«Պատրաստ եմ առաջադրվել երկրորդ ժամկետով»․ Վրաստանի նախագահի հարցազրույցը Le Figaro-ին
Զուրաբիշվիլիի հարցազրույցը Le Figaro-ին
Վրաստանի նախագահ Սալոմե Զուրաբիշվիլին հարցազրույց է տվել ֆրանսիական Le Figaro թերթին, պատմել երկրում տեղի ունեցող ընթացիկ իրադարձությունների մասին։ Ի թիվս այլ հարցերի` նա անդրադարձել է «օտարերկրյա գործակալների մասին» օրենքի ընդունմանը և հոկտեմբերի 26-ին կայանալիք խորհրդարանական ընտրություններին։ Լրագրողի այն հարցին, թե ինչպես է տեսնում իր ապագան պաշտոնավարման ժամկետի ավարտից հետո (այն լրանում է 2024 թ.-ի դեկտեմբերին), Զուրաբիշվիլին պատասխանել է, որ պատրաստ է իր վրա պատասխանատվություն վերցնել և առաջադրվել երկրորդ ժամկետով։
Պատասխանելով այն հարցին, թե ինչ է ակնկալում Ֆրանսիայից և Եվրամիությունից, Զուրաբիշվիլին ասել է, որ «նրանք պետք է ասեն և կրկնեն, որ այն, ինչ անում է Վրաստանի իշխանությունը, հակասում է եվրոպական ուղուն»։ Նա նաև ընդգծել է, որ պատժամիջոցների կողմնակից չէ։
Սալոմե Զուրաբիշվիլիի հարցազրույցի առանցքային կետերը
● «Ես պատրաստ եմ ինձ վրա մեծ պատասխանատվություն վերցնել, այդ թվում՝ երկրորդ ժամկետով, որպեսզի Վրաստանը վերադարձնեմ իր եվրոպական ուղուն։ Եթե իմ առաջարկած խարտիան ուժի մեջ մտնի, պատրաստ եմ լինել մեր եվրոպացի գործընկերների հետ բանակցող անձը։
Վրաստանը կանգնած է գոյաբանական ընտրության առջև՝ կհետևի՞ արդյոք իր եվրոպական ճակատագրին հոկտեմբերի 26-ին կայանալիք խորհրդարանական ընտրություններում, թե՞ կվերադառնա Ռուսաստանին ծառայելուն՝ Պուտինի ռեժիմի օրինակով մոդելավորված ռեժիմով։
● «Օտարերկրյա գործակալների մասին» օրենքն իզուր չեն անվանել «ռուսական օրենք». հենց այս օրենքով է Պուտինը իրեն ենթարկել քաղաքացիական հասարակությունը, և Վրաստանի իշխանությունների գործողությունները լիովին համապատասխանում են այն ամենին, ինչ անում է Պուտինը։
● Վրաստանի կառավարությունը փորձում է երկիրը կտրել Եվրոպայից և այն դնել Ռուսաստանի պրոտեկտորատի տակ։ Անցյալ տարվա գարնանը բնակչությունը զանգվածային ցույցերի միջոցով մերժեց այս օրենքն ու այս ուղղությունը։ Այժմ նրանք պետք է ապացուցեն դա ընտրությունների ժամանակ։
● Վրաստանի կառավարությունը կատարել է շատ հստակ ընտրություն՝ ի հօգուտ Մոսկվայի հետ մերձեցման։ Դա պարզ դարձավ Ուկրաինա լայնամասշտաբ ներխուժումից հետո։ Այդ ժամանակից ի վեր արևմտյան երկրների դիվանագիտական կորպուսի դեմ հարձակումները ստացան համակարգային բնույթ։
Կառավարությունը հրաժարվել է իր պատմական արևմտամետ դիրքորոշումից՝ հօգուտ Մոսկվայի հետ կապերի։ Հենց այս պատճառով են ռուսաստանցի առաջնորդները պարբերաբար շնորհավորում իրենց վրացի գործընկերներին նրանց որոշումների և հայտարարությունների կապակցությամբ։
● Դժվար է ասել՝ սա իշխող «Վրացական երազանք» կուսակցության նախաձեռնությո՞ւնն է, թե՞ Կրեմլի ճնշման արդյունքը։ Սակայն պարզ է, որ այս քաղաքականությունը թելադրում է օլիգարխ Բիձինա Իվանիշվիլին, որի հարաբերությունները Մոսկվայի հետ թափանցիկ չեն։
● Ես չեմ անի որևէ կանխատեսում, դա իմ խնդիրը չէ, բայց կարող եմ վստահաբար ասել, որ երկրի ապագա կայունությունը կախված է հոկտեմբերի 26-ին արևմտամետ ընդդիմության հստակ հաղթանակից։ Ես փորձում եմ բացատրել դա քաղաքական կուսակցություններին և ասել՝ հիմա մրցակցության ժամանակը չէ։
Այս ընդդիմությունը միասնական չի լինի՝ հաշվի առնելով ոչ վաղ անցյալը, բայց այն կարող է բավականաչափ միավորված լինել եվրոպական գաղափարի շուրջ՝ ստանալու համար ձայների 50 կամ 60 տոկոսը։
Իշխող կուսակցությունը գարնանային բողոքի ցույցերից հետո թուլացել է։ Հարցումների համաձայն՝ այն չի կարող ստանալ ձայների 25 տոկոսից ավելին։
● Պարադոքսն այն է, որ Վրաստանը երբեք այսքան մոտ չի եղել Եվրոպային, և հենց այս պահն են ընտրել որոշ ուժեր՝ խափանելու մեր այդ խորը ձգտումը։ Պահի պատմական լինելու գիտակցումն այնքան ուժեղ է, որ, ինչպես ցույց է տալիս վիճակագրությունը, 2024 թվականի առաջին վեց ամիսներին երկիրը լքող երիտասարդների թիվը նվազել է. նրանք գիտեն, որ պետք է այստեղ լինել և պայքարել, որպեսզի Վրաստանը չվրիպի։ Այս ընտրությունները կդառնան Վրաստանի եվրոպական ապագայի մասին հանրաքվե։
● [ԵՄ-ն և Ֆրանսիան] պետք է ասեն և կրկնեն՝ այն, ինչ անում է վրացական կառավարությունը, հակասում է եվրոպական ուղուն։ Այդ ճանապարհն անցնում է «օտարերկրյա գործակալների մասին» օրենքի և նմանատիպ այլ օրենքների չեղարկման միջով։ Ես պատժամիջոցների կողմնակից չեմ։ Դա կարող է սխալ մեկնաբանվել բնակչության կողմից, բայց դա մեզ չի խանգարում հայտարարել այն մասին, թե ինչ կլինի ընտրություններից հետո, եթե ռուսամետ կողմնորոշումը հաստատվի»։
