրոպայով, և պետք է ամեն ինչ անենք, որ մեր երկիրը դառնա Եվրամիություն կոչվող ընտանիքի անդամ»։

● «Երկրորդ ճակատի բացման վերաբերյալ հայտարարությունների տարածումը դանդաղե՞լ է, այդ հայտարարությունները վերացե՞լ են։ Օրհնված մարդիկ, ի՞նչ եք արել այս Վրաստանի հետ, ի՞նչ եք ուզում այս երկրից։ Դուք ավելի զարգացած երկրներ եք, քան մենք, ավելի ուժեղ տնտեսություն ունեք, քան մենք, ձեր երկրներում ավելի շատ մարդ է ապրում, քան մեր։ Ի՞նչ եք ուզում այս երկրից։

● «Մենք պահպանել ենք խաղաղությունը, երկիրը զարգանում է, մենք ունենք տնտեսական աճ, մենք ձգտում ենք դեպի Եվրոպա, ինչո՞ւ, ինչո՞ւ պետք է լինի լարվածություն, պատերազմ, ինչո՞ւ պետք է լինեն գերբնակեցված քաղաքներ, փախստականներ։ Դեռ ուզու՞մ ենք այդ ամենը։ Սա է իրականությունը»:

● «Այդ հանրահավաքում կային մարդիկ, ովքեր իսկապես [ուզում են] եվրոպական ապագա, և այս թեման նրանց համար կարմիր գիծ է։ Վրաստանում նման մարդիկ շատ կան, և այս ուղղությունը մեզ համար շատ կարևոր է։ Բայց այնտեղ շատ մարդիկ կային՝ «Գիրչիի» երիտասարդները, ովքեր հատուկ թրեյնինգներ են անցնում, «Ազգային շարժման» երիտասարդները, «Ֆրանկլինի դպրոցը», որն ընդհանուր առմամբ բավականին հետաքրքիր ուղղություն է, և մենք այդ հարցի վերաբերյալ ավելի մանրամասն տեղեկություններ կտրամադրենք հասարակությանը»։

● «Տեսեք, երբ սկսվեցին այդ բախումները՝ Մոլոտովի կոկտեյլները, քարերը, հատուկ նշանակության ջոկատը նահանջեց ու անմիջապես վերադարձավ, նույնը շարունակվեց։ Այդ ամենն արվել է միտումնավոր՝ որոշ անկարգություններ ու առճակատումներ ավելի խորացնելու համար։ Բայց մենք ոչ մեկին երկիրը մանիպուլացնելու հնարավորություն չենք տա»։

● «Խոսքի և արտահայտվելու ազատությունն այս երկրում պաշտպանված է. կարելի է խոսել ինչ-որ հարցերի շուրջ, բողոքել այս կամ այն ​​ձևով, բայց այդ ամենը պետք է անել օրենքի սահմաններում։ Եթե ​​որևէ մեկը համարձակվի կազմակերպել ինչ-որ կոնֆլիկտ, արյունահեղություն, հեղափոխություն, դրան կհետևի ամենախիստ արձագանքը, իհարկե, օրենքի շրջանակներում»։

• «CNN-ը սուտ է տարածում». Վրաստանի իշխող կուսակցության ղեկավար Իրակլի Կոբախիձե
• Վրաստանի ընդդիմադիր «Միացյալ ազգային շարժում» կուսակցությունը բողոքի ցույցեր է սկսում
• Վրաստանի խորհրդարանը օրակարգից հանել է «Օտարերկրյա գործակալների մասին» օրենքը

Քաղաքապետ Կախա Կալաձեն երրորդ բարձրաստիճան պաշտոնյան է, ով մարտի 7-9-ի ցույցերից հետո հնչեցնում է կոշտ հակաարևմտյան հայտարարություններ և ցուցարար երիտասարդներին կապում տարբեր «ռեակցիոն» քաղաքական խմբավորումների հետ։

