ԵԱՀԿ Մինսկի խումբը հայտարարել է, որ Ադրբեջանն առաջինն է հարված հասցրել ղարաբաղյան հակամարտության գոտում մայիսի 15-ին

Լուսանկարը՝ ԵԱՀԿ կայքից

ԵԱՀԿ ՄԻնսկի խմբի համանախագահներն մայիսի 18-ին հայտարարություն են հրապարակել, որում ասվում է, որ Ադրբեջանն առաջինն է հարված հասցրել ղարաբաղյան հակամարտության գոտում մայիսի 15-ին:

«Մի քանի արժանահավատ աղբյուրներից հավաքած տեղեկատվության համաձայն՝ Ադրբեջանի զինված ուժերը մայիսի 15-ին հրթիռ են բաց թողել, որը հատել է ղարաբաղյան հակամարտության գոտու շփման գիծը՝ հարված հասցնելով զինտեխնիկային:

Մայիսի 16-ի երեկոյան և մինչև մայիսի 17-ը հայկական զինված ուժերը պատասխան կրակ են արձակել տարբեր տրամաչափի ականանետներից:

Երկու կողմերի գործողություններն էլ հրադադարի ռեժիմի զգալի խախտումներ են ներկայացնում և անհանգստություն առաջացնում», — ասված է ԵԱՀԿ Մինսկի խմբի համանախագահների հայտարարությունում:

Ինչպես և նախորդ անգամները, միջնորդները քննադատել են ղարաբաղյան հակամարտության շփման գծում հրադադարի ռեժիմի խախտումները և կոչ արել կողմերին բոլոր անհրաժեշտ միջոցները ձեռնարկել հակամարտության գոտում իրավիճակի սրման կանխարգելման համար:

Հայաստանի արձագանքը

Հայաստանում չափազանց կարևոր են համարում, որ Մինսկի խումբն առաջին անգամ հստակ հայտարարություն է արել և մատնացույց արել նրան, ով առաջինն է հարված հասցրել:

«Հայաստանը մշտապես կոչ է անում ԵԱՀԿ Մինսկի խմբի համանախագահներին անվանական մատնանշել զինադադարի ռեժիմի խախտման համար պատասխանատու նախահարձակ կողմին», — ասել է Հայաստանի արտգործնախարարի պաշտոնակատար Էդվարդ Նալբանդյանը մայիսի 19-ին Կիպրոսում Եվրոպայի խորհրդի գլխավոր քարտուղար Թորբյորն Յագլանդի հետ հանդիպման ժամանակ։

«Մերժելով հետաքննության մեխանիզմի ստեղծումը՝ Ադրբեջանը ցանկանում է խույս տալ իր կողմից զինադադարի պարբերական խախտումների պատասխանատվությունից, սակայն եռանախագահների երեկ տարածած ոչ ստանդարտ հայտարարությունը հստակ կերպով մատնանշում է մեղավոր կողմին», — շեշտել է Նալբանդյանը:

Իրազեկ քաղաքացիների միության փորձագետ Վահե Ղուկասյանի մեկնաբանությունը «Լրագիր» առցանց պարբերականին.

«Հակամարտության գոտու շփման գծից ստացվող տեղեկատվության անաչառությունն առանցքային նշանակություն ունի կարգավորման գործընթացի համար… Ադրբեջանական կողմն, ըստ ամենայնի, չի ցանկանում ԵԱՀԿ Մինսկի խմբին հնարավորություն տալ միջադեպերը հետաքննելու մեխանիզմներ ստեղծել: Սակայն դա միակ միջոցն է կրճատելու սահմանին տեղի ունեցող արյունոտ միջադեպերի թիվը»:

Ադրբեջանի արձագանքը

«Ադրբեջաննի զինված ուժերը գործում են Ադրբեջանի ինքնիշխան տարածքներում և ապահովում են ողջ երկրի պաշտպանությունը», — այսպես է մեկնաբանել Ադրբեջանի ԱԳՆ մամուլի ծառայության ղեկավար Հիքմեթ Հաջիևը ԵԱՀԿ Մինսկի խմբի համանախագահների հայտարարությունը:

«Ափսոսանք և զարմանք է առաջացնում այն փաստը, որ առանց ամոթի ԵԱՀԿ Մինսկի խմբի համանախագահները նշում են, որ մայիսի 16-ին և 17-ին Հայաստանի զինված ուժերը “պատասխան կրակ են բացել”: Հարց է առաջանում. ի՞նչ են անում հայ զինծառայողներն ադրբեջանական հողերում:

Մինչ այս պահն այդ միջազգային կառույցն ու դրա համանախագահները Մինսկի խմբում չեն հայտարարել Հայաստանի կամ նրա հովանավորների կողմից Ադրբեջանի տարածքներն օկուպացնելու փաստի մասին: Կարելի է ենթադրել, որ համանախագահները նման հայտարարություն են արել որպեսզի աջակցեն կամ դուր գան Հայաստանի նախագահ Սերժ Սարգսյանին:

Մինսկի խմբի համանախագահների արած հայտարարությունը Լաչինի օկուպացիայի հերթական տարելիցին կարելի է նաև համարել հակամարտության արդար կարգավորման հանդեպ անտարբեր վերաբերմունքի ցուցանիշ», — հայտարարել է Ադրբեջանի ԱԳՆ մամուլի ծառայության ղեկավարը:

Հոդվածում հնչած կարծիքներն արտահայտում են հեղինակի տերմինաբանությունն ու հայացքները և պարտադիր չէ, որ համընկնեն խմբագրության կարծիքի հետ