«Ստեղծել ենք դիմադրության հարթակ»․ Զուրաբիշվիլին՝ ընդդիմության համակարգման մասին
Զուրաբիշվիլին` ընդդիմության կոորդինացման մասին
Վրաստանի հինգերորդ նախագահ Սալոմե Զուրաբիշվիլին ընդդիմության ներկայացուցիչների հետ հանդիպման արդյունքներն ամփոփող ճեպազրույցում ասել է, որ ընդդիմության համակարգումը, որի մասին հայտարարվել էր ավելի վաղ, տեղի է ունեցել ապրիլի 1-ին։ Զուրաբիշվիլին նշել է, որ դրա նախօրեին Թբիլիսիում տեղի ունեցած բողոքի ակցիան «մեծ հույս է տվել» և հաստատել, որ կառավարության ռեպրեսիվ քաղաքականությունը չի կարող ճնշել բողոքի ակցիան։
Մարտի 31-ին Վրաստանի հինգերորդ նախագահ Սալոմե Զուրաբիշվիլին դիմել էր Թբիլիսիում ընթացող լայնամասշտաբ հանրահավաքի մասնակիցներին, հայտարարել, որ անհրաժեշտ է ստեղծել դիմադրության հարթակ՝ Վրաստանի եվրոպամետ կուսակցությունները համակարգելու համար։
Ըստ հինգերորդ նախագահի՝ այսօր Վրաստանում տեղի է ունենում «հերթական հարձակումը քաղաքական ընդդիմության վրա», իսկ հետապնդումները նոր փուլ են թևակոխում։
Ի՞նչ է ասել Սալոմե Զուրաբիշվիլին
«Ցանկանում եմ ձեզ ներկայացնել մեր առաջին հանդիպման արդյունքները։ Տեղի ունեցավ [ընդդիմության] համակարգումը, որի մասին հայտարարվել էր մեկ օր առաջ։ Այդ ժամանակ մենք պայմանավորվել էինք, որ պետք է համաձայնեցնենք դիրքորոշումները այն հիմնական մարտահրավերների և խնդիրների շուրջ, որոնք այսօր առկա են Վրաստանում։ Այժմ ուզում եմ ձեզ ներկայացնել այդ համաձայնեցված դիրքորոշումները՝ չբացառելով, որ հետագայում առանձին կուսակցություններ իրենց եզրակացությունները կներկայացնեն այլ ձևով։
Երեկվա հանրահավաքը մեզ մեծ հույս տվեց և հաստատեց, որ իշխանության ռեպրեսիվ քաղաքականությունը չի կարողացել և չի կարող ցրել բողոքի ակցիան։ Բողոքը կա, և երբ նրան հնարավորություն տրվի ավելի ուժեղ դրսևորվել, այդպես էլ կլինի։ Այն շարունակական է, և ոչ ոք ու ոչինչ չի կարող վախեցնել դրա մասնակիցներին և հանրությանը։
Քաղաքական սպեկտրի տարբեր ներկայացուցիչների վրա հերթական հարձակումը շարունակվում է, իսկ քաղաքական հետապնդումները թեւակոխում են նոր փուլ։ Մենք բոլորս համաձայն ենք, որ դա տեղի է ունենում, և պետք է դա հաշվի առնենք մեր համատեղ դիրքորոշումները ձևակերպելիս։ Կհետևենք, թե ինչ որոշումներ կկայացնի ներկայիս կառավարությունը, բայց մեզ ոչինչ չի վախեցնի։
Ապրիլի 7-ին կկայանա Եվրոպայի խորհրդի նիստը, որում հավանաբար, կոշտ բանաձև կընդունվի [Վրաստանի վերաբերյալ],, և առաջին պլանում կլինի քաղբանտարկյալների հարցը։ Թերևս [օրակարգում կլինեն նաև] վերջին օրերին ընդունված օրենքները, որոնք փորձում են շնչահեղձ անել բոլոր ոչ կառավարական կազմակերպություններին և քաղաքացիական հասարակությանը այնպիսի նախաձեռնությունների միջոցով, ինչպիսին է FARA-ն (ամերիկյան «Օտարերկրյա գործակալների գրանցման ակտի» վրացական համարժեքը): Բայց կան դրանց դեմ պայքարելու ուղիներ, և մենք աշխատում ենք այդ լուծումները գտնելու ուղղությամբ:
Ոչ մի դեպքում չպետք է ենթադրել, որ կառավարության կողմից նոր ռեպրեսիվ օրենքների ընդունումը նշան է, որ այն ինչ-որ կերպ ուժեղանում է: Ոչ, ընդհակառակը, բողոքն ուժեղանում է, որովհետև ավելի ու ավելի շատ մարդիկ են հասկանում, թե ինչ է անում այս իշխանությունը և ինչ ուղղությամբ է շարժվում, ավելի ու ավելի շատ մարդիկ են միանում մեր ուղերձին և այն ճանապարհին, որի մասին հայտարարել եմ և որն արտացոլում է այստեղ ներկայացված կուսակցությունների միասնական քաղաքականությունը։
Մենք [նոր խորհրդարանական] ընտրությունների ճանապարհին ենք՝ խաղաղ ճանապարհով։ Մենք հասնելու ենք ընտրությունների անցկացմանն ու քաղբանտարկյալների ազատ արձակմանը, բայց չենք ընտրելու այլ ճանապարհներ, որոնք կարող են լինել ինչ-որ մեկի գլխում։ Սա մեր ընդհանուր դիրքորոշումն է։ Մենք այստեղ ենք, որպեսզի լինենք խիզախ և միասնական, հանդես գանք նոր միասնության մեջ, դիմակայենք ռեժիմի բռնաճնշումներին և հասնենք մեր նպատակին»,- հայտարարել է Զուրաբիշվիլին։
Զուրաբիշվիլին` ընդդիմության կոորդինացման մասին
