Ադրբեջանցի լրագրողին թույլ չեն տվել լքել Վրաստանը
Աֆղան Սադիգովի ելքն արգելվել է
«Ազատություն» ռադիոկայանի փոխանցմամբ՝ azel.tv ադրբեջանական լրատվամիջոցի հիմնադիր և գլխավոր խմբագիր Աֆղան Սադիգովին, ով բնակվում է Վրաստանում, հուլիսի 17-ին կանգնեցրել են Թբիլիսիի օդանավակայանում՝ թույլ չտալով ընտանիքի հետ մեկնել Թուրքիա։ Սահմանապահներն ասել են, որ նրա անձնագրի հետ կապված «ինչ-որ խնդիր» կա, ուստի նա միայն կարող է վերադառնալ Ադրբեջան։
Լրագրողի խոսքով՝ սա Ադրբեջանի նախագահի հերթական քաղաքական հրահանգն է, քանի որ նա քննադատում է Իլհամ Ալիևին։
Աֆղան Սադիգովը «Ազատություն» ռադիոկայանին ասել է, որ Ադրբեջանում իրեն երկու անգամ բանտ են նստեցրել քաղաքական դրդապատճառներով, յոթ ամիս առաջ տեղափոխվել է Վրաստան, և իր համար անվտանգ չէ Ադրբեջան վերադառնալը։
Սադիգովն ընդգրկվել է այն լրագրողների ցանկում, որոնց ազատ արձակումը 2019 թվականին պահանջել էր Լրագրողների պաշտպանության կոմիտե ամերիկյան կազմակերպությունը։
- Վրաստանի խորհրդարանի նախագահը հերթական անգամ թիրախավորել է JAMnews-ը
- «Ադրբեջանցի բլոգերը ցած է նետվել Թբիլիսիի շենքերից մեկի տանիքից երկու շաբաթ առաջ»․ գործի նոր մանրամասները
Հիշեցնենք, որ 2023 թվականի հունվարի 12-ին ադրբեջանցի ընդդիմադիր լրագրող Սեյմուր Հեզիին, ով նույնպես ակտիվորեն քննադատում է Իլհամ Իլիևին, թույլ չէին տվել մուտք գործել Վրաստան, նրան մերժել էին սահմանային հսկիչ անցակետում՝ առանց որևէ բացատրության։
Լրագրող-քաղաքական էմիգրանտ Աֆղան Մուխթարլիի (որին ժամանակին Վրաստանից առևանգել էին և Ադրբեջանում բանտարկության դատապարտել) կարծիքով՝ այս բոլոր միջադեպերը Վրաստանի և Ադրբեջանի իշխանությունների համագործակցության արդյունք են։
