Բելգիան Վրաստանը հանել է գործընկեր անվտանգ երկրների ցանկից։ Հուլիսի 10-ից Վրաստանն այլևս ներառված չէ քաղաքացիություն չունեցող անձանց հարցերով Բելգիայի գլխավոր հանձնակատարի նորացված ցանկում։ Բելգիայի Թագավորությունը բացատրել է, որ որոշումը հիմնված է հանձնակատարի կարծիքի վրա։
Վրաստանն ընդգրկված էր գործընկեր անվտանգ երկրների ցանկում՝ Ալբանիայի, Սերբիայի, Կոսովոյի, Բոսնիա-Հերցեգովինայի, Չեռնոգորիայի, Հյուսիսային Մակեդոնիայի և Հնդկաստանի հետ միասին։
«Չափանիշ է հանդիսանում ոչ միայն ընդհանուր քաղաքականությունը (օրինակ՝ ժողովրդավարական ինստիտուտների առկայությունը, քաղաքական կայունությունը), այլև իրավական իրավիճակը և մարդու իրավունքների հանդեպ հարգանքը՝ Մարդու իրավունքների եվրոպական դատարանի (ՄԻԵԴ) չափանիշներին համապատասխան»,— ասված է թարմացված ցանկին կից որոշման մեջ։
Սալոմե Սամադաշվիլի, «Լելո» կուսակցություն.«Բելգիան նման որոշում է կայացրել, քանի որ Վրաստանի ներկայիս կառավարությունը չի կարողանում ապահովել երկրում օրենքի գերակայություն, սեփական քաղաքացիների իրավունքների պաշտպանություն, և այդ պատճառով Բելգիան որոշել է փախստականի կարգավիճակ տրամադրել Վրաստանի քաղաքացիներին՝ համապատասխան դիմումի արդյունքում պարզեցված ընթացակարգով՝ որպեսքաղաքացիներ մի երկրի, որտեղ սեփական կառավարությունը չի կարողանում պաշտպանել նրանց։
Երբ Բելգիան նման որոշում է ընդունում և հայտարարում, որ Վրաստանն անվտանգ երկիր չէ իր քաղաքացիների համար, կա լուրջ վտանգ, որ այլ երկրներ կհետևեն Բելգիայի օրինակին, և չի բացառվում, որ նրանցից որևէ մեկը օրակարգ մտցնի Վրաստանի և ԵՄ-ի միջև առանց վիզայի ռեժիմի կասեցման մեխանիզմի հարցը։ Մեր երկրի ռուսամետ իշխանությունն ամեն ինչ անում է, որպեսզի Վրաստանը վերջնականապեսդուրս բերի եվրոպական ուղեծրից, եվրոպական տարածքից»։
Գիա Վոլսկի, իշխող «Վրացական երազանք» կուսակցության ներկայացուցիչ, խորհրդարանի փոխխոսնակ . «Կարծում եմ, որ Բելգիայի որոշումը որոշակիորեն կապված է վերջին փոքրամասշտաբ բախումների հետ, բայց միևնույն ժամանակ այն քաղաքական բնույթ է կրում։
Վատ է, որ դա ուրախացնում է ընդդիմության որոշ հատվածին, և կարծում եմ, որ նրանց աշխատանքը այս ուղղությամբ ինտենսիվորեն շարունակվում է, որպեսզի ինչ-որ կերպ բացասական տեղեկատվություն հասցնեն Եվրոպա։ Սակայն փաստերը ցույց են տալիս, որ Վրաստանը մնում է զբոսաշրջային կենտրոն և հանդիսանում է անվտանգ երկիր։ Բավականին մեծ թիմ է աշխատում, որպեսզի ինչ-որ կերպ սահմանափակի Վրաստանի քաղաքացիների՝ առանց վիզայի տեղաշարժը դեպի Եվրոպա, սա այլ թեմա է, բայց շատ բան բացահայտեց մեր առօրյա կյանքում և ևս մեկ անգամ ապացուցեց, որ Վրաստանն ավելի շատ ներքին թշնամիներ ունի, քան հակառակորդներ արտաքին ձևաչափում և տարածքում»:
