«Կարծես կա լուռ համաձայնություն՝ Ադրբեջանի հետ մեզ թողնել մեն-մենակ»․ ԼՂ նախագահ
Արցախի նախագահը՝ պայքարը շարունակելու մասին
«Կարծես թե կա լուռ համաձայնություն, որ Ադրբեջանի հետ մեզ թողնեն մեն-մենակ և Ադրբեջանն օգտագործի ճնշման մեթոդը… Սա արդեն ճնշում չէ, մենք գտնվում ենք այն կարգավիճակում, որ ցեղասպանության եզրին ենք»,- Բաքու-Ստեփանակերտ երկխոսության մասին ասել է Արցախի նախագահը։
Արայիկ Հարությունյանի գնահատմամբ՝ դա երկխոսություն անվանել չի կարելի։ Ասում է՝ ընդամենը «դրդում են ընդունել Ադրբեջանի պահանջները, որոնք անընդունելի են»։ Նա հաստատել է մամուլում շրջանառվող տեղեկություններն այն մասին, որ Արևմուտքի միջնորդությամբ օգոստոսի 1-ին նախատեսված էր Ստեփանակերտ-Բաքու հանդիպում։ Շեշտել է, որ մասնակցելուց հրաժարվել է ադրբեջանական կողմը։
Արցախի Հանրային հեռուստաընկերությանը տված հարցազրույցի ընթացքում Հարությունյանն անդրադարձել է նաև Լեռնային Ղարաբաղում ստեղծված հումանիտար ճգնաժամին, Աղդամով հումանիտար բեռներ ուղարկելու ադրբեջանական առաջարկին, արցախցի Վագիֆ Խաչատրյանի առևանգմանը։ Հարցազրույցի հիմնական թեզն այն էր, որ ացախցիները և հանրապետության իշխանությունները չեն պատրաստվում հանձնվել և շարունակելու են պայքարել հանուն Արցախի ինքնորոշման և անկախության։
JAMnews-ը ներկայացնում է հարցազրույցի ամենաուշագրավ դրվագները։
«Ցանկացած հանդիպում չի կարող լինել երկխոսություն»
Բաքու-Ստեփանակերտ երկխոսության մասին նման կարծիք է հայտնել Արցախի նախագահը։
«Ցանկացած երկխոսություն, հանդիպում պետք է, առաջին հերթին, իրավահավասարության, արժանապատվության և իրավունքների շրջանակներում լինի։ Այդ երեք սկզբունքները խախտված են»,- հայտարարել է նա։
Անդրադառնալով նախկինում ռուս խաղաղապահների միջնորդությամբ Բաքվի ներկայացուցիչների հետ տեղի ունեցած հանդիպումներին՝ նշել է, որ «կար երկխոսություն, արդյունք էլ կար»․
«Բայց սկսած դեկտեմբերի 12-ից [Լաչինի միջանցքի փակման օրը] Ադրբեջանը փոխել է իր վարքագիծը՝ ուղղակի երկխոսությունը և հարգանքի մթնոլորտում զրույցները տեղափոխել է ճնշման, այսօր արդեն նաև ցեղասպանության եզրին կանգնած իրավիճակ»։
«Արցախը մի մեծ համակենտրոնացման ճամբար է, որտեղ Ադրբեջանը իրականացնում է ցեղասպանություն»
Հայտարարել է Արայիկ Հարությունյանը։ Ասել է, որ իրավիճակն Արցախում վաղուց արդեն անցել է հումանիտար աղետի սահմանն ու հավելել՝ «Ադրբեջանի ցեղասպան քաղաքականության ականատեսն ենք»․
«Պատահական չէ, որ օրեր առաջ ես դիմել եմ Միջազգային քրեական դատարանի նախկին գլխավոր դատախազ Լուիս Մորենո Օքամփոյին՝ փորձագիտական կարծիք հայցելով։ Հիմա արդեն ունենք նախնական եզրակացություն, որ սա ցեղասպանություն է»։
«Շրջափակմանը միջազգային հանրության արձագանքի արդյունքները զրոյական են»
Խոսելով Լեռնային Ղարաբաղի շրջափակման մասին՝ նկատել է՝ խոցելի են հատկապես հղիները, երեխաներն ու քրոնիկ հիվանդություն ունեցող անձինք։ Թերսնման, սթրեսի և այլ պատճառներով նրանց առողջական վիճակը վատթարանում է։ Նրա փոխանցմամբ՝ դեղատներում «կյանքը փրկող դեղատեսակների» սղություն կա․
