Գազամատակարարումն Արցախում կվերականգնվի «կարճ ժամկետում»

Ադրբեջանական կողմը մարտի 16-ին սկսել է Հայաստան—Արցախ գազատարի վնասված հատվածի նորոգման աշխատանքները։ Այս մասին հայտարարությամբ հանդես է եկել Արցախի տեղեկատվական շտաբը։

Շուրջ տասը օր է, ինչ մայրաքաղաք Ստեփանակերտն ու Արցախի մյուս բնակավայրերը զրկված էին գազամատակարարումից։ Ադրբեջանական կողմը թույլ չէր տալիս մուտք գործել իր վերահսկողության ներքո գտնվող տարածք և իրականացնել վթարավերականգնողական աշխատանքներ։

• Հայաստան-Ադրբեջան․ խաղաղության պայմանագրի ստորագրում՝ չնայած տարաձայնություններին

• «Ադրբեջանը փորձում է օգտվել Ուկրաինայի շուրջ իրավիճակից»․ իրադրությունն Արցախում

• Տեխնիկական խնդի՞ր, թե՞ ադրբեջանական դիվերսիա. Արցախը զրկվել է գազից

Արցախի տեղեկատվական շտաբի փոխանցմամբ՝ գազամատակարարումը կվերականգնվի «կարճ ժամկետում»․

«Արցախի իշխանությունները գործադրում են բոլոր ջանքերը, որ դա տեղի ունենա ժամ առաջ»,- ասված է շտաբի տարածած հաղորդագրությունում։

Ուշագրավ է, որ ադրբեջանական կողմը ոչ թե թույլատրել է հայկական կողմին մուտք գործել և նորոգել խողովակը, այլ ինքն է սկսել վերանորոգման աշխատանք նշված հատվածում․

«Մարտի 8-ից ի վեր ՀՀ կառավարության ու ռուս խաղաղապահների աջակցությամբ իրականացվող բանակցությունների շնորհիվ՝ ադրբեջանական կողմն այսօր սկսել է վնասված գազատար խողովակի վերանորոգման աշխատանքները»։

Գազի բացակայությունը՝ հումանիտար խնդիրների պատճառ

Գազի բացակայությունն Արցախում բազմաթիվ խնդիրների պատճառ էր դարձել․ մարդիկ չէին կարողանում ջեռուցել տները, պարբերաբար անջատվում էր հոսանքը, մի շարք հացի արտադրամասեր դադարեցրել էին գործունեությունը։

Գազատարի վնասումն անդրադարձել էր նաև ուսումնական պրոցեսի վրա․ դպրոցները ևս ունեին ջեռուցման խնդիր։ Արցախի կրթական գերատեսչության որոշմամբ դպրոցներում գարնանային արձակուրդը մեկնարկեց սահմանված ժամկետից մեկ շաբաթ շուտ։

Ստեփանակերտը դատապարտում էր Բաքվի գործողությունները, Երևանը չէր շտապում գնահատական տալ

Արցախում գազատարի վնասման հնարավոր տարբերակ են համարում ինչպես տեխնիկական խնդիրը, այնպես էլ «ադրբեջանական դիվերսիան»։

Նախագահ Արայիկ Հարությունյանն Անվտանգության խորհրդի նիստում կարծիք էր հայտնել, թե գազատարի վնասումը, ինչպես նաև Արցախի խաղաղ բնակչության հանդեպ Ադրբեջանի ցուցաբերած «ագրեսիվ վարքագիծը ունեն աշխարհաքաղաքական ենթատեքստ»։ Արտահերթ նիստում պաշտոնական Բաքվի վարքագիծը դատապարտել էր նաև Արցախի խորհրդարանը՝ հանդես գալով ԵԱՀԿ Մինսկի խմբին և ՄԱԿ-ին ուղղված հայտարարությամբ։

Կառավարության՝ մարտի 10-ի նիստում Արցախում ստեղծված իրադրությանն անդրադարձել էր ՀՀ վարչապետ Նիկոլ Փաշինյանը։ Փաշինյանն ընդգծել էր, որ Արցախում իրադրության որոշակի լարում կա, սակայն չէր շտապել գնահատականներ հնչեցնել։

«Այս պահին գնահատականներ չտանք։ Պարզապես արձանագրենք, որ կա այդպիսի իրավիճակ, ու փորձենք կենտրոնանալ խնդիրները լուծելու ուղղությամբ»,- հայտարարել էր Փաշինյանն ու հավելել, որ Արցախի ու միջազգային գործընկերների հետ աշխատում են «իրադրությունը կայունացնելու և կարգավորելու ուղղությամբ»։