«Ես իմ բիզնեսը փոխանցել եմ ընտանիքիս անդամներին»․ Իլհամ Ալիևը՝ «Պանդորայի փաստաթղթերի» մասին
«Այն, ինչ հրապարակվել է, միայն 5 տոկոսով է համապատասխանում իրականությանը», — հայտարարել է Ադրբեջանի նախագահ Իլհամ Ալիևը՝ մեկնաբանելով պնդումները, որոնք առկա են «Պանդորայի փաստաթղթերում»։ La Repubblica իտալական թերթին տված իր հարցազրույցում նա իր վերաբերմունքն է արտահայտել Արցախում ռուս խաղաղապահների տեղակայմանը, ինչպես նաև խոսել է Իրանի հետ հարաբերությունների սրման մասին։
Արցախում տեղակայված խաղաղապահների մասին
«Մոտ մեկ տարի է, ինչ ավարտվել է պատերազմն, ու ռուս խաղաղապահները տեղակայված են մեր տարածքում՝ Ղարաբաղում։ Բացառությամբ մի քանի փոքր միջադեպերի, իրավիճակը կայուն է, և մենք, ընդհանուր առմամբ, գոհ ենք դրանից։
Իհարկե, կան հարցեր, որոնք լուծում են պահանջում։ Հատկապես արտասահմանցիների հարցը, որոնք այցելում են խաղաղապահների պատասխանատվության գոտի, բայց պետք է մեր երկիր մտնեն մեր թույլտվությամբ։ Նրանք այդ շրջան այցելում են ապօրինի։ Մենք Ռուսաստանի պատկան մարմինների՝ ՊՆ ուշադրությունն ենք հրավիրել այն հարցին, որ դրան պետք է վերջ տրվի», — հայտարարել է Ալիևն իր հարցազրույցում։
- Ադրբեջանում ընդդիմադիր շարժումն իշխանությունից հաշվետվություն է պահանջել է «Պանդորայի փաստաթղթերի» վերաբերյալ
- Հարաբերությունների սրացում Ադրբեջանի և Իրանի միջև։ Ի՞նչ է կատարվում
- «ԱՄՆ-ն ու Ֆրանսիան Ռուսաստանի դեմ աշխարհաքաղաքական պայքար են մղում Հայաստանի համար»․ մեկնաբանություն Բաքվից
Իրանի հետ հարաբերությունների մասին
Ադրբեջանի նախագահի կարծիքով՝ Իրանի հետ հարաբերություններում առկա լարվածությունը «կապված չէ որոշ այլ պետությունների հետ հարաբերությունների հետ, քանի որ մեր արտաքին քաղաքականությունը շատ բաց է, թափանցիկ, կայուն և անկախ։ Ոչ մի երկիր չի կարող ազդել Ադրբեջանի որոշումների վրա և չպետք է ձգտի դա անել»։
«Պատճառը շատ պարզ է․ Ադրբեջանը ուզում է, որ հարգալից վերաբերմունք լինի իր սահմանների նկատմամբ։ Ղարաբաղի ազատագրումից հետո մենք հասել ենք Հայաստանի հետ մեր սահմանին։ Տեղակայվել ենք այնտեղ։ Հայաստանի որոշ քաղաքների միջև ճանապարհն անցնում է Ադրբեջանի տարածքով։ Մենք տեսել ենք, որ այդ ճանապարհով ապօրինի բեռներ են տարվում Ղարաբաղ՝ մեր տարածք։ Դա անթույլատրելի է։ Մենք ապօրինի կերպով չենք խախտում որևէ երկրի սահմանը։ Այսպիսով, մեր մեսիջը շատ պարզ է․ դադարեցրեք դա։ Մենք սա բարեկամաբար խնդրել ենք՝ առանց հանրությանն իրազեկելու։ Սակայն, ցավոք, խելամիտ պատասխան չենք ստացել։
Հետո մենք ստիպված եղանք երկրորդ քայլն անել։ Դիվանագիտական նոտա պատրաստեցինք, դեսպանին կանչեցինք և հանրությանն իրազեկեցին այդ մասին։ Սակայն իրականում դա էլ ավելի վատ ձև ստացավ։ Իրանից Ղարաբաղ ուղևորվող բեռնատարների քանակն ավելացավ։ Մենք դա գնահատեցինք որպես անհարգալից վերաբերմունք մեր նկատմամբ։
