Աֆղան Մուխտարլիի գործը. վրացի լրագրողները հանդիպել են Եվրամիության դեսպանին

Վրացի լրագրողները հանդիպել են Վրաստանում Եվրամիության դեսպան Յանոշ Հերմանի հետ: Հանդիպման թեման ադրբեջանցի լգարգրող Աֆղան Մուխտարլիի գործն էր, որը մայիսի 29-ին անհետացել էր Թբիլիսիի կենտրոնից, իսկ ավելի ուշ՝ հայտնաբերվել Բաքվի բանտում:

Յանոշ Հերմանը լրագրողներին հայտարարել է, որ հետաքրքրված է այդ գործով և անհանգստացած կատարվածով: Լրագրողները հանդիպմանը նշել են, որ Մուխտարլիի անհետացումը չեղարկել է այն միֆը, թե Վրաստանում խոսքի ազատությունն ավելի լավ է պաշտպանված, քան հարևան երկրներում: Սակայն, ըստ մեդիաներկայացուցիչների, Յանոշ Հերմանը չի համաձայնել այդ պնդման հետ:

«Նա ասաց մեզ, որ Վրաստանի և Ադրբեջանի միջև մեծ տարբերություն կա, և նա չի կարող նույնականացնել այդ երկու երկրները», — ասել է «Մոնիտոր» հետազոտական ստուդիայի լրագրող Նանա Բիգանիշվիլին:

Վրաստանի լրագրողական էթիկայի խարտիայի գործադիր տնօրեն Նաթա Ձվելիաշվիլին նշել է, որ, ի տարբերություն Վրաստանի իշխանությունների, դիվանագիտական կորպուսը հասկանում է հարցի կարևորությունը: ԵՄ ներկայացուցիչները տեղեկատվություն են հավաքում կատարվածի մասին տեղական իշխանություններից, քաղաքական կուսակցություններից և նախագահից և միայն դրանից հետո են պատրաստվում եզրակացություններ անել:

Վաղը՝ հունիսի 6-ին, լրագրողները պատրաստվում են հանդիպել Վրաստանում ԱՄՆ դեսպանի հետ: Միաժամանակ մամուլի ներկայացուցիչներին չի հաջողվում հանդիպել Վրաստանի խորհրդարանի նախագահի հետ:

Արդեն երրորդ օրն է, ինչ նրանք պաշտոնական նամակով դիմել են խոսնակին, սակայն պատասխան դեռ չեն ստացել: ԶԼՄ ներկայացուցիչներն ասում են, որ պատրաստվում են հանդիպել բոլորին, ովքեր կարող են գոնե ինչ-որ ազդեցություն ունենալ Վրաստանի իշանությունների վրա:

Վերջին մի քանի օրվա ընթացքում Մուխտարլիի անհետացման առթիվ հայտարարություններ են արել ԱՄՆ պետդեպն ու ԵՄ արտաքին քաղաքականության հարցերով գերագույն ներկայացուցիչը:

Նրանք կոչ են արել Վրաստանի կառավարությանն ապահովել ժամանակին և թափանցիկ հետաքննություն: Նրանք դիմել են նաև Ադրբեջանի կառավարությանը՝ կոչ անելով կատարել միջազգային պարտավորություններն ու ազատ արձակել բոլոր անձանց, որոնք ձերբակալվել են իրենց հիմնարար իրավունքների օգտագործման համար:

«Վրաստանում ապրող Ադրբեջանի քաղաքացիների առևանգումն ու ինքնակամ ապօրինի ձերբակալումն, այդ թվում՝ իրավապաշտպանների, ինչպես հայտարարվել է, և դրան հետևած կալանքն ու քրեական հետապնդումն Ադրբեջանում պահանջում է անհապաղ, խորքային և թափանցիկ հետաքննություն: Մենք ողջունում ենք նման հետաքննության մեկնարկը Վրաստանում, որի մասին հայտարարել են Վրաստանի իշխանությունները: Ակնկալում ենք, որ պաշտպանվելու են քաղաքացիական և քաղաքական իրավունքներն, ինչպես նաև ապահորվելու են արտասահմանյան այն քաղաքացիների իրավունքները, որոնք օրինական ձևով ապրում են երկրում: Եվրամիությունն ուշադիր հետևում է այդ գործին», — ասված է Ֆեդերիկա Մոգերինիի հայտարարությունում:

Լրագրող Աֆղան Մուխտարլին Վրաստան է եկել Ադրբեջանից 2014թ-ին և կեցության իրավունք ստացել: Տեղափոխվելու պատճառ են հանդիսացել Ադրբեջանի իշխանությունների կողմից հաճախակի դարձած ճնշումները: Նրա մի քանի դիմումները Մարդու իրավունքների եվրոպական դատարան դիտարկման փուլում են: Վերջին ժամանակներս նա համագործակցում էր միջազգային լրատվամիջոցների և IWPR և Meydan.tv կազմակեպությունների հետ:

Ադրբեջանցի լրագրող Աֆղան Մուխտարլին անհետացել է Թբիլիսիում 2017թ-ի մայիսի 29-ին: Ավելի ուշ պարզվել է, որ նա ադրբեջանական իրավապահ մարմինների մոտ է: Մուխտարլիի խոսքով՝ Վրաստանում նա առևանգվել է տեղական հատուկ ծառայությունների աշխատակիցների կողմից, նրա գլխին պարկ են հագցրել և փոխանցել ադրբեջանական իրավապահներին: Ադրբեջանական դատարանը Մուխտարլիին 3 ամսվա նախնական կալանքի է դատապարտել սահմանի ապօրինի հատման և մաքսանենգության համար: Մուխտարլիի խոսքով՝ նրա գրպանը 10 հազար եվրո են գցել: