«Փա՞ստ է, թե՞ կեղծիք»․ Գրիգորյան-Հաջիև հեռակա բանավեճը
Գրիգորյան-Հաջիև հեռակա բանավեճը
«Լեռնային Ղարաբաղի հայության իրավունքների պաշտպանության ու անվտանգության համար միջազգային մեխանիզմներ ստեղծելու շուրջ պայմանավորվածությունը ձեռք է բերվել Վաշինգտոնում, բանակցություններին ներկա է եղել նաև ամերիկյան կողմը, կազմվել է արձանագրություն»,- այսօր խորհրդարանում հայտարարել է Հայաստանի Անվտանգության խորհրդի քարտուղար Արմեն Գրիգորյանը։
Այս հայտարարությամբ նա արձագանքել է Ադրբեջանի նախագահի օգնական Հիքմեթ Հաջիևին, ով «կեղծիք» էր որակել վաշինգտոնյան համաձայնության մասին Գրիգորյանի նախորդ հայտարարությունը։
Հայաստանի Անվտանգության խորհրդի քարտուղարը թեմային անդրադարձել էր երեկ։ Լրագրողների հետ ճեպազրույցում Արմեն Գրիգորյանը նշել էր, որ Վաշինգտոնում հարցի շուրջ համաձայնության են եկել, սակայն «մինչև այս պահը այդ մեխանիզմի մասին հստակություն չկա»։
«Նաև հստակություն չկա՝ խաղաղության պայմանագրո՞վ ենք դա անելու, թե՞ խաղաղության պայմանագրից դուրս»,- ընդգծել էր նա։
Ի պատասխան այս հայտարարության՝ Հիքմեթ Հաջիևը կարծիք է հայտնել, որ «հայկական կողմը խեղաթյուրում է վաշինգտոնյան քննարկման էությունը» և կրկնել Բաքվից հնչող պնդումը, թե ԼՂ-ի հայության իրավունքների հարցը չեն պատրաստվում քննարկել որևէ երկրի հետ, դա «Ադրբեջանի ներքին գործն է»:
Հայաստանի ԱԽ քարտուղարի բնորոշմամբ՝ ադրբեջանական կողմը փորձում է ձևացնել, թե ղարաբաղյան խնդիրը չկա, իսկ դա չի նպաստում խաղաղության պայմանագրի հարցում առաջ շարժվելուն։
Հայաստանի Անվտանգության խորհրդի քարտուղարը՝ խաղաղության պայմանագրի, ԼՂ-ի հայերի իրավունքների, Հաջիևի հետ վաշինգտոնյան հանդիպման մասին
Ղարաբաղի հարցն ադրբեջանական կողմի համար դարձել է «փիղը՝ սենյակում»
Խորհրդարանում նման տեսակետ է հայտնել Հայաստանի ԱԽ քարտուղար Արմեն Գրիգորյանն ու հավելել «խնդիրը կա, բայց փորձում են ձևացնել, թե այն չկա»։
Նրա փոխանցմամբ՝ հայկական կողմն իր «հավանությունն է տվել» ԼՂ-ի հայերի իրավունքների և խաղաղության պայմանագրի հարցերը տարանջատված քննարկելուն, քանի որ վաշինգտոնյան հանդիպման ժամանակ «վստահություն է ստեղծվել միջազգային մեխանիզմի վերաբերյալ»։
«Սակայն, երբ միջազգային մեխանիզմի վերաբերյալ որևէ հստակություն չկա, ապա դա հայկական կողմի համար դժվարացնում է խաղաղության պայմանագրի մասով առաջ գնալը»,- շեշտել է Գրիգորյանը։
«Փաստված բաները հնարավոր չէ հերքել»
Հայաստանի ԱԽ քարտուղարն այսպես է արձագանքել Ադրբեջանի նախագահի օգնականի «հերքմանը»․
«Բանակցություններում միայն հայկական կողմը չի եղել: Ամերիկյան կողմն էլ է եղել: Կա դրա մասին արձանագրություն, որի մասին ադրբեջանական կողմը տեղյակ է»:
