Բաքվի բնակիչը դատի է տվել Ֆորմուլա-1-ի կազմակերպիչներին

Բաքվի բնակիչ Տատյանա Կրյուչկինան դատի է տվել Ֆորմուլա-1-ի «Ադրբեջանի Գրան պրիի» կազմակերպիչներին՝ նրանց մեղադրելով տեղաշարժվելու ազատության սահմանափակման և հանգստի իրավունքի խախտման համար: Նա քաղաքի կենտրոնական փողոցների և բաքվեցիների հանգստի ավանդական վայրերի ցանկապատումը մրցաշարի ժամանակ համարում է կամայականություն և մարդու իրավունքների կոպիտ խախտում:

Բաքուն աշխարհի երեք քաղաքներից մեկն է, որտեղ Ֆորմուլա-1-ի մրցաշարն անցկացվում է ոչ թե հատուկ կառուցած մայրուղում, այլ քաղաքի կենտրոնական փողոցներում: Եվ եթե Մոնակոյի և Սինգապուրի դեպքում նման որոշումը կարելի է բացատրել այդ քաղաքների աշխարհագրական դիրքով (այնտեղ պարզապես ազատ տարածք չկա), ապա Բաքվի կենտրոնում մրցաշարի անցկացումն արդեն երկրորդ տարին է, ինչ Ադրբեջանի մայրաքաղաքի բնակիչների դժգոհությունն է առաջացնում:

«Քաղաքի կենտրոնը փակում են բետոնե բլոկերով, ծածկում ցանցով: Դա այնպիսի տեսք ունի, կարծես քաղաքը տեղափոխել են կենդանաբանական այգու հսկայական մի վանդակ: Այս տարի նորարարություն է հայտնվել. արգելապատնեշների մոտ մարդկանց են կանգնեցրել՝ զինվորական համազգեստի վրայից կանաչ բաճկոններով», — ասել է Կրյուչկինան «Թուրան» գործակալությանը՝ մեկնաբանելով դատարան դիմելու իր որոշումը:

«Մարդիկ չեն կարողանում ազատ տեղաշարժվել, չեն կարողանում աշխատավայր հասնել, քանի որ տրանսպորտի հետ կապված խնդիրներ են առաջանում, բացի այդ, նրանք նորմալ չեն էլ կարողանում հանգստանալ: Մենք հունիսի 23-ին ուզում էինք բուլվար գնալ, սակայն չկարողացանք: Մեզ կանգնեցրին ոստիկանության աշխատակիցներն ու ասացին, որ բուլվարի մուտքը փակ է: Բուլվարը հանրային օբյեկտ է, և ոչ ոք իրավունք չունի արգելելու քաղաքացիներին այնտեղ զբոսնել», — հավելել է Կրյուչկինան:

Դատարանում Կրյուչկինայի հայցը պաշտպանելու է իրավաբան Սամիրա Աղաևան: Որպես պատասխանող կողմ հանդես է գալիս բուլվարի կառավարչությունը, Ադրբեջանում Ֆորմուլա-1-ի կազմակերպիչ ընկերությունը (որը գլխավորում է սպորտի և երիտասարդության նախարարի տղան) և Բաքու քաղաքի գործադիր իշխանությունը:

«Ազատ տեղաշարժվելու իրավունքը կարգավորվում է Մարդու իրավունքների եվրոպական կոնվենցիայի համար 4 արձանագրության երկրորդ հոդվածով: Դրանում ասված է, որ ոչ ոք չի կարող սահմանափակել մարդու տեղաշարժը: Ճիշտ է, այնտեղ որոշակի բացառություններ կան, սակայն դրանք չեն վերաբերում նրան, ինչ կատարվում էր Ֆորմուլա-1 մրցաշարի ժամանակ: Բացի այդ, հայցադիմումի մեջ նշված է հանգստի՝ քաղաքացիների սահմանադրական իրավունքի խախտման մասին. բուլվարը փակ էր մրցաշարի ժամանակ և դրա ավարտից ևս երկու օր անց:

Մենք մատնացույց ենք արել նաև Եվրոպական կոնվենցիայի համար 14 հոդվածը, որում ասվում է, որ ոչ ոք չի կարող խտրականության ենթարկվել: Սակայն հենց դա էր տեղի ունենում Բաքվում Գրան պրիի օրերին: Բուլվար կարող էին հասնել միայն նրանք, ովքեր տոմսեր ունեին, և միայն նրանք կարող էին օգտվել հանգստի բոլոր իրավունքներից, ի տարբերություն տոմս չունեցողների», — Աղաևայի խոսքերն է մեջբերում «Թուրան» գործակալությունը:

«Չեմ կարծում, որ տեղական ատյաններում հնարավոր է հաջողության հասնել: Սակայն, դիմելով դատարան, մենք փորձում ենք ստեղծել նախադեպ, քանի որ մրցաշարն անցկացվելու է ևս 3 տարի: Եթե տեղական դատարանները ոչ մեր օգտին որոշում կայացնեն, մենք կդիմենք Մարդու իրավունքների եվրոպական դատարան», — ասել է Աղաևան: