ՀՀ արևմտամետ ուժերը հավաքել են անհրաժեշտ ստորագրությունների կեսից ավելին․ Եվրաքվեի մասին
Եվրաքվեի նախնական արդյունքները
Սեպտեմբերի 16-ից Երևանի վարչական շրջաններում և Հայաստանի բոլոր մարզերում ընթանում է ստորագրահավաք ՀՀ՝ Եվրամիության անդամակցության մասին հանրաքվեի անցկացնելու հարցով։ Նախաձեռնությունը արևմտամետ ուժերից ձևավորված «Ժողովրդավարական ուժերի հարթակ»-ինն է։ Այսօր նախաձեռնող խմբի անդամները մամուլի ասուլիս են հրավիրել և ներկայացրել ստորագրահավաքի առաջին 15 օրվա արդյունքները։
«Արդեն իսկ ունենք 27․560 ստորագրություն, ինչը 55․12 տոկոսն է այն 50 հազար ստորագրության, որը մեզ անհրաժեշտ է հավաքագրել»,- հայտնել է խմբի անդամներից Հովսեփ Խուրշուդյանը։
Նրա փոխանցմամբ՝ ստորագրությունների մեծ մասը՝ 58․5 տոկոսը հավաքագրվել է մայրաքաղաք Երևանում, մարզերից առավել ակտիվ են եղել Շիրակի, Արարատի, Կոտայքի, Արագածոտնի և Գեղարքունիքի մարզերը։ Ստորագրահավաքի համար նախատեսաված է ընդհանուր առմամբ 60 օր։
Մի քանի ամիս է, ինչ Հայաստանում ակտիվորեն քննարկվում է ԵՄ-ին անդամակցելու հարցով հանրաքվե անցկացնելու հնարավորությունը։ Հունիսի վերջին նույնիսկ խորհրդարանական լսումներ տեղի ունեցան։ Իշխող ուժը, սակայն, այդ քննարկումները վաղաժամ է համարում և շեշտում՝ «հանրաքվեն անդամակցության գործընթացի վերջին փուլն է», իսկ ՀՀ-ն Եվրամիությանն անդամակցելու պաշտոնական հայտ դեռևս չի ներկայացրել։
Այնուամենայնիվ, ՀՀ մի շարք արտախորհրդարանական ուժեր, որոնք կողմ են երկրի եվրաինտեգրմանը, սեպտեմբերի սկզբին դիմեցին Կենտրոնական ընտրական հանձնաժողով, որպեսզի ստանան Հայաստանի՝ Եվրամիությանն անդամակցելու հարցով հանրաքվե անցկացնելու համար ստորագրահավաք իրականացնելու թույլտվություն:
Նախաձեռնող խումբը պետք է հավաքի 50 հազար ստորագրություն՝ իր հեղինակած օրինագիծը Ազգային ժողով ներկայացնելու համար։ Սահմանադրության համաձայն՝ անհրաժեշտ քանակի ստորագրություններ հավաքելու համար նրանք ունեն 60 օր ժամանակ։ Եթե օրինագիծը մտնի խորհրդարան, բայց իշխող մեծամասնությունը դեմ քվեարկի դրան, օրինագիծը կրկին խորհրդարան բերելու համար խումբը պետք է հավաքի ևս 300 հազար ստորագրություն և նորից 60-օրյա ժամկետում։ Այս պարագայում, սակայն, ստորագրահավաքին մասնակցելու իրավունք չեն ունենա այն անձինք, որոնք արդեն իսկ մասնակցել են ստորագրահավաքի առաջին փուլին (50 հազար ստորագրողները)։
Մտադիր են ստորագրությունները հավաքել 1 ամսում
Նախաձեռնող խմբի անդամ, քաղաքական վերլուծաբան Հովսեփ Խուրշուդյանի խոսքով՝ գոհ են ստորագրահավաքի ընթացքից, արձանագրվել են «բավականին լավ ցուցանիշներ»։ Խուրշուդյանը հույս ունի, որ անհրաժեշտ 50 հազար ստորագրությունները կունենան ոչ թե 60-օրյա, այլ 30-օրյա ժամկետում։ Շեշտում է՝ այդ կերպ հայ հասարակությունը ցույց կտա «իր կամքը, վճռականությունը, վերաբերմունքը այս գործընթացին»։
Նախաձեռնող խումբը բաղկացած է 51 հոգուց։ Խմբի անդամներից Արտակ Զեյնալյանը նույնպես կարևորում է ստորագրությունները հնարավորինս արագ հավաքելը․
«Մեր շուրջ դեպքերի զարգացումը շատ արագ է տեղի ունենում։ Որքան արագ կարողանանք այս օրենքն առաջադրել ԱԺ-ին, այնքան մեր հնարավորություններն ավելի մեծ կլինեն»,- ընդգծում է Զեյնալյանը։
