Բաքուն պատրա՞ստ է հյուրընկալել COP29-ը. մեկնաբանություն
Բաքուն կհյուրընկալի COP29-ը
Հաջորդ տարի Ադրբեջանը կհյուրընկալի Կլիմայի փոփոխության մասին ՄԱԿ-ի շրջանակային կոնվենցիայի մասնակիցների կոնֆերանսի 29-րդ նստաշրջանը՝ COP29-ը։ Անգամ Հայաստանը հետ կանչեց իր թեկնածությունը՝ հօգուտ Ադրբեջանի։ Ի՞նչ է իրենից ներկայացնում այս կոնֆերանսը և ինչո՞ւ է այդքան կարևոր: Ի՞նչը կարող է խանգարել Բաքվին ընդունել այն:
- «Խաղաղության խաչմերուկը» կօգնի մեծացնել դեպի ծով ելքի հնարավորությունը»․ Փաշինյան
- ԼՂ-ի հայերի ուղերձն աշխարհին. ի՞նչ արձագանքի սպասել
- 15 մլն դրամ՝ ծառայությունից խուսափելու դիմաց․ քննարկում ԱԺ-ում
Դուբայում ՄԱԿ-ի Կլիմայի փոփոխության շրջանակային կոնվենցիայի մասնակիցների կոնֆերանսի 28-րդ նստաշրջանում հայտարարվել է, որ հաջորդ նստաշրջանը 2024 թվականին կհյուրընկալի Ադրբեջանը։
Հայաստանն ու Բուլղարիան իրենց թեկնածությունները հետ են կանչել՝ հօգուտ Ադրբեջանի։ Դեկտեմբերի 7-ին Երևանն այդ մասին հայտնել է՝ հրապարակելով Հայաստանի վարչապետի աշխատակազմի և Ադրբեջանի նախագահի վարչակազմի համատեղ հայտարարությունը։
Փոխարենը Ադրբեջանն իր աջակցությունն է հայտնել Արևելյան Եվրոպայի խմբի «COP»-ի բյուրոյին անդամակցելու համար առաջադրված` Հայաստանի թեկնածությանը:
Ի՞նչ է COP-ը
Կլիմայի փոփոխության մասին ՄԱԿ-ի շրջանակային կոնվենցիան համաձայնագիր է, որը ստորագրվել է աշխարհի ավելի քան 180 երկրների կողմից, ներառյալ նախկին ԽՍՀՄ և բոլոր արդյունաբերական երկրները, այն կլիմայի փոփոխության վերաբերյալ երկրների գործողությունների ընդհանուր սկզբունքների մասին է: Կոնվենցիան հանդիսավոր կերպով ընդունվել է 1992 թվականին Ռիո դե Ժանեյրոյում տեղի ունեցած Երկրի գագաթնաժողովում և ուժի մեջ է մտել 1994 թվականի մարտի 21-ին։
2000 թվականից ի վեր ամեն տարի նիստեր են անցկացվում աշխարհի տարբեր մասերում:
Դուբայում COP28-ին մասնակցել են ավելի քան 140 երկրների առաջնորդներ։
Խոշորագույն իրադարձություն Ադրբեջանի համար
Տնտեսական հարցերով փորձագետ Ֆարիդ Մեհրալիզադեի խոսքով՝ կլիմայական կոնֆերանսի նիստը կլինի Ադրբեջանում կազմակերպված ամենամեծ միջոցառումը երկրի անկախացումից ի վեր։
JAMnews-ի զրուցակիցն ընդգծեց, որ այս տարի Դուբայում COP28-ին մասնակցել է շուրջ 80 հազար մարդ աշխարհի ավելի քան 100 երկրներից։ Տեխնիկական աշխատողների հետ միասին մասնակիցների թիվը գերազանցել է 100 հազարը։
Նախորդ տարի՝ 2022 թվականին, Մինսկում COP27-ին մասնակցել է մոտ 50 հազար հյուր։ «Այսինքն՝ սպասվում է տասնյակ հազարավոր մարդկանց և, իհարկե, երկրների և կառավարությունների ղեկավարների ժամանում աշխարհի ավելի քան 100 երկրներից», — նշել է Մեհրալիզադեն։
Լուրջ փորձություն Բաքվի համար
Փորձագետը նշել է, որ Բաքվի գոյություն ունեցող ենթակառուցվածքը լուրջ փորձության առաջ է կանգնելու։ Խոսքը, մասնավորապես հյուրանոցների և օդանավակայանի մասին է։
«2023 թվականի սկզբի պաշտոնական վիճակագրության համաձայն՝ Բաքվի բոլոր հյուրանոցները կարող են միաժամանակ ընդունել ընդամենը 24 հազար մարդու։ Ամբողջ Ադրբեջանում այս ցուցանիշը կազմում է 56 հազար։ Ինչպես երևում է այս թվերից, COP29-ին մասնակցելու համար Բաքու ենք գալու ավելի շատ հյուրեր, քան հյուրանոցները կարող են տեղավորել ոչ միայն բուն մայրաքաղաքում, այլև ողջ երկրում:
Կարելի է ենթադրել, որ այս նպատակով կառավարությունը կօգտագործի 2015 թվականի Եվրոպական խաղերի հյուրերի համար կառուցված «Օլիմպիական գյուղը»։ Բայց մեծ հարց է՝ արդյոք այնտեղ կան բավարար տեղեր։
Հետաքրքիր հարց է նաև այն, թե օդանավակայանը որքանով է պատրաստ մի քանի օրում այդքան մարդ ընդունելուն։ Եթե հիշում եք, Բաքվում կայացավ Եվրալիգայի ֆուտբոլի եզրափակիչը անգլիական «Չելսի» և «Արսենալ» ակումբների միջև։ Այդ ժամանակ 70 հազար երկրպագու տեղավորող մարզադաշտում դրսից ժամանած երկրպագուների համար հատկացվել էր ընդամենը 15 հազար տոմս։ ՈՒԵՖԱ-ն այդ որոշումը բացատրել էր Բաքվի օդանավակայանի լոգիստիկ հնարավորություններով։
Այսինքն՝ արդեն պարզ է, որ եթե Բաքուն պատրաստվում է ընդունել հյուրերի այնպիսի քանակ, ինչպիսին գրանցվել է СОР-ի նախորդ համանման նիստերում, ապա մայրաքաղաքի լոգիստիկ հնարավորությունները պետք է լրջորեն ավելացվեն։
Մյուս կողմից, երբ Բաքվում տեղի են ունենում միջոցառումներ, որոնց մասնակցում են միայն մի քանի երկրներ, ամբողջ քաղաքի ճանապարհները փակվում են։ Երբ պատկերացնում եմ, թե ինչ կարող է տեղի ունենալ COP29-ի օրերին, մազերս ակամայից բիզ-բիզ են կանգնում»։