Նախ Վրաստանի վարչապետ Իրակլի Ղարիբաշվիլին «Իմեդի» կառավարական հեռուստաալիքին տված ծավալուն հարցազրույցում մարտի 7-9-ի իրադարձությունների մասին հայտարարել էր, որ «չի բացառվում, որ ակցիայի կազմակերպիչներն իրենք ծեծած լինեն որոշ երիտասարդների» իրենց նպատակներին հասնելու համար։ Նրա խոսքով՝ «Եվրախորհրդարանն ավելի լավ կանի հոգ տանի իր մասին, քանի որ կոռուպցիոն սկանդալում ներգրավված է 100 եվրապատգամավոր»։

«Երիտասարդության ուղեղները լվանալու համար ստեղծվել է «Ֆրանկլինի ակումբ» կազմակերպությունը, որի կազմում են «ռեակցիոն ազգայնականներ» (Լևան Ռամիշվիլի, Գիա Նոդիա), ինչպես նաև «այլ ծայրահեղական ընդդիմության առաջնորդներ» (Զուրաբ Ջափարիձե, Գիորգի Մշվենիերաձե, Գիորգի Մելաձե), նրանք դասախոսություններ են կարդում ուսանողների և ավագ դպրոցի աշակերտների համար: Ակումբին աջակցում է Atlas Network ամերիկյան կազմակերպությունը, որը «բռնի և ոչ բռնի բողոքի ցույցեր է կազմակերպում ամբողջ աշխարհում»,— ասել է Ղարիբաշվիլին։

Դրանից հետո իշխող կուսակցության նախագահ Իրակլի Կոբախիձեն ճեպազրույց է անցկացրել, որի ընթացքում, ըստ էության, կրկնել է Ղարիբաշվիլիի խոսքերը և ասել, որ ցուցարարների հետևում կանգնած են «Ազգային շարժումը» և «Գլոբալ պատերազմի կուսակցությունը», որոնց նպատակն էր բռնի ուժով տապալել իշխանությունը, Վրաստանը ներքաշել պատերազմի մեջ և «այստեղ երկրորդ ճակատ բացել»։

• «Ժողովրդի ուժը». հակաարևմտյան շարժում, որը ծառայում է Վրաստանի իշխող թիմին
• Արցունքաբեր գազ, ջրցան մեքենաներ. Վրաստանը դեմ է «օտարերկրյա գործակալների մասին» օրենքին

Մարտի 7-ին խորհրդարանն առաջին ընթերցմամբ 76 դեմ, 13 դեմ ձայներով ընդունեց «Օտարերկրյա ազդեցության թափանցիկության մասին» օրինագիծը։

Այնուհետև ընթացակարգի համաձայն՝ երկու օրինագծերն էլ ուղարկվեցին Վենետիկի հանձնաժողով։

Ողջ գործընթացն ուղեկցվեց Թբիլիսիի Ռուսթավելի պողոտայում անցկացվող հանրահավաքներով։ Օրինագծի առաջին ընթերցմամբ ընդունումից հետո բողոքի ցույցը բազմահազարանոց դարձավ։ Իշխանությունները երկու անգամ արցունքաբեր գազով և ջրցան մեքենաներով ցրեցին տասնյակ հազարավոր մարդկանց հավաքը։

Ինչպես Վրաստանում, այնպես էլ արտերկրում բոլոր կազմակերպություններն ու քաղաքական գործիչներն այս օրինագիծն անվանում են ռուսական մոդել և ասում, որ դրա ընդունումը հսկայական խոչընդոտ կհանդիսանա դեպի Եվրամիություն երկրի ճանապարհին։

Հետևեք մեզ — Facebook | Youtube | Telegram

Մարտի 9-ին իշխող կուսակցությունը հայտարարեց, որ հետ է կանչում օրինագիծը: Մարտի 10-ին խորհրդարանում երկրորդ ընթերցման ժամանակ մեծամասնությունը քվեարկեց այն մերժելու օգտին։ Այս անգամ օրինագծին դեմ քվեարկեց 35 պատգամավոր, կողմ՝ մեկը։

Օրինագծի հեղինակներից Դմիտրի Խունդաձեն հայտարարեց, որ չընդունելով այս օրենքը՝ վրաց հասարակությունը «հնարավորություն է բաց թողել»։