ՌԴ սահմանապահները խոչընդոտել են ԵՄ դիտորդների մուտքը Ներքին Հանդ․ ինչո՞ւ
ԵՄ դիտորդները Ներքին Հանդ մուտք չունեն
Հայաստանի Սյունիքի մարզի Ներքին Հանդ բնակավայրի հատվածում ներկայություն ունեն ՌԴ սահմանապահները, որոնք «չեն կարողացել կանխել միջադեպը»։ Նման հայտարարությամբ է հանդես եկել ՀՀ Անվտանգության խորհրդի քարտուղարը։ Փետրվարի 13-ին այդ ուղղությամբ ադրբեջանական բանակի ձեռնարկած գործողությունների արդյունքում հայկական կողմը 4 զոհ ունեցավ։
«ԵՄ դիտորդական առաքելությունն այդ հատվածին հասանելիություն չի ունեցել»,- շեշտել է ԱԽ քարտուղար Արմեն Գրիգորյանը։
Տեղեկությունը հաստատել է նաև առաքելության ղեկավար Մարկուս Ռիտերը։ ԹԵ ո՞րն է սահմանափակման պատճառը՝ ոչ պաշտոնական Երևանը, ոչ էլ առաքելությունը չեն մեկնաբանել։ Ռիտերը նշել է, որ այդ հարցով Հայաստանը պետք է զբաղվի՝ շեշտելով, որ իրենք «հյուրի կարգավիճակով են» այստեղ։
Ռազմական հարցերով փորձագետ Կարեն Հովհաննիսյանն ասում է՝ առանց հայկական կողմի համաձայնության երկրի սուվերեն տարածքում նման բան լինել չի կարող։ Նրա կարծիքով՝ գործ ունենք հայ-ռուսական պայմանավորվածության, մասնավորապես՝ «խիստ գաղտնի» փաստաթղթերի հետ։
«Խոսքը ոչ թե սահմանամերձ շրջանների, այլ մեկ հատվածի մասին է»
ՌԴ սահմանապահների կողմից ԵՄ դիտորդների մուտքը սահմանափակելու մասին լրագրողների հարցին այսպես է արձագանքել Անվտանգության խորհրդի քարտուղարը։ Արմեն Գրիգորյանի փոխանցմամբ՝ հայկական կողմը տեղյակ է, փորձելու է հասցեագրել հարցը։
Անդրադառնալով ԵՄ քաղաքացիական առաքելության գործունեությանը՝ նկատել է՝ միանշանակ է, որ այն ունի կայունության դերակատարություն մեր տարածաշրջանում։ Վստահեցրել է՝ հայկական կողմն ամբողջությամբ աջակցում է եվրոպացի դիտորդների գործունեությանը։
«Ի սկզբանե գիտեինք՝ խնդիրները բացառված չեն»
Ներքին Հանդ հասնելու մասին ասել է Հայաստանում Եվրամիության քաղաքացիական առաքելության ղեկավար Մարկուս Ռիտերը։
«Մեր առաքելությունը հասանելիություն ունի Հայաստանի ամբողջ տարածքում՝ բացառությամբ Ներքին Հանդի տարածքի, որը ռուս սահմանապահների պատասխանատվության ներքո է»։
Ռիտերի փոխանցմամբ՝ խնդիրը կապված է բացառապես Ներքին Հանդի հետ, մյուս տեղերում, որտեղ իրենք հանդիպում են ռուսական ուժերի հետ, նման խնդիրներ չեն առաջանում։ ԵՄ դիտորդների մուտքը խոչընդոտելու հիմնավորումն, ըստ նրա, կարող է ներկայացնել միայն ռուսական կողմը։
«Հայաստանը պետք է զբաղվի այդ հարցով, մենք ուղղակի շփումներ չունենք ՀՀ-ում գտնվող ռուսական ուժերի հետ»,- նկատել է նա։
Փորձագիտական կարծիք
Ռազմական հարցերով փորձագետ Կարեն Հովհաննիսյանից հետաքրքրվել ենք՝ կա՞ արդյոք իրավապայմանագրային բազա, որը թույլ է տալիս բացառապես ռուս սահմանապահների ներկայություն Ներքին Հանդում։
«Դրանք խիստ գաղտնի են պահվում, այսինքն՝ տեղավորվում են ՌԴ և ՀՀ միասնական կայազորի ստեղծման շրջանակում։ Նույնիսկ, եթե տիրապետեմ ինֆորմացիային, իրավունք չունեմ պատասխանելու»,- արձագանքել է նա։
Հովհաննիսյանը հիշեցրել է՝ կան հայ-ռուսական պայմանագրեր, այդ թվում՝ անվտանգային ոլորտում համագործակցության վերաբերյալ։ Ըստ նրա՝ հնարավոր է, որ դրանցից ելնելով՝ ռուսական կողմը ցանկություն չունի, որ «իր վերահսկողության տակ գտնվող տարածքում լինի այլ, տվյալ դեպքում՝ իրենց համար հակամարտող կողմի ներկայացուցիչ, թեկուզ քաղաքացիական»։
Փորձագետը կարծում է՝ դրանով է պայմանավորված այն հանգամանքը, որ ԵՄ դիտորդները հասանելիություն չունեն Ներքին Հանդի հատվածին։
«Հավանաբար, դա բխում է նրանից, որ հայ-ռուսական համատեղ զորախմբի շրջանակներում է իրականացվում պաշտպանություն այդ հատվածում»,- պարզաբանել է նա։
Անտեղի է համարում ռուսական կողմին ուղղված մեղադրանքները կապված Ներքին Հանդի միջադեպը չկանխելու հետ։ Նկատում է՝ 2023 թ․-ին ադրբեջանական ուժերը կրակել էին նաև պարեկություն իրականացնող ԵՄ դիտորդների ուղղությամբ։
«Չպետք է մեղադրենք երրորդ երկրներին կամ միջազգային կազմակերպություններին, պարզապես պետք է ճիշտ հասցեագրենք խնդիրը, այն է՝ Ադրբեջանը միևնույն է չի գնում խաղաղության ճանապարհով և փորձում է անընդհատ հրահրել, սադրել և ավելի ապակայունացնել իրավիճակը»,- ընդգծեկ է Կարեն Հովհաննիսյանը։
Հետևեք մեզ — Facebook | Youtube | Telegram
ԵՄ դիտորդները Ներքին Հանդ մուտք չունեն
