Հայաստանում սկսել են զբաղվել առևտրի ոլորտով․ նոր կանոնները դժգոհության առիթ են դարձել

Հայաստանում գործարարներն, ովքեր ապրանք են ներկրում, սեպտեմբերի 9–ին բողոքի ակցիա են անցկացրել։ Նրանց դժգոհությունը կապված է մաքսային նոր կանոնների հետ, որոնք ուժի մեջ են մտել սեպտեմբերի 1–ին։ Այժմ ներկրողներն ապրանքը պետք է մաքսազերծեն՝ միջազգային չափանիշների համապատասխան։ Դա նշանակում է, որ այժմ պետք է հայտարարագրել յուրաքանչյուր ապրանք առանձին–առանձին, իսկ հանրագումարը կախված կլինի դրանց արժեքից։

Բացի այդ, սեպտեմբերի 9–ին Երևանում փողոցային առևտրի համար նոր կանոններ և սահմանափակումներ են սահմանվել։ 

● «Հայաստանի շրջանները կզարգանան, եթե ինձ պես մարդիկ չլքեն դրանք»

● Հայաստանում աշխատավարձերի ֆոնդը վերջին մեկ տարում աճել է՝ չնայած ճգնաժամին 

Ինչի՞ց են դժգոհ ներկրողները

Ներկրողների դժգոհությունը պայմանավորված է դրանով, որ նախկինում հագուստ ներկրելու դեպքում իրենք մեկ կիլոգրամի դիմաց 4 դոլար էին վճարելում, իսկ այժմ նրանք պետք է մաքսազերծեն յուրաքանչյուր ապրանքը։

Ակցիայի ընթացքում գործարարները նշում էին, որ մաքսազերծման նոր կանոնների պատճառով իրենց 6 անգամ ավելի շատ են վճարելու, իսկ դա, իր հերթին, հանգեցնելու է շուկայում գների աճի։

Ցուցարարներից մեկը պատմել է, որ ապրանքը Հայաստան է բերել և թողել հենց մաքսատանը․

«Եթե դեռ օգոստոսի 31–ին մաքսազերծումը 54 հազար դրամ պետք է արժենար, ապա հիմա ամեն ինչ վեց անգամ ավելի թանկ է լինելու՝ 316 հազար դրամ։ Շատերը հատուկ չեն մաքսազերծել ապրանքը, քանի որ սպասում են գործող կանոնների չեղարկմանը»։

Կառավարությունից ակտիվիստների մոտ ոչ ոք դուրս չեկավ։ Նրանք շարժվեցին դեպի Պետեկամուտների կոմիտե։

Մինչ գործարարները բողոքի ակցիա էին անցկացնում, Պետեկամուտների կոմիտեն հայտարարությամբ հանդես եկավ, որում ասվում է, թե նախօրեին երկու կողմերի ներկայացուցիչները հանդիպել են և պայմանավովել հաջորդ օրը բոլոր հարցերը քննարկել արարատյան մաքսատան ղեկավարության հետ աշխատանքային խորհրդակցության ժամանակ․

«Սակայն քաղաքացիները որոշ ժամանակ անց նշեցին, որ հրաժարվում են աշխատանքային հանդիպումից և նախընտրում բողոքի ակցիա կազմակերպել կառավարության շենքի մոտ», — ասված է ՊԵԿ հաղորդագրությունում։

Փողոցային առևտրականների աշխատանքի սահմանափակումների մասին

2021 թ–ի հունվարի 1–ից Երևանում փողոցային առևտուրն իրականացվելու է որոշակի պահանջների և սահմափակումների համաձայն։ Այսպիսի որոշում է կայացվել Երևանի ավագանու սեպտեմբերի 9–ի նիստին։

Այժմ փողոցային առևտուրը պետք է իրականացվի բացառապես ձեռքից ձեռք․ ապրանքը գետնին դնել չի կարելի։ Ապրանքի ցուցադրման համար վաճառասեղաններ, սայլակներ և այլ բաներ չի կարելի օգտագործել։

Դրա փոխարեն առևտրականները պետք է ունենան դրամարկղային մեքենաներ և բոլոր անհրաժեշտ փաստաթղթերը։

Նոր կանոնների սահմանումը քաղաքապետարանի աշխատակազմի առևտրի և սպասարկման բաժնի ղեկավար Հովիկ Սաֆարյանը բացատրել է նրանով, որ դա ընդամենը փողոցային առևտուրը քաղաքակիրթ ձևով կազմակերպելու միջոց է՝ ստեղծելով իրավական դաշտ։

Սակայն այս բացատրությունն այնքան էլ չի համոզել ավագանու «Լույս» ընդդիմադիր խմբակցությանը։

«Ինչպե՞ս պետք է մարդն աշխատի այդ պայմաններում։ Այսինքն՝ նրա ձեռքին լինելու է 10-15 փուչիկ, ՀԴՄ սարք, փաստաթղթեր, դրամապանակ, և նա իրավունք չի ունենալու ապրանքը գետնին դնել։ Ուզում եմ հասկանալ, թե ինչպես եք պատկերացնում այդ աշխատանքը», — ասել է խմբակցության անդամ Թեհմինա Վարդանյանը։

Փողոցային առևտրականները նոր կանոնները ոչ միանշանակ են ընդունել։ Ոմանք համաձայն են ՀԴՄ սարք ձեռք բերել, «միայն թե իրենց չհետապնդեն քաղաքապետարանի աշխատակիցները», մյուսները բողոքում են, որ «ամեն ինչ պետք է վզից կախել»։

Ի՞նչ են գրում սոցցանցերում

Ֆեյսբուքի հայկական տիրույթի օգտատերերի կարծիքները կիսվել են։

Ոմանք սատարում են առևտրականներին և գործարարներին, մյուսներն, ընդհակառակը, կարծում են, որ կառավարությունը ճիշտ որոշում է կայացրել։

 Ահա մի քանի մեկնաբանություն․

«Սեփական փորձից ասեմ․ գնացի Չարբախի «ԿԱՐԳՈ» գրասենյակ, փաստաթղթերը հանձնեցի, այնտեղից մեկնեցի արարատյան մաքսատուն։ Այնտեղից ինձ կրկին ուղարկեցին Չարբախ։ Այնտեղ հատ–հատ ստուգեցին ամեն մի շորը՝ պարզելով գինը։ Այդ ամենը տևեց ավելի քան չորս ժամ։ Շատ նյարդեր ու բենզին ծախսեցի։ 60 կիլո ապրանքը վերջում արդեն ուզում էի դեն նետել»։

«Մարդը վարկ է վերցրել, ապրանք ներկրել, իսկ հիմա պետք է այն թանկ վաճառի, բնականաբար, չի վաճառելու։ Եվ ինչպե՞ս հիմա նա պետք է վարկը մարի»։

«Երբ այդ խանութներ ես մտնում և խնդրում մի փոքր զեղչ անել, մեռնում են, բայց ոչ մի կոպեկ չեն իջնում։ Իսկ հիմա պետությունը պետք է նրանց ընդառաջի՞»։

«Մաքսազերծման գները եռակի բարձրացնելը թալան է»։