Ասում է՝ մարդիկ ոչ թե գնում են շանտաժի ճանապարհով, օրինակ՝ շենքերի պաշարման, այլ դիմում են իրավական մեխանիզմների․
«Ուստի Ազգային ժողովը պարտավոր է կատարել իր լիազորությունները՝ ապահովել հարցի քննարկումը։ Սա քաղաքակիրթ և իրավական պրոցես է։ Մարդիկ ազատորեն դրսևորում են իրենց կամքն ու արտահայտվելու ազատության իրավունքը, մասնակցում են պետական և տեղական ինքնակառավարմանը»։
«Ոչ աշխատանքային օրերը ևս պետք է ընդգրկված լինեն այդ 60 օրվա մեջ»
Լրագրողների հետ զրույցում նման արձանագրում է արել Արտակ Զեյնալյանն ու հավելել, որ այդ հարցի հետ կապված տարաձայնություններ ունեն նաև Կենտրոնական ընտրական հանձնաժողովի հետ․
«Նրանք գտնում են, որ դա յուրաքանչյուր կոնկրետ համայնքի հայեցողության շրջանակներում է։ Մի շարք համայնքներում, այդ թվում՝ Երևանում, Վանաձորում, Գյումրիում շաբաթ-կիրակի օրերին ապահովել են ստորագրությունների ընդունումը»։
Խնդիր է նաև այն, որ մինչս օր քաղաքացիները չունեն էլեկտրոնային եղանակով ստորագրահավաքին միանալու հնարավորություն։ Մինչ օրս ընդամենը 345 քաղաքացի է էլեկտրոնային ստորագրել։
Նախաձեռնող խմբի հայտնած տեղեկությունների համաձայն՝ ներկա պահին նման հնարավորություն ունեն միայն այն քաղաքացիները, որոնք ունեն հին նմուշի՝ չիպ ունեցող նույնականացման քարտեր, ընթերցող սարքեր և համապատասխան ծրագիր։
«ԿԸՀ-ն հիմա աշխատում է էլեկտրոնային հարթակի ծրագրային ապահովման վրա, որի արդյունքում անձինք կկարողանան իրենց բջջային հեռախոսների միջոցով ստորագրել»,- պարզաբանել է Զեյնալյանն ու նշել՝ այդ հարթակը պատրաստ կլինի 7-10 օրվա ընթացքում։
«Իշխանությունների մոտեցումը կրավորական է»
Խուրշուդյանի խոսքով՝ Հայաստանի իշխանությունների մոտեցումը կրավորական է, ոչ այո են ասում, ոչ՝ ոչ․
«ՀՀ իշխանությունները հիմա ավելի շատ սպասում են միջազգային ասպարեզում ինչ-որ իրադարձությունների, այդ թվում՝ Վրաստանի, ԱՄՆ ընտրությունների արդյունքներին, ինչից հետո, ըստ իրենց, ավելի ազատ կլինեն՝ կողմնորոշվելու՝ ընդունել կամ մերժել այս օրենքի նախագիծը»։
Քաղաքական վերլուծաբանի գնահատմամբ՝ պետք է հասցնել մինչ այդ միջազգային քաղաքական ասպարեզում դիրքավորել Հայաստանը։
Ասուլիսի ընթացքում Հովսեփ Խուրշուդյանը իշխանություններին կոչ է արել արտաքին քաղաքական իրադարձությունների հետ չկապել իրենց նախաձեռնած գործընթացը։
«Միջազգային պայմանագրի հանրաքվեն այլ է լինելու»
Կենտրոնական ընտրական հանձնաժողովում նախաձեռնող խմբի լիազոր ներկայացուցիչ, իրավաբան Արտակ Զեյնալյանի խոսքով՝ այս օրենսդրական նախաձեռնությունը բացառապես ԵՄ-ին ՀՀ անդամակցության գործընթացի մեկնարկն ազդարարելու համար է։
Զեյնալյանի փոխանցմամբ՝ սա չի փոխարինում այն հանրաքվեին, որը պետք իրականացվի ավելի ուշ՝ միջազգային պայմանագիր ստորագրելիս․
«Բնականաբար, պետք է լինի անդամակցության հայտ, համապատասխանեցում, մոտարկում [ԵՄ ստանդարտներին], այնուհետև անդամության թեկնածուի կարգավիճակի ստացում։ Դրանից հետո, երբ ստորագրվի միջազգային պայմանագիրը, այն պարտադիր կերպով պետք է դրվի հանրաքվեի հետևյալ հարցով՝ «Համաձա՞յն եք արդյոք անդամակցել ԵՄ-ին»,- պարզաբանել է նա։
Վստահեցնում է՝ օրենքի նախագիծը, որն ինքն է հեղինակել, ոչ մի խոչընդոտ չի ստեղծում ՀՀ համար և ապահովում է բավարար ճկունություն։
Հետևեք մեզ — Facebook | Youtube | Telegram
Եվրաքվեի նախնական արդյունքները
