Դադարեք չարաշահել մարդու իրավունքները

“Ադրբեջանի Հանրապետության Սահմանադրությունում փոփոխություններ կատարելու մասին” հանրաքվեի ակտի նախագիծն ուղարկված է Սահմանադրական դատարան՝ նախագահի հրամանի համաձայն: Հայտնի չէ, թե երբ դատարանը կդիտարկի նախագիծը, սակայն արդեն հայտնի է, որ նախագծի ընդունման հանրաքվեն կկայանա այս տարի:

Նախագահի հաստատած փոփոխությունները նախագահական ժամկետը երկարաձգում են մինչև 7 տարի, նախագահի կողմից նշանակվող փոխնախագահի պաշտոն է ներմուծվում, սահմանափակվում են հողի սեփականության իրավունքները: Բացի այդ, նախագծում հատուկ ուշադրություն է դարձվում մարդու իրավունքներին:

«Իրավունքների չարաշահումն անընդունելի է», ասված է մարդու իրավունքներին նվիրված համար 24 հոդվածի վերաբերյալ նախագահի առաջարկի մեջ:

Հոդված 29-ում առաջարկվող լրացումները (մասնավոր սեփականության իրավունքներ) ասված է. «Հողի մասնավոր սեփականության մարդու իրավունքը կարող է սահմանափակվել սոցիալական անարդարության և արդյունավետ հողօգտագործման նպատակով»:

Ի լրումն հոդված 46-ի (հավաքների ազատություն), ազատությունը երաշխավորվում է «հասարակական կարգն ու հասարակական բարքերը չխախտելու» պայմանի դեպքում:

Բացի այդ, առաջարկվում է խորհրդարանի պատգամավորի (25 տարեկան) և նախագահի (35 տարեկան) ընտրության տարիքային սահմանափակումը հանել: Ներմուծվում է փոխնախագահի ինստիտուտ. նրան կարող է նշանակել միայն նախագահը: Ընդ որում, այդ փոփոխությունների համաձայն, այն դեպքում, երբ նախագահն ի վիճակի չէ կատարել իր պարտականությունները, իշխանությունը երկրում անցնում է ոչ թե վարչապետին, այլ փոխնախագահին:

Նախագահն իրավունք է ստանում նաև արտահերթ նախագահական ընտրություններ նշանակելու և խորհրդարանը ցրելու:

Առաջարկն ուղարկվել է Սահմանադրական դատարան որոշում կայացնելու համար, այնուհետև հանրաքվեի է դրվելու:

Շատերը սպասում էին «ճանապարհային քարտեզի», որը կառաջարկվեր կառավարության կողմից և երկիրը դուրս կբերեր տնտեսական ճգնաժամից, կդիվերսիֆիկացներ տնտեսությունը (ինչը բազմիցս խոստացել է կառավարությունը):

Նույն օրը նախագահը ելույթ ունեցավ մարզիկների առջև ադրբեջանական պատվիրակությանն ամառային Օլիմպիական խաղերին ճանապարհելու միջոցառմանը և հետևյալ հայտարարությունն արեց.

«2008-2009 թթ-ի ճգնաժամը 2015-2016թթ-ին էլ այնքան մեծ ազդեցություն չունեցավ մեր աշխատանքի վրա: Ինչո՞ւ: Որովետև ժողովուրդն ու իշխանությունները միասնական են: Որովհետև հասարակությունում տարաձայնություններ չկան մեր երկրի զարգացման հետ կապված: Որովհետև մենք ապրում ենք մեր հաշվին, տնտեսապես և քաղաքականապես անկախ են, անկախ քաղաքականություն ենք վարում: Դա արժանի քաղաքականություն է, որը հիմնված է ադրբեջանական ժողովրդի շահերի վրա, և մենք բաց ենք ողջ աշխարհի համար: Այդ պատճառով էլ մեր ընկերների քանակն աշխարհում ավելանում է: Մեր հանդեպ հարգանքն աճում է: Ավելանում է մեզ հետ համագործակցել ցանկացողների թիվը: Մենք գնում ենք մեր ճանապարհով»:

Անար Մամեդլի (իրավապաշտպան, նախկին քաղբանտարկյալ).

«Մինչ խելացի մարդիկ հետնավթային դարաշրջանում պետությունից «ճանապարհային քարտեզի» էին սպասում, երկրի ղեկավարը հանրաքվեի մասին հետադիմական ակտ ստորագրեց՝ դրանով նախանշելով բռնապետության անցնելու պլանը: Մտադրությունները հետադիմական և հակաժողովրդավարական են, բայց գոնե անկեղծ են»:

Գուդրաթ Հասանգուլիև (խորհրդարանի պատգամավոր).

«Կարծում եմ տվյալ փոփոխությունները սկիզբ են առնում ավելի շատ արտասահմանյան աղբյուրներից: Աշխարհում և տարածաշրջանում տեղի ունեցող իրադարձությունները լուրջ անհանգստություն են առաջացնում: Եթե Հայաստանի հետ բանակցությունները հաջողություն չունենան, Ադրբեջանին արյունահեղ պատերազմ է սպասվում: Ըստ երևույթին, այդ մարտահրավերներին պատասխանելու և երկրի համար կայունություն ապահովելու համար իշխանություններն ուզում են ուժեղացնել նախագահի ինստիտուտը»:

Նաթիկ Ջաֆարլի (տնտեսագետ, ՌեԱլ շարժման կառավարման անդամ).

«Այս փոփոխությունները շարժում են այս համակարգի հիմնաքարերը (կարևոր չէ՝ դրական թե բացասական առումով): Ներհամակարգային ուժեղ դիմադրություն կստեղծվի. Կարևոր չէ՝ կնշանակեն արդյոք 8 վարչապետ, նախագահ ընտրվելու տարիքային սահմանաչափը կիջեցնեն մինչև 16 տարեկան, իսկ ժամկետը՝ մինչև 17 տարի. սրանցից և ոչ մեկը չի օգնի լուծել երկրում առկա տնտեսական խնդիրները»:

Ֆեյբուքի օգտատիրոջ մեկնաբանությունը.

«Ադրբեջանի նախագահը երկրի Սահմանադրությունում փոփոխություններ է մտցնում ինչպես անձնական օրագրում: Ցանկացավ՝ փոխեց, չցանկացավ՝ ջնջեց»:

Հրապարակվել է 21.07.2016