Դոնալդ Թրամփը կշարունակի պաշտոնավարել, այն էլ վերընտրման բարձր շանսերով

BBC

Գործող նախագահին պաշտոնանկ անելու ԱՄՆ պատմության մեջ երրորդ փորձը ձախողվել է։ Փետրվարի 6–ին Սենատն անհիմն է ճանաչել Դոնալդ Թրամփի դեմ ընդդիմադիրների առաջադրած մեղադրանքները։

Իմպիչմենտի օգտին են քվեարկել Դեմոկրատական կուսակցության բոլոր ներկայացուցիչները՝ նախագահի ընդդիմությունը։ Սակայն բոլոր հանրապետականները (Թրամփի կուսակցությունը), բացառությամբ մեկի, սատարել են նախագահին, իսկ նրանք Սենատում ավելի շատ են։

Նախագահ Թրամփին աջակցություն են ցուցաբերել նաև ԱՄՆ բնակիչները։ Gallup International–ի հետազոտության համաձայն, որը հրապարակվել է քվեարկությունից անմիջապես առաջ, այն անձանց թիվն, ովքեր կողմ են Թրամփի գործունեությանը, ռեկորդային ցուցանիշի է հասել՝ 49 տոկոս։

Մեղադրանքի երկու կետերով էլ Ներկայացուցիչների պալատի անդամների մեծ մածը 2019 –ի դեկտեմբերին Թրամփին մեղավոր էր ճանաչել։

Ինչպե՞ս են քվեարկել սենատորներն, և ինչպիսի՞ն է իմպիչմենտի համակարգը

48 սենատոր քվեարկել է, որ Թրամփը մեղավոր ճանաչվի իշխանության չարաշահման համար։

52 սենատոր ԱՄՆ նախագահին անմեղ է ճանաչել։

Որպեսզի իմպիչմենտը կայանար, Թրամփի հակառակորդները պետք է հավաքեին ձայների երկու երրորդը։

Առաջին կետով (Ուկրաինայի վրա ճնշում գործադրելը) իմպիչմենտի օգտին էին քվեարկել Սենատի բոլոր դեմոկրատներն ու մեկ հանրապետական։

Երկրորդ մեղադրանքով (Կոնգրեսի աշխատանքին խոչընդոտելը) 47 սենատոր Թրամփին մեղավոր էր ճանաչել, 53–ն իմպիչմենտին դեմ էր քվեարկել։

Առաջին և երկրորդ քվեարկությունների քվեների քանակային տարբերությունը բացատրվում է նրանով, որ հանրապետական սենատոր Միթ Ռոմնին իմպիչմենտին կողմ էր քվեարկել առաջին հոդվածով և դեմ՝ երկրորդով։

Թրամփի հեղինակությունը խաթարվե՞լ է, թե՞, ընդհակառակն, ամրապնդվել։ Մեկնաբանություն

Կոնգրեսի խոսնակ Նենսի Փելոսին, մեկնաբանելով Սենատում քվեարկության հնարավոր ելքը, բազմիցս հայտարարել է, որ դա նշանակություն չունի։ Նրա կարծիքով՝ Դոնալդ Թրամփն, այնուամենայնիվ, պատմության մեջ է մտնելու որպես ԱՄՆ երրորդ նախագահ, որի նկատմամբ իմպիչմենտ է կիրառվել, և նա երբեք չի կարողանա ազատվել դրանից։

Քաղաքագետները, սակայն, չեն կասկածում, որ Սենատի քվեարկության արդյունքները Դոնալդ Թրամփը փորձելու է օգտագործել նոր նախագահական քարոզարշավի ժամանակ։

«Նա կհայտարարի դա որպես հաղթանակ, նրա կողմնակիցները կրկին կհամոզվեն, որ քվեարկում են իրական հերոսի համար, որը մարտահրավեր է նետել վաշինգտոնյան իսթեբլիշմենթին, – կարծում է Սթոնի Բրուք համալսարանի պրոֆեսոր, քաղաքագետ Ջոնաթան Սանդերսը։ – Ես չեմ բացառում, որ իմպիչմենտի փորձը նրան ընտրողների նոր ձայներ կապահովի, որոնք մինչ այդ չէին կողմնորոշվել ընտրության հարցում»։

Ստորև ներկայացվող տեսանյութը ռեկորդ է սահմանել դիտումների քանակով։ ԱՄՆ Ներկայացուցիչների պալատի խոսնակ Նենսի Փելոսին, որը նախագահ Թրամփի իմպիչմենտի գործընթացում առաջատարն էր, ցուցադրաբար պատռում է ուղերձի տեքստը, որով նախագահը հենց նոր էր դիմել Կոնգրեսին։ Դրանից մի քանի րոպե առաջ Թրամփը հրաժարվել էր սեղմել նրա ձեռքը։

Նախագահական ընտրություններն ԱՄՆ–ում կայանալու են 2020 թ–ի նոյեմբերին

Իմպիչմենտն համընկել էր ԱՄՆ–ում նախագահի ընտրության արշավի սկզբի հետ։

Այսօրվա դրությամբ գրանցված ընտրողների կեսը կարծում է, որ Թրամփն արժանի է վերընտրվելու։

Գլխավոր շարժառիթը․ նախորդ տարվա ընթացքում նրանց ֆինանսական դրությունը բարելավվել է, և նրանք գալիք տարում այդ միտման պահպանման հույս ունեն։

Սոցիոլոգները նշում են քաղաքական միջավայրում կարծիքների անսովոր բևեռացում․ Թրամփին աջակցելու վարկանիշը նրա Հանրապետական կուսակցության համակիրների շրջանում 94 տոկոս է, ընդդիմադիր Դեմոկրատական կուսակցության կողմնակիցների շրջանում՝ 7 տոկոս։