Գրիգորյանի խոսքով՝ շարունակելու են աշխատանքները՝ հասկանալու համար, թե որն է այն մեխանիզմը, որի շրջանակներում պայմաններ կստեղծեն, որպեսզի Լեռնային Ղարաբաղի և Ադրբեջանի միջև տեղի ունենա քննարկում այստեղ ապրող հայերի անվտանգության և իրավունքների վերաբերյալ։
Գրիգորյանը հույս է հայտնել, որ հնարավոր կլինի հասնել այդ նպատակին, ու ընդգծել, որ այդ ուղղությամբ աշխատանքը շարունակելու հետաքրքրություն են ցուցաբերում նաև միջազգային գործընկերները։
«Կա՛մ պայմանագրում պետք է հստակ նշվի ԼՂ-ի մասին, կա՛մ ստեղծվի միջազգային մեխանիզմ»
Նախօրեին լրագրողների հետ զրույցում Հայաստանի ԱԽ քարտուղարը նման հայտարարություն էր արել։ Նա տեղեկացրել էր, որ Հայաստանի և Ադրբեջանի միջև խաղաղության պայմանագրի շուրջ աշխատանքները շարունակվում են։ Արմեն Գրիգորյանը նշել էր, որ Ադրբեջանի ներկայացրած տեքստից դժվար է ասել՝ այնտեղ Ղարաբաղ կա՞, թե՞ չկա․
«Կարող եմ ենթադրել, որ այդ 5 կետերից երեքը ԼՂ-ի մասին է՝ առանց ԼՂ անունը տալու։ Հայկական կողմի մոտեցումն այն է, որ եթե որևէ ակնարկ կա, ապա պետք է հստակ նշվի։ Մենք աշխատում ենք այդ ուղղությամբ, որ կա՛մ պայմանագրում պետք է հստակ նշվի ԼՂ-ի մասին, կա՛մ ստեղծվի միջազգային մեխանիզմ»։
ԱԽ քարտուղարի դիտարկմամբ՝ «Երևանը կողմ է անվտանգության երաշխիքների ստեղծմանը»՝ լինի դա խաղաղության պայմանագրով, թե միջազգային այլ մեխանիզմով։
Նա հայտնել է, որ Բաքվի փոխանցած տեքստը նախկին 5 կետերի ավելի բացված տարբերակն է։ Շեշտել է՝ հայկական կողմը Բրյուսելից, Վաշինգտոնից կամ որևէ այլ մայրաքաղաքից խաղաղության պայմանագրի վերաբերյալ փաստաթուղթ չի ստացել։ Նրա խոսքով՝ կա պայմանագրի տեքստի երկու տարբերակ՝ ռուսական և ադրբեջանական։ Ներկա պահին աշխատում են ադրբեջանականի վրա։
Խոսելով Մոսկվայի առաջարկների մասին՝ Գրիգորյանն ընդգծել է՝ հայկական կողմն առաջարկել է դրանք ներառել Սոչիի հանդիպումն ամփոփող հայտարարության մեջ, սակայն դա չի արվել։ Թե ինչու՝ «ճիշտ կլինի հարցնել Ռուսաստանից»։
Խաղաղության պայմանագրի ո՞ր կետի շուրջ կա համաձայնություն
«Կա մեկ կետ, որի շուրջ համաձայնություն կա: Դիվանագիտական հարաբերությունները Վիեննայի կոնվենցիայի շրջանակներում հաստատելն է: Մնացած բոլոր կետերի վերաբերյալ չկա հստակ համաձայնություն»,- հայտարարել է Արմեն Գրիգորյանը։
Հայկական կողմը դեռևս չի պատասխանել խաղաղության պայմանագրի վերաբերյալ Ադրբեջանից ստացված վերջին առաջարկներին։ Հայաստանի անվտանգության խորհրդի քարտուղարի խոսքով՝ դրանք չեն հանրայնացրել՝ հաշվի առնելով «բանակցային առանձնահատկությունը»։ Մյուս կողմից նկատում է՝ հայ ժողովրդին հայտնի են այն բոլոր խնդիրները, որոնք կան Հայաստանի և Ադրբեջանի միջև․
«ԼՂ հիմնախնդիրն է, չդելիմիտացված և չդեմարկացված սահմանն է, ապաշրջափակումն է, և կան հումանիտար հարցեր: Քննարկումները, ընդհանուր առմամբ, հենց այս ուղղություններով են»։
Հետևեք մեզ — Facebook | Youtube | Telegram
Գրիգորյան-Հաջիև հեռակա բանավեճը
