Եկեղեցին գրավել է նախագահի նստավայրը
Այս լուսանկարում պատկերված է Բոբոքվաթիի նախագահական նստավայրը Քոբուլեթիում՝ Սև ծովի ափին: Տարբեր ժամանակներում այն եղել է Վրաստանի նախագահների, շրջանային պաշտոնյաների, ԿԿ առաջին քարտուղարների հանգստի սիրելի վայրը:
18 շենք և կառույց՝ տեղակայված 149 796 քառ. մետր հողատարածքի վրա՝ մերձարևադարձային ծառերով, արմավենիներով, սոճիներով և 12 հազար քառ. մետր ափամերձ գոտով:
2015թ. սեպտեմբերի 21-ին պետությանը պատկանող այդ գույքը խորհրդանշական 1 լարիի դիմաց հանձնվեց Վրաստանի պատրիարքարանին:
Փոխարենը Պատրիարքարանը պետք է պետությանը վերադարձնի 721 հա տարածք զբաղեցնող Կրծանիսի անտառապուրակային գոտին, որը նույնպես 2010թ. հանձնվել էր Պատրիարքարանին 1 լարիով:
Բոբոքվաթիի նստավայրը ո՛չ առաջին, և ենթադրաբար ո՛չ էլ վերջին գույքն է, որ պետությունը հանձնում է եկեղեցու իշխանությանը: Միայն վերջին 3 տարում՝ 2012թ.-ից մինչև 2015թ. սեպտեմբեր, պետությունը եկեղեցուն է հանձնել 527 327 քառ. մետր հողատարածք և տարբեր տեսակի անշարժ գույք:
Դեռ մի քանի ամիս առաջ Բոբոքվաթիի նստավայրը ներառվել էր մասնավորեցման ենթակա օբյեկտների ցանկում: Էկոնոմիկայի նախարարությունը պատրաստվում էր նստավայրը վաճառել 34 մլն լարիով: Այդ գումարով պետք է լցվեր լարիի արժեզրկման հետևանքով նվազած պետական բյուջեն: Սակայն ծրագրերն անսպասելիորեն փոխվեցին:
Գույքի փոխանակման այս պատմության մեջ բազմաթիվ հարցեր կան, որոնք մնացել են անպատասխան: Պատրիարքարանը չի մեկնաբանում՝ ինչ նպատակներով է օգտագործվելու Բոբոքվաթիի նստավայրը:
Ինչ վերաբերում է Թբիլիսիի արվարձանում գտնվող Կրծանիսի անտառապուրակային գոտուն, իշխանության ներկայացուցիչները հայտարարում են, որ մասնավորեցման համար դա առավել շահավետ օբյեկտ է, քան Բոբոքվաթին, այդ պատճառով էլ պետությունը համաձայնել է այն փոխանակել Բոբոքվաթիի նստավայրի հետ: Կրծանիսի անտառապուրակային գոտու ներդրումային արժեքը հստակ չէ, քանի որ նրա ներկայիս կարգավիճակը արգելում է իր տարածքում ցանկացած տիպի շինարարություն:
• Վրաստանում պետության և եկեղեցու միջև հարաբերություները կարգավորում է կոնկորդատը՝ սահմանադրական համաձայնագիր, որը ստորագրվել է 2002թ.: Ըստ այդ համաձայնագրի՝ պետությունը ընդունում է խորհրդային շրջանում եկեղեցուն հասցված նյութական և բարոյական վնասը և պարտավորություն է ստանձնում մասնակիորեն փոխհատուցել դա: Եկեղեցուն գույք փոխանցելու փորձը սկսվել է կոնկորդատի ընդունումից հետո:
• Վրաստանում գոյություն ունեցող դավանանքների մեջ գերակշռողը ուղղափառ եկեղեցու հետևորդներն են: Բնակչության 80 տոկոսը ուղղափառ է: Բնակչության 95 տոկոսի համար երկրի ամենահեղինակավոր դեմքը պատրիարքն է:
• Հոտի մեծ մասը միանգամայն արդարացված է համարում այն ֆինանսական և մյուս արտոնությունները, որոնցից օգտվում է ուղղափառ եկեղեցին: Բնակչության միայն որոշակի հատվածի մոտ է հարց առաջանում՝ ինչու՞ է եկեղեցին ֆինանսավորվում իր վճարած հարկերով:
• Փորձագետները և ոչ կառավարական կազմակերպությունների ներկայացուցիչները կարծում են, որ եկեղեցու և պետության միջև համաձայնագիրը Վրաստանում մյուս դավանանքների հետևորդներին դնում է անհավասար պայմանների մեջ:
