ԱՄՆ դեսպան Քելի Դեգնանը պատասխանել է վարչապետ Իրակլի Ղարիբաշվիլիի՝ Վրաստանի վերաբերյալ ԱՄՆ Պետդեպարտամենտի զեկույցի քննադատությանը։ Նա հայտարարել է, որ այդ փաստաթուղթը «հիմնված է ոչ օբյեկտիվ և անարդար եզրակացությունների վրա»։ Իր հերթին Դեգնանն ասել է, որ զեկույցում ներկայացված բոլոր տեղեկությունները ստուգված և հաստատված են։
Դեսպանի խոսքով՝ Պետդեպարտամենտի զեկույցները կենտրոնացած են երկրում առկա խնդիրների, ոչ թե քաղաքական կուսակցությունների կամ կոնկրետ անձանց վրա:
«Այս զեկույցները երկրի հրատապ կարիքների և բացերի մասին տեղեկատվության հիանալի աղբյուր են, ինչպես նաև հնարավորություն՝ վերլուծելու այն, ինչ փոխվում է տարիների ընթացքում, օրինակ՝ ինչն է ավելի լավ դառնում»,- ասել է Դեգնանը:
Քելի Դեգնանն ընդգծել է, որ ԱՄՆ Պետդեպարտամենտի զեկույցների նպատակն է Վրաստանի բնակչությանը տեղեկացնել այն մասին, թե ինչպես կարելի է «ժողովրդավարություն կառուցել և պաշտպանել» մարդկանց իրավունքները։
«Մենք հուսով ենք, որ այն զեկույցները, որոնք մենք հրապարակում ենք ամեն տարի, կդիտարկվեն որպես կարևոր և անհրաժեշտ ռեսուրս»,- նշել է Վրաստանում ԱՄՆ դեսպանը։
Մարտի 21-ին Իրակլի Ղարիբաշվիլին հայտարարել էր, որ իրեն չի հետաքրքրում ԱՄՆ Պետդեպարտամենտի զեկույցը։ Վարչապետի խոսքով՝ «զեկույցը մեծամասամբ կառուցված է կեղծ տեղեկատվության վրա, և այն կառավարությանը «չի հետաքրքրում»։ Ղարբիաշվիլիի խոսքով՝ զեկույցը հիմնված է, այսպես կոչված, էլիտար ՀԿ-ների կողմից ներկայացված ոչ օբյեկտիվ, կանխակալ և անարդար եզրակացությունների վրա։
«Ներկայացված փաստերը [2021 թվականի հուլիսի 5-ի Աֆղան Մուխթարլիի գործը] չեն համապատասխանում իրականությանը, դրանք ընդամենը շահարկումներ են, եզրակացություններ և ընդհանրացումներ՝ հիմնված որոշ քաղաքականապես ներգրավված անձանց կեղծ, շինծու տեղեկատվության վրա։ Մեզ դա չի հետաքրքրում։ 10 տարի առաջ և նույնիսկ ավելի վաղ, երբ երկրում կար, օրինակ՝ համակարգային կոռուպցիա, սիստեմատիկ հանցագործություն, մարդկանց խոշտանգում էին, բռնաբարում, սպանում, բիզնեսներ էին խլում, ընդհանրապես չկար լրատվամիջոցների ազատություն, չկար ոչ մի անկախ հեռուստաալիք, չեմ հիշում, որ Պետքարտուղարությունը զեկույցում հիշատակեր այդ փաստերը, և դա ափսոսանք է առաջացնում»,- ասել էր Ղարիբաշվիլին։
Մարտի 20-ին Միացյալ Նահանգների Պետդեպարտամենտը հրապարակել էր զեկույց 2022 թվականին Վրաստանում մարդու իրավունքների իրավիճակի մասին։ Փաստաթղթում խոսվում է, մասնավորապես՝ Վրաստանում քաղբանտարկյալների առկայության մասին, օրինակ՝ «Մտավարի» հեռուստաընկերության տնօրեն Նիկա Գվարամիայի գործի։ Բացի այդ, ներառված են խոշտանգումների կամ անմարդկային, դաժան և արժանապատվությունը նվաստացնող վերաբերմունքի մասին փաստեր, մասնավորապես՝ այն մասին, թե ինչպես է կառավարությունը վերաբերվում նախկին նախագահ Միխեիլ Սաակաշվիլիի հետ, ով գտնվում է կալանքի տակ։
Սպիտակ տան տվյալներով՝ «կառավարության՝ հուլիսի 5-ի ջարդերի կազմակերպիչներին պատժելու անկարողությունն» է [խոսքն այն բռնությունների մասին է, որոնք հոմոֆոբ խմբերն իրականացրել էին հասարակության այն անդամների նկատմամբ, ովքեր պետք է արժանապատվության երթ անցկացնեին Թբիլիսի փրայդի շրջանակներում, ինչպես նաև ԶԼՄ ներկայացուցիչների հանդեպ] հանգեցրել անպատժելիության: Փաստաթղթում որպես լուրջ խնդիր հիշատակվում է նաև Վրաստանի դատական համակարգը՝ ոչ բավարար չափով օբյեկտիվ հետաքննությունների և քաղաքական դրդապատճառներ ունեցող հետապնդումների հետ մեկտեղ։