Այնուհետև լիովին օրինական միջոցներ ձեռնարկեցինք, և դա հանգեցրեց հարևան երկրի անհարկի արձագանքին։ Անտեղի հայտարարություններ, սպառնալիքներ հնչեցին, մեր սահմանի մոտ զորավարժություններ անցկացվեցին։ Ոչ ոք չի կարող մեզ իր կամքը թելադրել։
Մենք հերքում ենք Ադրբեջանի ազատագրված տարածքներում Իսրայելի ներկայության վերաբերյալ բոլոր մեղադրանքները։ Դրանք մտացածին են։ Բոլորը կարող են գալ և տեսնել, որ այնտեղ կյանք չկա։ Ամեն ինչ ավերված է։ Եվ մենք նույն հարգալից վերաբերմունքն ենք պահանջում մեր նկատմամբ, որով մենք վերաբերվում ենք ուրիշներին», — հավելել է նա։
«Պանդորայի փաստաթղթերի» մասին
Պատասխանելով աղմկահարույց «Պանդորայի փաստաթղթերում» հրապարակված փաստերի վերաբերյալ իտալացի լրագրողի հարցին՝ Ալիևն ասել է․
«Այդ հարցերն ինձ ուղեկցում են երկար տարիներ։ Կախված քաղաքական կոնյունկտուրայից՝ Արևմուտքում որոշ ուժեր փորձում են նման զրպարտող նյութերն օգտագործել Ադրբեջանի դիրքերը թուլացնելու, նրան վարկաբեկելու համար։ Պարզ է, որ դա լրագրողական հետաքննություն չէ։ Պարզ է, թե ով է կանգնած դրա հետևում։ Պարզ է, թե ինչու է դրանում ներառված Ադրբեջանը։ Մյուսների մասին ոչինչ չգիտեմ։ Մենք գիտեինք, որ Ադրբեջանի դեմ այսպիսի արշավներ են պլանավորվում պատերազմում հաղթանակ տանելուց հետո։
Ինչ վերաբերում է հենց այդ թեմային, ապա ես արդեն 18 տարի է, ինչ նախագահ եմ։ Դրանից առաջ գործարար էի, բիզնեսով էի զբաղվում։ Իմ կենսագրությունը հայտնի է։ Ընդ որում, ես հաջողակ գործարար եմ եղել։ Երբ նախագահ եմ ընտրվել, արդեն բնավ աղքատ չէի։
Դրանից հետո ես դադարեցի մասնակցել բիզնեսին և այն փոխանցեցի ընտանիքիս անդամներին։ Գուցե դուք ինձ հասկանաք, ի տարբերություն Արևմուտքի շատ այլ անձանց, որոնք իրենց ողջ ունեցվածքը ժառանգում են իրենց կատուներին և շներին, Իտալիայում և Ադրբեջանում նախընտրում են ընտանեկան արժեքները։ Այդ պատճառով էլ ես իմ ողջ բիզնեսը փոխանցել եմ երեխաներիս։ Նրանք ջանում և զարգացնում են այն։
Նրանց ներդրումները հիմնականում Ադրբեջանում են։ Բայց Ադրբեջանի սահմաններից դուրս էլ են լինում։ Նրանց ողջ գործունեությունը թափանցիկ է և միջազգային մակարդակի աուդիտ է անցնում, և ոչ ոք չի կարող պնդել, որ այդտեղ մի բան այն չէ։
Այն ամենը, ինչ գրված է այդ փաստաթղթերում, ես, անկեղծ ասած, չեմ կարդացել։ Ինձ հաղորդել են, և դրանցում հրապարակված տվյալների գուցե 5 տոկոսն է ճիշտ։ Մնացածը սուտ է։
Սակայն ես օրինական իրավունք ունեմ այդ մասին ևս մեկ անգամ բացահայտ ասելու։ Ադրբեջանում գաղնիք չէ, որ իմ հարազատներն ու ընտանիքի անդամները մասնակցում են բիզնեսին, բարեգործությանն ու շատ այլ աշխատանքների, որոնք այժմ անցկացվում են Ղարաբաղում»։
