Ադրբեջանում կոռուպցիայի մեղադրանքով մի քանի խոշոր պաշտոնյա է ձերբակալվել։ Այս անգամ՝ զինվորականներ

Մի քանի խոշոր զինվորական պաշտոնյա է ձերբակալվել Ադրբեջանում պաշտոնաեկան լիազորությունների չարաշահման և ծառայողական կեղծիքի համար։ Մասնավորապես, դա գեներալ–լեյտենանտ Աֆղան Նագիևն է՝ պետական սահմանային ծառայության պետի տեղակալը։ Սա վերջին կես տարում բարձրաստիճան պաշտոնյաների բազում ձերբակալություններից մեկն է։ Իշխանությունները դա բացատրում են կոռուպցիայի դեմ ուժեղացված պայքարով, սակայն հասարակության զգալի մասն այդ վարկածին չի հավատում։ 

• Նավթ և կորոնավիրուս․ ադրբեջանական տնտեսության երկու դժբախտությունները
• Թափառական կենդանիները Վրաստանում․ հումանիզմը չի՞ լուծում խնդիրը

Աֆղան Նագիևը բազմաթիվ պետական պարգևների է արժանացել, այդ թվում՝ «Հայրենիքին մատուցած ծառայությունների համար» շքանշան։ Նրա ձերբակալությանը վերջերս տեղի ունեցած մի դեպք է նախորդել․ ադրբեջանցի ձկնորսների (հնարավոր է՝ որսագողների) նավակն ինչ–որ կերպով անցել էր Կասպից ծովի ադրբեջանական հատվածի ողջ ջրային տարածքով և հասել Ղազախստանի հետ ծովային սահմանին։ Այնտեղ նրանց վրա կրակ էին բացել ղազախ սահմանապահները, ձկնորսներից մեկը մահացել էր։ Այդ միջադեպի համար բոլորից զատ մեղադրվել էր Նագիևը․ ենթադրվում է, որ նա իր աշխատակիցների հետ միասին ձնկորսներից կաշառք է ստացել և դրա դիմաց նրանց թույլ տվել որսագողությամբ զբաղվել։ Այդ մասին պատմում է 1news–ը։

«Կոռուպցիոներների ակտիվ որսն» Ադրբեջանում սկսվել է 2019 թ–ի դեկտեմբերին, երբ կալանավորվել էր երկրի շրջաններից մեկի գործադիր իշխանության ղեկավարը։ Նա մեղադրվել էր կոռուպցիայի և պետական միջոցների յուրացման համար։ Այնուհետև նույնատիպ մեղադրանքով կալանավորվել էր «շրջանների ևս չորս տեր», իսկ բոլորովին վերջերս՝ մշակույթի և զբոսաշրջության փոխնախարարը, որը պատասխանտու էր ճարտարապետության համար։ Փոխնախարարն ամեն ինչից զատ գլխավոր մեղավոր էր հայտարարվել այն բանի, որ Բաքվում տարիներ շարունակ քանդվել են հին շենքերը։

Ըստ իշխանությունների՝ իրենք հանկարծակի հայտնաբերել են, որ բարձրաստիճան պաշտոնյաների շրջանում շատ են կոռուպցիոներներն ու մտադիր են հետևողականորեն «մաքրել» նրանց։ Սակայն հասարակությունում շատերը չեն հավատում այդ «հանկարծակիին»։ Ադրբեջանցի պաշտոնյաների կոռումպացվածությունը հասարակության աչքերում աքսիոմա է եղել, որի հետ բոլորը պետք է հարմարվեն որպես անխուսափելի չարիքի։ Այդ պատճառով էլ ներկայիս կալանքները ոմանք «թատրոն» են անվանում, իսկ մյուսները՝ ներքին «ռազբորկաներ» կառավարությունում, որոնք ոչ մի կապ չունեն արդարության վերականգնման հետ։

Մի քանի մեկնաբանություն սոցցանցերից․

«Հատկանշականն այն է, որ սահմանային ծառայության ղեկավարին ձեռք չեն տվել։ Ինչպես նաև մշակույթի նախարարին։ Իբր նրանք լավն են, իսկ շրջապատը կաշառակերնե՞ր են»։

«Ինչպիսի՜ երջանկություն։ Այժմ, վերջապես, մեզ մոտ ամեն ինչ կարգին է լինելու թե սահմանին, թե մշակույթի ոլորտում։ Չգիտես՝ լացել, թե ծիծաղել»։

«Կառավարությունն իր խաղերն է խաղում․ ստիպում է լռել նրանց, ովքեր չեն ենթարկվում իրենց, կամ սեփական շահերն է հետապնդում»։