Գերմանիայից արտաքսված ևս մեկ ադրբեջանցի դատապարտվել է ազատազրկման
Քարիմլին դատապարտվել է 6 տարվա ազատազրկման
Ադրբեջանի ընդդիմադիր «Ժողովրդական ճակատ» կուսակցության անդամ Փյունխան Քարիմլին, ով կալանավորվել էր հունվարին, դատապարտվել է վեց տարվա ազատազրկման։ Նրան մեղադրանք է առաջադրվել թմրամիջոցների ապօրինի շրջանառության համար։ Բանտարկյալի փաստաբանը վստահ է, որ Քարիմլիին հետապնդում են քաղաքական դրդապատճառներով։ Նա ձերբակալվելուց մեկուկես ամիս առաջ է Գերմանիայից արտաքսվել Ադրբեջան։
Այսօր Բաքվի ծանր հանցագործությունների դատարանը հրապարակել է ընդդիմադիր «Ժողովրդական ճակատ» կուսակցության անդամ Փյունխան Քարիմլիի նկատմամբ դատավճիռը։ Քարիմլին կալանավորվել էր 2022 թվականի հունվարին։ Անցյալ տարեվերջին նա Գերմանիայից արտաքսվել էր Ադրբեջան։ Գերմանիայում Քարիմլիին փախստականի կարգավիճակ չէին տրամադրել։
Ընդդիմադիրը մեղադրվում էր թմրամիջոցների ապօրինի շրջանառության մեջ։ Դատական նիստի ընթացքում ընդդիմադիրը հերքեց իրեն առաջադրված մեղադրանքը՝ հայտարարելով, որ իրեն հետապնդում են քաղաքական դրդապատճառներով։
Նույն կարծիքին է փաստաբան Ջավադ Ջավադովը։ Նրա խոսքով՝ չկան ապացուցողական փաստեր, որոնք կհավաստեին Քարիմլիի մեղավորությունը նրան վերագրվող հանցագործության կատարման մեջ։
Չնայած այդ ամենին՝ դատարանը Փյունխան Քարիմլիին մեղավոր է ճանաչել և դատապարտել վեց տարվա ազատազրկման։ Ավելի վաղ դատախազն առաջարկել էր ակտիվիստին դատապարտել 7,5 տարվա ազատազրկման։ Պաշտպանական կողմը պատրաստվում է բողոքարկել որոշումը։
Քրեական մեղադրանքը կեղծելու մասին հայտարարել է նաև ակտիվիստի հայրը՝ Վահիդ Քարիմովը։
«Տղայիս բերման են ենթարկել հարկայինից դուրս գալիս։ Կարո՞ղ էր նա այնտեղ գնալ՝ գրպանում թմրանյութ ունենալով։ Սա կեղծ մեղադրանք է։ Թմրանյութը նրա գրպանն են գցել։ Իմ որդուն հետապնդում են Ադրբեջանում քաղբանտարկյալների պաշտպանությանը նվիրված հանրահավաքներին մասնակցելու և իշխանություններին քննադատելու համար։
Ես չէի ափսոսա, եթե նրան 10 տարվա ազատազրկման դատապարտեին քաղաքական գործունեության համար, բայց թմրամիջոցների հետ կապված մեղադրանքները չեմ ընդունում»,- բանտարկյալի հոր խոսքերն է մեջբերում Turan-ը։
Ինչո՞ւ է Գերմանիան վերադարձնում Ադրբեջանի քաղաքացիներին
2014 թվականին Ադրբեջանի և Եվրամիության միջև համաձայնագիր է ստորագրվել ապօրինի բնակվող անձանց ռեադմիսիայի (վերադարձ կամ հետընդունում) մասին։
Ըստ այդ համաձայնագրի՝ ռեադմիսիայի են ենթակա այն անձինք, ովքեր չեն համապատասխանում փաստաթղթում նշված երկրներ մուտք գործելու, այնտեղ գտնվելու և բնակվելու համար սահմանված պահանջներին: Համաձայնագիրը ենթադրում է նրանց նույնականացում և անվտանգ վերադարձ հայրենիք։
Ադրբեջանի պետական միգրացիոն ծառայության տվյալներով՝ միայն 2021 թվականին Ադրբեջան է վերադարձվել 420 մարդ, որոնցից 39-ը՝ Գերմանիայից։ Մինչդեռ նույն 2021 թվականին ռեադմիսիայի 440 դիմում է եղել։
ԵՄ երկրներից արտաքսվածների թիվը 2021 թվականին 2,9 տոկոսով գերազանցել է 2020 թվականի ցուցանիշը։
Ռեադմիսիայի մասին համաձայնագրի ուժի մեջ մտնելուց ի վեր ԵՄ երկրներից Ադրբեջան է արտաքսվել 2013 մարդ։ Եվս 4160 հոգու հետընդունման հարցումը ստացել է դրական պատասխան։ Սպասվում է, որ կարտաքսվի 2147 մարդ։
Գործա՞րք Գերմանիայի և Ադրբեջանի կառավարությունների միջև
Ադրբեջանցի քաղաքական էմիգրանտները, ովքեր այժմ գտնվում են Գերմանիայում, կարծում են, որ այս բոլոր «արտաքսումներ-ձերբակալությունները» Գերմանիայի և Ադրբեջանի կառավարությունների միջև գործարքի արդյունք են։
«Գերմանիայի կառավարությունը շարունակում է ադրբեջանցի քաղաքական էմիգրանտներին նվիրել Ալիևին։ Արտաքսումները կատարվում են Բաքվից ուղարկված ցուցակի հիման վրա։ Չնայած ավելի վաղ Բաքու վերադարձած հինգ քաղաքական էմիգրանտների ձերբակալությանը՝ քաղաքական էմիգրանտներն այսօր երեկոյան կրկին արտաքսվել են։ Գերմանիայի ներկայիս կառավարությունը պատրաստ է մեզանից յուրաքանչյուրին վաճառել կաշառքի դիմաց։ Միջազգային կազմակերպությունները նույնպես լռում են»,- ասել է քաղաքական էմիգրանտ Աֆղան Մուխթարլին։
Քարիմլին դատապարտվել է 6 տարվա ազատազրկման
