Աֆղան Մուխտարլիի ընտանիքը լքել է Վրաստանը

Թբիլիսիից առևանգված ադրբեջանցի լրագրող Աֆղան Մուխտարլիի կինը՝ Լեյլա Մուստաֆաևան, իր մանկահասակ երեխայի հետ երեկ լքել է Վրաստանը:

Ինչպես Ֆեյսբուքում գրել է Մուստաֆաևայի փաստաբան Արչիլ Չոպիկաշվիլին, այժմ նրանք գտնվում են Գերմանիայում:

«Քննության հանդեպ ունեցած դժգոհությունների պատճառով և հաշվի առնելով գոյություն ունեցող սպառնալինքերը՝ մեծ հավանականությամբ Լեյլա Մուստաֆաևան (ամուսնու պես) կարող էր առևանգվել և Ադրբեջանի կողմից քաղաքական հետապնդումների զոհ դառնալ»:

On.ge-ի հետ զրույցում Լեյլա Մուստաֆաևան հայտարարել է, որ դեռևս վերջնականապես չի որոշել՝ մնա՞լ Եվրոպայում, թե՞ ոչ:

Վրաստանում եղած ժամանակ Մուստաֆաևան հայտարարել է, որ իրեն հետապնդում են, և նա իրեն անվտանգ չի զգում: Սեպտեմբերի 19-ին Լեյլա Մուստաֆաևան Թբիլիսիում գտնվող ադրբեջանցի քաղաքական ակտիվիստ Դաշգն Աղալարլիի հետ համատեղ մամուլի ասուլիս է անցկացրել, որի ժամանակ ցուցադրել է իր հնարավոր հետապնդման կադրեր: Մուխտարլիների ընտանիքի փաստաբան Արչիլ Չիպիկաշվիլին չի բացառում, որ Մուստաֆաևայի և Աղալարլիի դեմ որևէ հանցագործություն կարող է նախապատրաստվել:

Մինչև Եվրոպա մեկնելը Մուստաֆաևան դիմել է Վրաստանի խորհրդարանին՝ խնդրելով հատուկ հանձնաժողով ստեղծել լրագրողի առևանգման հետ կապ ունեցող պաշտոնյաների գործողություններն ուսումնասիրելու համար:

Թբիլիսիի կենտրոնում ադրբեջանցի ընդդիմադիր լրագրող Աֆղան Մուխտարլիի անհետացումից հինգ ամիս է անցել: Սակայն առևանգման հանգամանքներում ոչ մի նոր բան չի բացահայտվել:

• Մուխտարլին անհետացել է Թբիլիսիում 2017թ. մայիսի 29-ին: Ավելի ուշ հայտնի դարձավ, որ նա գտնվում է Ադրբեջանի իրավապահ մարմինների մոտ: Մուխտարլիի խոսքով՝ Վրաստանից իրեն առևանգել են տեղի հատուկ ծառայությունները, գլխին պարկ են հագցրել և փոխանցել ադրբեջանական կողմին: Ադրբեջանի դատարանը մայիսի 31-ին որոշում կայացրեց կալանավորել Մուխտարլիին. նրա դեմ մեղադրանք է առաջադրված պետական սահմանը խախտելու, մաքսանենգության և սահմանապահին դիմադրություն ցույց տալու հոդվածներով: Մուխտարլին չի ընդունում այդ մեղադրանքները: Հոկտեմբերի 4-ին Բաքվի դատարանը չբավարարեց նրան գրավի դիմաց ազատ արձակելու միջնորդությունը:
  

• Եվրախորհրդարանը Թբիլիսիին կոչ է արել օպերատիվ քննություն անցկացնել լրագրողի առևանգման գործով, իսկ Բաքվին՝ ազատ արձակել նրան: Լրագրողի առևանգումից և ձերբակալումից անմիջապես հետո նրա պաշտպանները դիմել են Մարդու իրավունքների եվրոպական դատարան՝ խնդրելով առաջնահերթ կարգով քննել իրավունքների խախտման վերաբերյալ նրա բողոքը: Մարդու իրավունքների եվրոպական դատրանը Մուխթարլիի գործին տվել է առաջնահերթ կարգավիճակ. այն կքննեն հնարավորինս կարճ ժամկետներում: