«Ադրբեջանի գրեթե ողջ արտահանումն ապահովում է 31․400 մարդ». տնտեսագետ
Զբաղվածության վիճակագրություն Ադրբեջանում
Ադրբեջանում մասնավոր հատվածում աշխատողների թիվն առաջին անգամ գերազանցել է պետական հատվածում զբաղվածների թվին։ Այդ մասին հայտարարել է Էկոնոմիկայի նախարար Միքայիլ Ջաբարովը։ Սակայն տնտեսագետ, ընդդիմադիր «Հանրապետական այլընտրանք» կուսակցության առաջնորդներից Նաթիկ Ջաֆարլին պնդում է, որ պաշտոնական վիճակագրությունը հակառակն է ցույց տալիս։ «Երկրի տնտեսական մոդելն այնքան անարդյունավետ է, որ երկիրն իր կենսագործունեությունն ապահովում է միայն 31․400 հազար մարդու հաշվին»,- հավելել է Ջաֆարլին։
- Սարսափելի հանցագործություն Բաքվում․ երիտասարդը սպանել է իր ընտանիքի հինգ անդամներին
- «Երևանի և Բրյուսելի կապերն ավելի ամուր են, քան երբևէ»․ Բորել
- Ո՞վ է Վրաստանի նոր վարչապետը. փաստեր Իրակլի Կոբախիձեի մասին
«Միքայիլ Ջաբարովն ասել է, որ 2023 թվականին Ադրբեջանում ոչ նավթային և մասնավոր հատվածներում զբաղվածների թիվը գերազանցել է նավթային և պետական կազմակերպություններում աշխատողների թվին։
Սակայն պետական վիճակագրական կոմիտեն պաշտոնապես հայտարարել է, որ 2024 թվականի սկզբին զբաղվածների թիվը կազմել է 1741,8 հազար մարդ, այդ թվում՝ 899,1 հազարը՝ պետական հատվածում, 842,7 հազարը՝ ոչ պետական։
Այլ կերպ ասած՝ պաշտոնական վիճակագրությունն ցույց է տալիս, որ 2023 թվականի վերջի դրությամբ պետական և նավթային ոլորտներում զբաղված է եղել 56 հազար 400-ով ավելի շատ մարդ, քան մասնավոր հատվածում։ Հիմա ո՞վ է ճիշտ։ Նախարարը՞, թե՞ վիճակագրության պետական կոմիտեն»,- իր փաստարկներն է բերում տնտեսագետ, «Հանրապետական այլընտրանք» ընդդիմադիր կուսակցության առաջնորդներից Նաթիկ Ջաֆարլին։
Ի՞նչ է ասել նախարարը
2023 թվականին Ադրբեջանում մասնավոր և ոչ նավթային հատվածներում զբաղվածների թիվը գերազանցել է պետական և նավթային հատվածներում աշխատողների թվին։
Ինչպես տեղեկացնում է Report-ը, այդ մասին Բաքվում կայացած «Հարկային համակարգը զարգացման նոր ժամանակաշրջանում. ռազմավարական նպատակներ կայուն տնտեսության համար» ֆորումի ընթացքում ասել է էկոնոմիկայի նախարարի պաշտոնակատար Միքայիլ Ջաբարովը։
«2019 թվականին, երբ մենք սկսեցինք իրականացնել խթանող հարկային քաղաքականություն, ավելի քան 850 հազար հոգի աշխատում էր պետական ձեռնարկություններում։ Հինգ տարվա հաջող աշխատանքի արդյունքում մասնավոր հատվածում զբաղվածների թիվը գերազանցեց պետական հատվածում աշխատողների թվին։ Այս տարիների ընթացքում հարկային ոլորտի աշխատակիցները սկսեցին ավելի բարձր չափանիշներով մոտենալ իրենց պարտականությունների կատարմանը»,- ընդգծել է նա։
Տնտեսագետի մեկնաբանությունը
Նաթիգ Ջաֆարլիի խոսքով՝ «երկրում տիրող ողբերգական տնտեսական իրավիճակը» արտացոլող մեկ այլ ցուցանիշ էլ այն է, որ զբաղվածների բաշխվածությունն ըստ տնտեսական ոլորտների «լուրջ նշանակություն չունի»։
«Պատկերացրեք՝ երկրի նավթագազային ոլորտում աշխատում է ընդամենը 31 հազար 400 մարդ, սակայն, ըստ 2022 թվականի վիճակագրության, երկրի ՀՆԱ-ի 47,8 տոկոսը, բյուջեի շահույթի 52,7 տոկոսը և, վերջապես, արտահանման 92,5 տոկոսը ստացվում է նավթագազային ոլորտի արտադրանքից։
Այսինքն՝ 31 հազար 400 մարդ ապահովում է պետբյուջեի շահույթի կեսից ավելին և երկրի արտահանման ճնշող մեծամասնությունը։ Սա ողբերգական պատկեր է։ Երկրի տնտեսական մոդելն այնքան անարդյունավետ է, որ երկիրն իր կենսագործունեությունն ապահովում է միայն 31 հազար 400 մարդու հաշվին։
Պարոն նախարար, ինչպե՞ս կբացատրեք սա, կլինի՞ բացատրություն»,- սոցցանցի իր էջում գրել է Ջաֆարլին։
