«Ֆրանսիան կօգնի պաշտպանել ՀՀ երկինքը»․ Փարիզում փաստաթղթեր են ստորագրվել
Զենքի մատակարարման պայմանագիր Ֆրանսիայի հետ
Հայաստանի պաշտպանության նախարարն աշխատանքային այցով Փարիզում է։ Ֆրանսիայի ռազմական գերատեսչության X-ի էջում հրապարակվել է գրառում, ըստ որի՝ նախաարարներ Սուրեն Պապիկյանն ու Սեբաստիեն Լըքորնյուն հանդիպում են «պաշտոնապես ձևակերպելու սպառազինության ձեռքբերումը, որը Հայաստանին թույլ կտա պաշտպանել քաղաքացիական բնակչությանը և ապահովել սահմանների պաշտպանությունը»։
Կողմերը պայմանագրի մանրամասները դեռևս չեն գաղտնազերծել։ Հայտնի չէ՝ ինչ ծավալի և տեսակի սպառազինության մասին է խոսքը, երբ և ինչ ճանապարհով է այն Հայաստան հասնելու։ Ֆրանսիայի Զինված ուժերի նախարարը նախօրեին հայտարարել էր՝ «կստորագրենք պայմանագիր, որը Հայաստանին թույլ կտա ապահովել իր երկնքի պաշտպանությունը»։ Երևանի հետ ռազմատեխնիկայի տրամադրման պայմանագիր կնքելու պատրաստակամության մասին դեռևս հոկտեմբերի սկզբին Երևանում հայտարարել էր նաև Ֆրանսիայի արտգործնախարարը:
Քաղաքական մեկնաբան Հակոբ Բադալյանն ասում է՝ նման պայմանագրի կնքումն անկասկած կարևոր իրողություն է Հայաստանի զինված ուժերի սպառազինության համալրման և արդիականացման, երկրի պաշտպանունակության բարձրացման տեսանկյունից: Մյուս կողմից նկատում է՝ կարևոր է հասկանալ, թե Հայաստանն ի դեմս Ֆրանսիայի փնտրում է նոր խնամակա՞լ, թե՞ քաղաքական կարևոր գործընկեր։
Քննարկելու են նաև «ռազմական համագործակցության որոշ էլեմենտներ»
ՊՆ նախարար Սուրեն Պապիկյանի՝ Ֆրանսիա կատարելիք այցի մասին գերատեսչությունը հրապարակել է կարճ հաղորդագրություն։ Տեղեկանում ենք, որ Պապիկյանի այցը մեկնարկել է նախօրեին, ֆրանսիացի գործընկերը՝ զինված ուժերի նախարար Սեբաստիեն Լըքորնյուն է հրավիրել։
Լրագրողներն այսօր այցի վերաբերյալ մանրամասներ են փորձել ճշտել նաև ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանից։ Նա հայտնել է, որ հանդիպման ընթացքում քննարկելու են բազմաթիվ հարցեր, այդ թվում՝ «ռազմական համագործակցության որոշ էլեմենտներ»։
Քոչարյանի դիտարկմամբ՝ 44-օրյա պատերազմը հուշել է, որ պետք է ունենալ ոչ միայն բարեկամներ, այլև այնպիսի հարաբերություններ, որոնք «առաջին հերթին միտված կլինեն մեր անվտանգային միջավայրը դարձնել ավելի ներառական, որպեսզի մեր երկրի կայունությանը առնչվող բոլոր հարցերը ստանան պատշաճ լուծումներ»։
Պայմանագիրը Հայաստանին թույլ կտա «ապահովել իր երկնքի պաշտպանությունը»
Նախօրեին Ֆրանսիայի Զինված ուժերի նախարար Լըքորնյուն «Le Parisien»-ի հետ զրույցում հայտնել էր․
«Վաղը մենք պաշտոնապես կձևակերպենք Հայաստանի կողմից ֆրանսիական արտադրողներից որոշակի քանակությամբ սպառազինության ձեռքբերումը, մասնավորապես՝ կստորագրենք պայմանագիր, որը Հայաստանին թույլ կտա ապահովել իր երկնքի պաշտպանությունը»։
Լըքորնյուն տեղեկացրել էր, որ Ֆրանսիան ուսումնասիրում է Հայաստանի պաշտպանական կարիքները և ընդգծել, որ «շատ կարևոր է հնարավորություն տալ Հայաստանին պաշտպանելու իր խաղաղ բնակչությանը և ապահովելու իր սահմանների պաշտպանությունը»:
Փորձագիտական կարծիք
Քաղաքական մեկնաբան Հակոբ Բադալյանի խոսքով՝ Հայաստանի և Ֆրանսիայի միջև ռազմատեխնիկական գործակցության պայմանագիրը, ըստ էության, նշանակում է հայ-ֆրանսիական քաղաքական հարաբերությունների նոր մակարդակ: 1in.am-ում հրապարակված իր հոդվածում նա գրել է՝ կարևոր է հասկանալ, թե բացի նշված պայմանագրից «հայ-ֆրանսիական միջպետական լայն հարաբերությունը իր այդ նոր մակարդակում ինչպիսի համալրում է ստանալու նաև քաղաքական բովանդակության իմաստով»:
«Սա է գլխավոր խնդիրը, որը կանխորոշելու է նաև հայ-ֆրանսիական քաղաքական հարաբերության նոր մակարդակի «միջազգային փոխարժեքը», դրանում Հայաստանի սուբյեկտության ծավալը, ըստ այդմ՝ ձևավորելով նաև այդ հարաբերության նոր մակարդակի հանդեպ այլ խաղացողների ուշադրության և հետաքրքրության ելակետերը»,- նշել է նա։
Քաղաքական մեկնաբանի գնահատմամբ՝ Ֆրանսիան Հայաստանի հետ գործակցության աստիճանը խորացնում է իր ռազմավարական պատկերացումների, շահերի, հետաքրքրությունների հիմքով։ Կարծում է՝ դա ենթադրում է, որ «Հայաստանն էլ հանդիպակաց դիրքորոշում պետք է ձևավորի իր բովանդակությամբ։
Առանցքային հարցերն, ըստ Բադալյանի, այս երկուսն են՝
- «Հայաստանն՝ ի դեմս Ֆրանսիայի փնտրում է նոր խնամակա՞լ, թե՞ քաղաքական կարևոր գործընկեր,
- հայկական քաղաքական ներկայիս վերնախավն ունա՞կ է Ֆրանսիայի հետաքրքրությունների սպառող լինելու փոխարեն լինել այդ հետաքրքրությունների գործընկեր»։
Նկատում է՝ եթե Երևանը Փարիզի հետ իր հարաբերությունները կառուցի համարժեք քաղաքական բովանդակության, այն է՝ լրջամիտ բովանդակության ու ռազմավարության վրա, այդ կերպ կձևավորի նաև «քաղաքական այդ գործոնի միջոցով գործընկերային այլ ուղղությունների նոր մակարդակի և հնարավորության նախադրյալ»։
Հետևեք մեզ — Facebook | Youtube | Telegram
Զենքի մատակարարման պայմանագիր Ֆրանսիայի հետ
