Աշխարհաքաղաքական իրավիճակը՝ ՀՀ-ում զբոսաշրջիկների թվի նվազման պատճառ․ կարծիք Երևանից
Զբոսաշրջիկների թվի նվազում Հայաստանում
2024 թ․-ի հունիսին Հայաստան է այցելել 180,718 զբոսաշրջիկ՝ նախորդ տարվա 199,159-ի փոխարեն, իսկ մայիսին՝ 167,049, մինչդեռ 2023 թ․-ին նրանց թիվը կազմել է 176,384։ Փորձագետներն այս նվազումը պայմանավորում են մի շարք հանգամանքներով՝ գների բարձրացումից մինչև աշխարհաքաղաքական անկայուն իրավիճակ։
Տուրիզմի hայկական ֆեդերացիայի նախագահ Մեխակ Ապրեսյանի խոսքով՝ պակաս կարևոր չէ նաև այն, որ մի շարք երկրների իրավասու գերատեսչությունների կայքերում Հայաստանը ներկայացվում է «կարմիր սահմանագծեր»-ով, այսինքն՝ որպես ոչ անվտանգ երկիր:
«Համապատասխան ընկերությունները զբոսաշրջիկներին ապահովագրություն չեն տրամադրում՝ պատճառաբանելով հենց այդ հանգամանքը»,- շեշտել է Ապրեսյանը։
Նախորդ տարիներին՝ շեշտակի աճ, այժմ՝ նվազում
Տուրիզմի hայկական ֆեդերացիայի նախագահ Մեխակ Ապրեսյանի խոսքով՝ պաշտոնական ցուցանիշները ցույց են տալիս, որ 2024 թ․-ի առաջին կիսամյակում նախորդ տարվա համեմատ գրանցվել է զբոսաշրջային այցելությունների մոտ 5 տոկոս նվազում։
«Արմենպրեսի» հետ զրույցում նա հիշեցրել է՝ նախորդ տարիներին շեշտակի աճ էր գրանցվել․
«2022 թվականին 2021 թ․-ի նկատմամբ կրկնակի աճ էր գրանցվել, իսկ 2023 թ․-ին 2022 թ․-ի նկատմամբ՝ գրեթե 40 տոկոսով»։
Ասում է՝ եթե նույնիսկ սեպտեմբեր-հոկտեմբեր ամիսներին զբոսաշրջիկների ակտիվություն նկատվի, տարեկան ցուցանիշը բացասական չլինի, միևնույն է՝ «մտածելու տեղ ունենք»։
Ի՞նչ գործոններ են ազդել նվազման վրա
Մեխակ Ապրեսյանի դիտարկմամբ՝ զբոսաշրջիկների թվի նվազման վրա զգալի ազդեցություն են ունեցել մի շարք գործոններ, այդ թվում՝ գների բարձրացումը։ Ասում է՝ բացի աշխարհում տեղի ունեցող ընդհանուր գնաճից, Հայաստանում անհարկի բարձրացել են առանձին ծառայությունների գները․
«Տեսնելով, որ լավ, դինամիկ աճում է տուրիզմը՝ որոշեցին, որ կարելի է միանգամից հարստանալ, և գներ բարձրացվեցին։ Դա տեղի ունեցավ և՛ մասնավոր հատվածում, և՛ պետական, օրինակ՝ թանգարաններում»։
Տուրիզմի hայկական ֆեդերացիայի նախագահի փոխանցմամբ՝ մյուս գործոնը արտարժույթի նկատմամբ հայկական դրամի մոտ 30 տոկոս արժևորումն էր։
«Ըստ էության, Հայաստանում զբոսաշրջային արդյունքն առնվազն 50 տոկոսով թանկացել է։ Սա արդեն պետք է ահազանգ լինի, և մտածենք գնային քաղաքականությունը կարգավորելու, խելամիտ ու ողջամիտ լինելու մասին»,- պարզաբանել է նա։
Ասում է՝ գների անհարկի բարձրացումը կմեղմվի, եթե ընդունվի «Հարկային օրենսգրքում փոփոխություն և լրացում կատարելու մասին» շրջանառվող օրինագիծը։ Այն ենթադրում է ներգնա զբոսաշրջային փաթեթի իրացման նկատմամբ ավելացված արժեքի հարկի զրոյական դրույքաչափի կիրառում:
Փորձագետի գնահատմամբ՝ փոփոխություններ իրագործելիս կառավարությունը պետք է հաշվի առնի զբոսաշրջության ոլորտի առանձնահատկությունները, հակառակ դեպքում «կարող է էական վնաս հասցնել ոլորտին»։
Շեշտում է՝ զբոսաշրջության ոլորտի համար պետք է սահմանվեն առանձին հարկատեսակներ։
«Պետք է լինի շրջանառության հարկ՝ ոչ ավել քան 5 տոկոս տոկոսադրույքով, որովհետև մեր տրանսպորտային ծառայության գները էապես բարձրացել են՝ պայմանավորված վառելիքի թանկացմամբ։ Իսկ տրանսպորտային ծառայությունը զգալի մաս է կազմում զբոսաշրջային փաթեթում»,- նկատել է Ապրեսյանը։
Հայաստանի վարկանիշը՝ «ոչ անվտանգ» երկիր
Նրա դիտարկմամբ՝ զբոսաշրջության ոլորտի վրա բացասաբար է ազդում նաև տարածաշրջանում և աշխարհում տիրող անկայուն աշխարհաքաղաքական իրավիճակը, Հայաստանի վարկանիշը։
Փորձագետի փոխանցմամբ՝ տարբեր վարկանիշային պարբերականներ Հայաստանը ներկայացնում են դրական տեսանկյունից՝ ամենաապահով երկրների առաջին տասնյակում, նույնիսկ՝ եռյակում, ինչպես նաև որպես գրավիչ երկիր, բայց դա ամբողջական պատկերը չէ։
«Նպատակային շուկա հանդիսացող ԱՄՆ-ի, եվրոպական երկրների, Ճապոնիայի իրավասու գերատեսչությունների կայքերում մեր երկիրը ներկայացվում է «կարմիր սահմանագծեր»-ով, այսինքն՝ ոչ անվտանգ երկիր: Դա իր բացասական ազդեցությունն է ունենում ինչպես ընդհանուր, այնպես էլ կազմակերպված տուրիզմի վրա»,- պարզաբանել է նա։
Հետևեք մեզ — Facebook | Youtube | Telegram
Զբոսաշրջիկների թվի նվազում Հայաստանում
