Բրիտանական դատարանն առգրավել է ադրբեջանցի պատգամավորի ընտանիքի միլիոնանոց հաշիվները
Մեծ Բրիտանիայի դատարանի որոշմամբ առգրավվել է 5,6 մլն ֆունտ ստեռլինգ [մոտ $7,5 մլն], որոնք ադրբեջանական խորհրդարանի պատգամավոր Ջավանշիր Ֆեյզիևի ընտանիքի անդամների հաշիվներին է եղել։ Գումարներն առգրավվել են հօգուտ Բրիտանիայի հանցավորության դեմ պայքարի ազգային գործակալության (NCA)։ Գործակալությունը դատարանում ապացուցել է, որ այդ միջոցները երկիր են բերվել ապօրինի ճանապարհով։
Ինչպես գրում է Evening Standard պարբերականը, Մեծ Բրիտանիայի իրավապահ մարմինները կոռուպցիոն միջոցներից եկամուտ ստանալու համար մեղադրել են ադրբեջանցի պատգամավոր Ջավանշիր Ֆեյզիևի կնոջը՝ Փարվանա Ֆեյզիևային, նրա որդի Օրհան Ֆեյզիևին և Միլլի Մեջլիսի անդամի զարմիկ Էլման Ջավանշիրին։
Աղբյուրը նշում է, որ այդ մարդկանց հաշիվների վրա միջոցներ են հայտնաբերվել 15,3 մլն ֆունտ ստեռլինգի չափով [մոտ $20,7 մլն], սակայն մեղադրող կողմը կարողացել է հանցավոր տարրերի առկայությունն ապացուցել այդ միջոցներից միայն մեկ երրորդում։
Ֆեյզիևին պատկանող հաշիվներից նրա ընտանիքի անդամների հաշիվներին գումար փոխանցելու նպատակը եղել է Մեծ Բրիտանիայում առաջին աստիճանի ներդրողի կարգավիճակ ստանալը, ասված է նյութում։ Այդ կարգավիճակն օտարերկրացիներին Մեծ Բրիտանիայի տարածքում ապրելու իրավունք է տալիս։ Ադրբեջանցի պատգամավորի ընտանիքը տուն ունի Քամբերլենդ-Թերասում՝ Լոնդոնի Ռիջենթս-փարքում։
NCA-ի փաստաբան Քոլինգվուդ Թոմփսոնը դատարանին հայտարարել է, որ փողերի լվացման գործողությունը, որը կիրառվել է Ֆեյզիևի ընտանիքի անդամների հաշիվներին գումար փոխանցելու համար, ներառել է մի շարք կեղծ փաստաթղթեր և պայմանագրեր։ Նրա խոսքով՝ դա կապված է նաև «կլոնավորված» և այլ կեղծ ընկերությունների օգտագործման հետ՝ Էստոնիայի և Լատվիայի բանկերի միջոցով փող փոխանցելու համար։
Փաստաբանը հավելել է, որ իրականում Ֆեյզիևի կնոջ, որդու և զարմիկի հաշիվներին եղած փողերն, ամենայն հավանականությամբ, «կոռուպցիայի, գողության, խարդախության և փողերի լվացման» միջոցով ստացված եկամուտներ են։
«Գումարները ստացվել են Լատվիայի ABLV բանկում պատգամավորի հաշվից, որն, իր հերթին, գրեթե 34,5 մլն դոլարի փոխանցում է ստացել նույն բանկի մեկ այլ հաշվից, որը պատկանում է Avromed ընկերությանը, որի համահիմնադիրն է նա», — հայտարարել է փաստաբանը։
Նա հավելել է, որ փողերի փոխանցման համար օգտագործվող կասկածելի մեթոդների օրինակները ներառել են գործարքներ, որոնք «առևտրային իմաստ» չեն ունեցել։ Այսպես, Լատվիայի ABLV բանկում Avromed հաշվին խոշոր վճարումներ են կատարվել ապրանքների ենթադրյալ մատակարարման համար, որին հետևել են նույնատիպ գումարների փոխանցումներ Ֆեյզիևի, ինչպես նաև նրա ընտանիքի անդամների անձնական հաշվներին։
«Ինչպե՞ս, գրողը տանի, կարող է ընկերությունը գումար վաստակել՝ բաժանելով այն», — ասել է Թոմփսոնը։ Նրա պնդմամբ՝ բացատրությունն այն է, որ իրականում ոչ մի բիզնես էլ չի եղել, և Avromed-ի հաշիվները պարզապես օգտագործվել են բանկային համակարգով ապօրինի գումարների փոխանցման համար։
Ո՞վ է Ջավանշիր Ֆեյզիևը
58-ամյա քաղաքական գործիչը երեք անգամ (2010, 2015 և 2020 թթ-ին) Ադրբեջանի Միլլի Մեջլիսի պատգամավոր է ընտրվել։ Նա միջազգային հարաբերությունների միջխորհրդարանական կապերի խորհրդարանական կոմիտեի անդամ է։
Նա նաև փիլիսոփայության դոկտոր է, մամուլի խորհրդի կառավարման անդամ և Ադրբեջանի գրողների միության անդամ։
Չնանյած նրան, որ Ադրբեջանի օրենքներով՝ պատգամավորին արգելվում է բիզնեսով զբաղվել, Ֆեյզիևը երկրում հայտնի է նրանով, որ փաստացի Avromed դեղագործական ընկերության սեփականատերն է։ Թեև ընկերությունում այդ փաստը հերքում են։ Սակայն ավելի ուշ պատգամավորը խոստովանել է, որ մինչև 2010 թվականն աշխատել է որպես ընկերության տնօրեն, սակայն 2016 թ-ին վաճառել է արժեթղթերի իր մասը։
Ոչ վաղ անցյալում՝ 2019 թ-ին, Ջավանշիր Ֆեյզիևի անունը կապվում էր Բաքվի կենտրոնում գերթանկարժեք անշարժ գույքի գնման սկանդալային գործի հետ։
