Բաքվի մետրոյում փորձել են շորտեով մի աղջկա ծեծեն
Ադրբեջանական սոցցանցերում տեսանյութ է տարածվել, որում երիտասարդ մի աղջկա մետրոյի վագոնում վիրավորում են և նույնիսկ փորձում ծեծել այն բանի համար, որ նա չափազանց կարճ շորտ է հագել:
Յուրաքանչյուր ամառ, ըստ ժամանակացույցի, Բաքվում սրվում են վեճերն այն մասին, թե արդյոք կարելի է շորտ հագնել, որքանով է դա հարիր ազգային մտածելակերպին: Ադրբեջանական հասարակությունում շորտերը յուրօրինակ «ջրբաժան» են դարձել, սանձարձակության և անբարոյականության խորհրդանիշ՝ ոմանց համար, ազատության խորհրդանիշ՝ մյուսների համար:
Քննարկելով մետրոյի միջադեպը՝ շատ բլոգերներ, լրագրողներ և հանրային անձինք խոսում էին այն մասին, որ խնդիրը շորտերը չեն, այլ այն, որ դրանց ետևում շատ ավելի լուրջ խնդիրներ են կանգնած: Այսպես, օրինակ, փիլիսոփա Մուշվիգ Շուքուրովն այս միջադեպին մի քանի գրառում է նվիրել, որոնք վերաբերում են նրան, որ ուրիշների հագուստի կապակցությամբ վրդովմունքը բնակչության զգալի մասի նեղմտության և աղավաղված բարոյականության նշան է:
Ինչ վերաբերում է մյուս օգտատերերին, ապա նշենք մի քանի տիպիկ մեկնաբանություն.
«Հասարակությունում լիքն են հոգով աղքատ մարդիկ և կնոջը միայն որպես սեքսուալ օբյեկտ ընկալող «տղամարդիկ»: Այսպիսի հասարակությունում չկա և չի կարող լինել ոչ զարգացում, ոչ մշակույթ»։
«Եվրոպացի կանանց նայելիս միանգամից հասկանում ես, որ նրանք որոշակի կերպ են հագնվում, քանի որ իրենց այդպես է հարմար: Իսկ մեզ մոտ որոշ աղջիկներ ուշադրություն են գրավում չափազանց վառ դիմահարդարմամբ, բաց հագուստով, ընդգծված քայլքով, հետո էլ վրդովվում են, որ իրենց վրա ուշադրույթուն են դարձնում»։
«Սա առաջընթացի համար այն պայքարի շարունակությունն է, որը ժամանակին մղում էին մեր կանայք՝ փորձելով հանել չադրան»:
Նախորդ տարիներին պահպանողական քաղաքացիներին վրդովեցնում էին հիմնականում տղամարդկանց շորտերը: Պատգամավորներից մեկը նույնիսկ առաջարկեց նրանց մերկ ոտքերին թթու լցնել, որպեսզի էլ նման բան չանեն: Իրենց հերթին, շորտերի կողմնակիցները ֆլեշմոբեր են անցկացնում, դաժան «մարտեր» մղում սոցցանցերում և այլ միջոցներով փորձում են պաշտպանել ուրիշների և սեփական իրավունքը՝ հագնելու այն, ինչ ցանկանում են:
