ԵՄ արտաքին քաղաքականության հարցերով բարձր ներկայացուցիչ Ժոզեպ Բորելը Վրաստանի քաղաքական առաջնորդներին կոչ է արել հետ կանչել «օտարերկրյա գործակալների» մասին օրինագիծը և «երկիրը չշեղել եվրոպական ուղուց»։
«Վերջին շաբաթների ընթացքում Վրաստանի հազարավոր քաղաքացիներ դուրս են եկել փողոցներ՝ իրացնելու խաղաղ ցույցերի իրենց իրավունքը և ևս մեկ անգամ կառավարությունից պահանջել են հետ կանչել օտարերկրյա ազդեցության թափանցիկության մասին օրինագիծը:
Անցյալ տարի տպավորիչ կադրեր տեսանք Վրաստանից։ Բոլոր տարիքի մարդիկ իրենց ձեռքում պահում էին Վրաստանի և Եվրամիության դրոշները՝ ցույց տալով իրենց ամուր աջակցությունը ժողովրդավարությանը և համաեվրոպական արժեքներին։ Այդ ժամանակ իշխող կուսակցությունը և կառավարությունը հրապարակավ խոստացան Վրաստանի քաղաքացիներին, որ նման օրինագիծ այլևս երբեք օրակարգ չի վերադառնա։
Ես Վրաստանի քաղաքական առաջնորդներին կոչ եմ անում հետ կանչել օրինագիծը։ Ինչպես անցյալ տարի, հիմա էլ ակնհայտ է, որ այդ օրենքն անհամատեղելի է ԵՄ նորմերի ու արժեքների հետ։
Եթե այս օրենքն ընդունվի, դա կվտանգի Վրաստանի առաջընթացը Եվրամիությանն անդամակցելու ճանապարհին: Այս օրենքի ընդունումը կանդրադառնա նաև ԵՄ կողմից վրաց ժողովրդին տրամադրվող աջակցության վրա, քանի որ այդ աջակցության մի մասը տրվում է տեղական ոչ կառավարական կազմակերպությունների միջոցով։
Թափանցիկությունը չպետք է օգտագործվի որպես քաղաքացիական հասարակության ազատությունը սահմանափակող գործիք։
Վրացիների ապագան Եվրոպայում է: Անցյալ տարվա դեկտեմբերին Վրաստանին [ԵՄ անդամության] թեկնածուի կարգավիճակի տրամադրումը մեր հարաբերությունները դարձրեց ավելի սերտ, քան երբևէ։ Մեր դուռը բաց է, ուստի ես Վրաստանի ղեկավարներին կոչ եմ անում ընդառաջ գնալ քաղաքացիների ակնկալիքներին և երկիրը չշեղել եվրոպական ուղուց»,- ասել է Բորելը:
Եվրախորհրդարանը հրապարակել է Վրաստանի վերաբերյալ բանաձևի վերջնական նախագիծը։ Բանաձևը խստորեն դատապարտում է «օտարերկրյա գործակալների մասին» օրինագիծը և հայտարարում, որ այն չի համապատասխանում Եվրամիության արժեքներին և սկզբունքներին։ Բանաձևի համաձայն՝ այս օրինագիծը վնաս է հասցնում Վրաստանի միջազգային վարկանիշին և սպառնում է երկրի եվրաատլանտյան ինտեգրմանը։ Փաստաթուղթը Վրաստանի խորհրդարանին կոչ է անում դադարեցնել օրինագծի քննարկումը, իսկ իշխանություններին հորդորում է հարգել բնակչության հավաքների և խաղաղ ցույցերի ազատության իրավունքը։
