ՀՀ-ում կգործարկվեն զբաղվածության ծրագրեր ԼՂ-ից բռնի տեղահանվածների համար
Արցախցիների աշխատանքի տեղավորում
Հայաստանի կառավարությունը Լեռնային Ղարաբաղից բռնի տեղահանված անձանց կաջակցի նաև աշխատանքի տեղավորման հարցում։ Առկա թափուր աշխատատեղերը համալրելու նպատակով նրանք կանցնեն մասնագիտական ուսուցում և վճարվող աշխատանքային պրակտիկա։
Համմաձայն գործադիրի՝ հունվարի 11-ի նիստում ընդունված որոշման՝ այս նոր ծրագրում ընդգրկվելու է շուրջ 1000 շահառու։ Պետությունն այս նպատակին է ուղղելու շուրջ 816,150.0 հազար դրամ։
Որոշման բոլոր մանրամասները
Կայուն զբաղվածություն արցախցիների համար
Որոշման նախագծի հիմնավորման համաձայն՝ դրա շրջանակում ակնկալվում է գործատուների առկա թափուր աշխատատեղերը համալրել ԼՂ-ից բռնի տեղահանվածներով։ Այն մարդկանց, որոնք ունեն անհրաժեշտ մասնագիտական կարողություններ և հմտություններ։ Այդպիսով կապահովվի նրանց կայուն զբաղվածությունը։
Կառավարությունը նման որոշում է կայացրել՝ ելնելով արցախցիների «աշխատաշուկայում առավել մրցունակ դառնալու և աշխատանքի տեղավորվելու անհրաժեշտությունից»։
Աշխատանքի և սոցիալական հարցերի նախարար Նարեկ Մկրտչյանի խոսքով՝ ծրագիրը փորձարկված է։ Նախկինում շահառու են հանդիսացել 2016 թ․-ի ապրիլյան և 2020 թ․-ի 44-օրյա պատերազմներին մասնակցած զինծառայողները։
«Հետևել ենք ավելի քան մեկ տարի և տեսել ենք, որ մեր ծրագրի շահառուների 70 տոկոսից ավելին շարունակում են մնալ աշխատաշուկայում, որոնք և՛ կրթություն են ստացել, և՛ վերապատրաստվել են նմանատիպ ծրագրերի միջոցով»,- շեշտել է նախարարը։
Ծրագիրն ունի 3 ուղղություն
ԱՍՀ նախարար Նարեկ Մկրտչյանի փոխանցմամբ՝ որոշումը ներառում է բռնի տեղահանված անձանց զբաղվածության ապահովման 3 ուղղություն։ Դրանք են՝
- մասնագիտական ուսուցում և աշխատանքի տեղավորում,
- աշխատանքային փորձի ձեռքբերում և աշխատանքի տեղավորում,
- մասնագիտական ուսուցում, աշխատանքային փորձի ձեռքբերում և աշխատանքի տեղավորման։
Արցախցիներին՝ ուսման վարձի, գործատուներին՝ հարկերի փոխհատուցում
Մասնագիտական ուսուցումը (1-ին ուղղություն) կազմակերպվելու է մինչև 6 ամիս տևողությամբ։ Այդ ամբողջ ընթացքում շահառուին ամեն ամիս վճարվելու է 50 հազար դրամ կրթաթոշակ, ինչպես նաև նույնքան գումար՝ որպես ուսման վարձի փոխհատուցում։
Ուսուցումն ավարտելուց հետո գործատուի և շահառուի միջև կնքվելու է աշխատանքային պայմանագիր առնվազն 3 ամիս ժամկետով։ Այս պարագայում գործատուին ոչ ավելի, քան 3 ամիս ժամկետով տրամադրվելու է ամսական 50 հազար դրամ աջակցություն՝ որպես հարկերի և պարտադիր վճարների փոխհատուցում։ Այս փոխհատուցումը նախատեսված է նաև 2-րդ և 3-րդ ուղղությունների դեպքում։
Աշխատանքային փորձի ձեռքբերման (2-րդ ուղղություն) պարագայում, ըստ որոշման, ակնկալվում է, որ գործատուի և աշխատողի միջև կկնքվի առնվազն 6 ամիս ժամկետով աշխատանքային պայմանագիր, որից առաջին 3 ամսվա ընթացքում կկազմակերպվի վճարվող պրակտիկա։ Ծրագրի շրջանակներում շահառուի աշխատավարձի վճարման համար գործատուին 3 ամիս շարունակ կտրամադրվի փոխհատուցում` ամսական 165․000 դրամ։
Երրորդ ուղղությունը ենթադրում է նախորդ երկուսի համատեղ իրականացում, ինչը ենթադրում է, որ կկազմակերպվի 6 ամիս տևողությամբ ուսուցում, որի ընթացքում շահառուն կստանա ուսման վարձի փոխհատուցում և կրթաթոշակ։ Այդ փուլի ավարտից հետո էլ նրա հետ կկնքվի առնվազն 6 ամիս ժամկետով պայմանագիր, որից 3 ամիսը վճարվող պրակտիկան է։ Վերջին ուղղության դեպքում ևս շահառուի աշխատավարձի վճարման համար գործատուին կտրամադրվի եռամսյա փոխհատուցում՝ ամսական 165․000 դրամ։
Հետևեք մեզ — Facebook | Youtube | Telegram
Արցախցիների աշխատանքի տեղավորում
