Վրացի ընդդիմադիր գործիչ Էլենե Խոշտարիան դատապարտվել է 1,5 տարվա ազատազրկման
Էլենե Խոշտարիան դատապարտվեց ազատազրկման
Թբիլիսիի քաղաքային դատարանը ընդդիմադիր քաղաքական գործիչ Էլենե Խոշտարիային դատապարտել է մեկ տարի վեց ամսվա ազատազրկման՝ քաղաքապետ Կախա Կալաձեի նախընտրական պաստառի վրա «Ռուսական երազանք» գրելու համար։
Դատավճիռը հրապարակել է դատավոր Գիորգի Արևաձեն։ Իր որոշումը հիմնավորելով՝ նա նշել է, որ Խոշտարիայի գործողությունները հաստատվել են հեռուստատեսությամբ հեռարձակված տեսանյութով, ինչպես նաև գործը վարող անվտանգության ծառայության աշխատակցի ցուցմունքով։
Խոշտարիան չի ներկայացել դատական նիստին և չի ընդունել իր մեղքը։
Նա ձերբակալվել էր 2025 թ․-ի սեպտեմբերի 15-ին՝ այն բանից հետո, երբ հրաժարվել էր վճարել 5000 լարի գրավը, որը դատարանը սահմանել էր որպես կանխարգելիչ միջոց։
Գործը կապված է 2025 թ․-ի սեպտեմբերի 14-ին տեղի ունեցած միջադեպի հետ։ Խոշտարիան մարկերային գրիչով «Ռուսական երազանք» էր գրել Թբիլիսիի քաղաքապետ Կախա Կալաձեի նախընտրական շտաբի մոտ տեղադրված պաստառի վրա։ Անձամբ էր տեսանյութը տարածել սոցիալական ցանցերում՝ նշելով, որ իր համերաշխությունն է հայտնում նմանատիպ արարքի համար ձերբակալված և հետագայում գրավի դիմաց ազատ արձակված ակտիվիստ Մեգի Դիասամիձեին։
Դատախազությունը Խոշտարիային մեղադրանք էր առաջադրել Վրաստանի Քրեական օրենսգրքի 187-րդ հոդվածի 1-ին մասով, որը վերաբերում է ուրիշի գույքին վնաս հասցնելուն, որը հանգեցրել է զգալի կորուստների։ Այս հոդվածը նախատեսում է 1-5 տարվա ազատազրկում։
Հարկ է հիշեցնել, որ 2026 թվականի մարտի 12-ին Եվրոպական խորհրդարանը 438 կողմ և 37 դեմ ձայների հարաբերակցությամբ ընդունել էր «Էլենե Խոշտարիայի և քաղբանտարկյալների գործը «Վրացական երազանքի» ռեժիմի պայմաններում» վերնագրված բանաձևը։
Բանաձևը դատապարտում է «Վրացական երազանքի» ռեժիմի կողմից Վրաստանում քաղաքական հակառակորդների, լրագրողների և ակտիվիստների «համակարգային հետապնդումները» և պահանջում անհապաղ ազատ արձակել Էլենե Խոշտարիային և Վրաստանում բողոքի ցույցերի ժամանակ՝ «քաղաքական դրդապատճառներով» ձերբակալված մյուս անձանց։
Հետևեք մեզ — Facebook | Youtube
Էլենե Խոշտարիան դատապարտվեց ազատազրկման
