Ուժի մեջ է մտել երկկողմանի առանց վիզայի ռեժիմ Հայաստանի և Վրաստանի քաղաքացիների համար

երկկողմանի առանց վիզայի ռեժիմ Հայաստանի և Վրաստանի քաղաքացիների համար

Վրաստանի ԱԳՆ փոխանցմամբ՝ Վրաստանի և Հայաստանի միջև ուժի մեջ է մտել քաղաքացիների՝ առանց վիզայի երկկողմանի տեղաշարժի մասին համաձայնագիրը։

Այժմ Վրաստանի և Հայաստանի քաղաքացիներն իրավունք ունեն նույնականացման քարտերով տեղաշարժվել սահմանից այս և այն կողմ անցակետով, որը նախատեսված է միջազգային ուղևորությունների համար։

Վրաստանի և Հայաստանի վարչապետներ Իրակլի Ղարիբաշվիլին և Նիկոլ Փաշինյանը 2023 թվականի հունվարի 12-ին Երևանում ստորագրել էին համաձայնագիր երկու երկրների քաղաքացիների համար սահմանները հատելու գործընթացը պարզեցնելու վերաբերյալ։

«Համաձայնագիրն ուղղված է Վրաստանի և Հայաստանի քաղաքացիների փոխադարձ տեղաշարժի համար էլ ավելի բարենպաստ պայմաններ ապահովելուն»,- ասված է Վրաստանի ԱԳՆ հաղորդագրության մեջ։

Նոր համաձայնագիրը փոխարինում է 1993 թվականի մայիսի 19-ին ստորագրված «Վրաստանի Հանրապետության և Հայաստանի Հանրապետության քաղաքացիների՝ առանց վիզայի ռեժիմի տեղաշարժի մասին» համաձայնագրին։

• Ռուսաստանի փոխարեն՝ Թուրքիա և Ադրբեջան։ Իսկ Վրաստա՞նը
• Հայաստան-Վրաստան․ «մածնային» կրքեր
• Կարծիք․ ինչո՞ւ են Հայաստանն ու Վրաստանը միմյանց պետք

Այս տարվա հունվարի 12-ին Վրաստանի և Հայաստանի վարչապետները ստորագրել էին երկու երկրների քաղաքացիների համար Վրաստանի և Հայաստանի միջև սահմանային անցման հետագա պարզեցման մասին փաստաթուղթ, ըստ որի՝ Հայաստանի Հանրապետության և Վրաստանի քաղաքացիները կկարողանան սահմանները հատել նույնականացման քարտերով.

«Այսօրվա օրակարգը շատ լայն է և ներառում է տարբեր ոլորտներ՝ տրանսպորտ, կապ, տեխնոլոգիաներ, առողջապահություն, գյուղատնտեսություն և այլն: Համոզված եմ, որ հանդիպման ընթացքում ձեռք բերված պայմանավորվածությունները նոր լիցք կհաղորդեն հայ-վրացական հարաբերություններին»,- այդ ժամանակ ասել էր Նիկոլ Փաշինյանը:

Հայաստանի վարչապետը նաև նշել էր, որ 2022 թվականի հունվար-նոյեմբերին երկու երկրների միջև ապրանքաշրջանառությունն աճել է շուրջ 70 տոկոսով։