Բաքվում կայացել է ֆեմինիստների բողոքի ակցիան․ ձերբակալվել է շուրջ 30 մարդ
Ավանդույթի համաձայն՝ մարտի 8-ին Բաքվի կենտրոնում ֆեմինիստները մտադիր էին բողոքի ակցիա անցկացնել ընտանեկան բռնության դեմ։ Նրանք ակցիային մի քանի օր պատրաստվել էին։ Ոստիկանությունը կոպտորեն կասեցրել է ակցիայի անցկացումը, մի քանի տասնյակ մարդ է ձերբակալվել։ Ձերբակալվածների թվում է JAMnews-ի թղթակիցը։
- Համավարակն ադրբեջանցի մարզիկներին վերածել է տաքսու վարորդների և փոստատարների
- Հերթական քաղաքական սկանդալը Վրաստանում․ «գաղտնալսում»՝ Իվանիշվիլիի որդու և վարչապետի մասնակցությամբ
- Կայուն անկայունություն Հայաստանում։ Ելքը ռեստա՞րտն է
Այն մասին, որ 2021 թ․ մարտի 8-ին Բաքվի կենտրոնում ֆեմինիստները պատրաստվում են ընտանեկան բռնության դեմ բողոքի ակցիա անցկացնել, վաղուց էր հայտնի։ Արդեն մի քանի տարի է, ինչ դա ավանդույթ է դարձել կանանց իրավունքների ադրբեջանցի պաշտպանների համար։
Ակցիայի նախապատրաստումը
Նշանակված ամսաթվից մեկ շաբաթ առաջ ֆեմինիստները փակ համերգ էին կազմակերպել, որի ժամանակ ներկայացրել էին կանանց իրավունքներին նվիրված երգեր։ Երգերի բառերի և երաժշտության հեղինակները հենց աղջիկներն էին, կատարում էին նույնպես նրանք։ Համերգի հեռարձակումը տեղի էր ունեցել մարտի 6-ին՝ ակցիայից երկու օր առաջ։
Նաև մարտի առաջին շաբաթվա ողջ ընթացքում աղջիկները հատուկ պաշտպանիչ դիմակներ էին կարել՝ կայանալիք ակցիայի կարգախոսներով, պաստառներ պատրաստել։
Առաջին ձերբակալությունները
Ակցիայից կես ժամ առաջ մի խումբ ֆեմինիստներ մտել են Շատրվանների հրապարակի մերձակայքում գտնվող սրճարան, որն ավանդական վայր է, և այդտեղ պատրաստվում էին ակցիա անցկացնել։
Մի քանի րոպե անց սրճարան են մտել իրավապահ մարմինների աշխատակիցները՝ քաղաքացիական հագուստով, և ձերբակալել ակցիայի մի քանի մասնակցի։ Ձերբակալվածների թվում էր նաև JAMnews-ի թղթակից Սևգի Իսմայիլբեյլին։
Ձերբակալվածներին տարել են անհայտ ուղղությամբ
Կոշտ ձերբակալություններ ակցիայի ժամանակ
Ժամը ուղիղ 15:00-ին հնչել են ֆեմինիստների առաջին կարգախոսները, որոնք հավաքվել էին քաղաքի կենտրոնում։ Սակայն նրանց պարզած պաստառներն առգրավել են ոստիկաններն այն բանից առաջ, մինչ որևէ մեկը կհասցներ կարդալ, թե ինչ է գրված դրանց վրա։
Կարգախոսներ հնչեցնողներին սկսել են ձերբակալել՝ մերթընդմերթ ֆիզիկական ուժ կիրառելով։
Մոտ 30 ձերբակալված, որոնք «չկան»
Ձերբակալությունների հետևանքով Բաքվի 9-րդ ոստիկանական բաժանմունքում էր հայտնվել ակցիայի մոտ 30 մասնակից։
Այդ նույն րոպեներին Ադրբեջանի ներքին գործերի նախարարությունը հայտարարություն էր տարածել Բաքվի կենտրոնում չարտոնված ակցիայի անցկացման փորձի կասեցման մասին։ Հաղորդագրությունում ընդգծվում էր, որ ակցիայի մասնակիցների շրջանում ձերբակալվածներ չկան։
Ծաղիկներ ձերբակալվածներին՝ ոստիկաններից
Մոտ երկու ժամ անց ձերբակալված ֆեմինիստներն ազատ էին արձակվել։
«Մեզ բոլորիս նստեցրել են բաժանմունքի դահլիճում։ Այնուհետև բոլորից բացատրագիր են վերցրել, հետո՝ կանչել բաժանմունքի պետի կաբինետ։
Այնտեղ մեզ հետ «բացատրական աշխատանք» են տարել։ Եվ պետը, մեզ շնորհավորելով մարտի 8-ի կապակցությամբ, փորձել է յուրաքանչյուրիս ծաղիկներ նվիրել, սակայն բոլորը հրաժարվել են», — JAMnews-ին պատմել է ձերբակալված Սևգի Իսմայիլբեյլին։
Ակցիան, այնուամենայնիվ, կայացել է
Այն բանից հետո, երբ ձերբակալվածներն ազատ են արձակվել, մի խումբ ֆեմինիստներ տեղափոխվել են քաղաքի մյուս հատված և Ձմեռային այգում պարզել իրենց պաստառները, ֆայերներ այրել։
Ոստիկանությունը կրկին միջամտել է, սակայն էլ ոչ ոքի չի ձերբակալել։