«Տարբեր քրոնիկ հիվանդություններից մահվան դեպքերի աճը շարունակվում է։ Օրինակ՝ արյան շրջանառության համակարգի հիվանդություններից մահվան դեպքերն առաջին կիսամյակում աճել են մոտ երկու անգամ»։
Հարությունյանն անարդյունավետ է համարել միջազգային հանրության արձագանքը Ադրբեջանի կողմից Արցախում հումանիտար աղետ ստեղծելուն և ցեղասպանական քաղաքականություն վարելուն։
«Կարծես, ամեն տեղ քննարկվել է, բարձրացվել է խնդիրը, կարծես ֆիքսել են ամեն տեղ, որ վիճակն օր օրի ավելի է վատթարանում, բայց արդյունքները զրոյական են»,- ասել է նա։
Արցախի նախագահը հայտարարել է՝ ռուս խաղաղապահները չեն կատարում Լաչինի միջանցքի հետ կապված իրենց գործառույթները։
«Բազմաթիվ նամակներ եմ ուղղել Ռուսաստանի ղեկավարությանը, նախագահին, խնդրանքներ, կոչեր, բայց ունենք այն, ինչ ունենք: Սա հետևանք է ռուս-ուկրաինական պատերազմի»։
«Ադրբեջանը ԼՂ-ի հայերին պատանդ է պահում արտոնյալ ճանապարհ ստանալու համար»
Արայիկ Հարությունյանի խոսքով՝ Ադրբեջանը, օգտվելով Ուկրաինայի հետ պատերազմի մեջ գտնվող Ռուսաստանի վիճակից, փորձում է Արցախին ստիպել հրաժարվել 2020 թ․-ի նոյեմբերի 9-ի հայտարարությամբ իրեն տրված իրավունքներից և երկխոսության գնալ իր առաջարկած օրակարգով։ Սա, ըստ նրա, «պատերազմի շարունակությունն է»։
Ասում է՝ ԼՂ-ում Ադրբեջանի ցեղասպանական քաղաքականության նպատակներից մեկը նաև Հայաստանի վրա ճնշում գործադրելն է։ Հիշեցնում է ադրբեջանական կողմի հայտարարությունները, թե՝ «Զանգեզուրի միջանցքը պետք է աշխատի Լաչինի միջանցքի տրամաբանության շրջանակներում»․
«Ադրբեջանը շարունակում է իր ճնշումները առավելագույնը կորզելու համար։ Պետք է ֆիքսենք, որ Ադրբեջանը ԼՂ-ի հայերին ինչ-որ առումով պատանդի կարգավիճակում պահելու և զուգահեռաբար ցեղասպանություն իրականացնելու ցանկություն ունի՝ ճնշում գործադրելով Հայաստանի վրա Զանգեզուրի ճանապարհի առավել արտոնյալ տարբերակ ունենալու առումով»։
Ինչո՞ւ է Ստեփանակերտը դեմ Աղդամով բեռների տեղափոխմանը
Լաչինի միջանցքի լիակատար արգելափակումից և ԼՂ-ի պաշարումից հետո Բաքուն պարբերաբար հնչեցնում է առաջարկ՝ բեռներ տեղափոխել Աղդամով, այսինքն իր տարածքով։ Արցախի նախագահն ասում է՝ չպետք է մոռանալ, որ ԼՂ-ում ստեղծված հումանիտար աղետը հենց Ադրբեջանի իրականացրած քաղաքականության արդյունք է։
«Մենք դրա համար ենք ասում՝ համակենտրոնացման ճամբար ենք, որովհետև այդ ճամբարում այդպես է լինում՝ դարձնում են ճամբար, հետո սկսում են տրամադրել այն, ինչ նպատակահարմար են գտնում ու ինչքան նպատահարմար են գտնում»,- ընդգծել է Հարությունյանը՝ այդ կերպ ևս մեկ անգամ մերժելով ադրբեջանական առաջարկը։
Ասում է՝ ԼՂ-ի ժողովրդին ուղղված ցանկացած առաջարկ պետք է հարգի նրա արժանապատվությունն ու համապատասխանի միջազգային մարդասիրական նորմերին։
«Արցախի ցանկացած քաղաքացու կյանք վտանգված է»․ Վագիֆ Խաչատրյանի մասին
Հարությունյանը շեշտել է՝ օրեր առաջ առևանգված Վագիֆ Խաչատրյանի ճակատագիրը շատ կարևոր է․
«Ադրբեջանի պահվածքը նրա նկատմամբ հենց այն ցուցիչն է լինելու, թե ինչպես են փորձում հետագայում վարվել մնացածի նկատմամբ»։
Արցախի նախագահի գնահատմամբ՝ նույն մեղադրանքը կարող են առաջադրել Արցախի ցանկացած քաղաքացու։
Նրա փոխանցմամբ՝ Խաչատրյանը մարդ է, ով որևէ կապ չունի ռազմական գործողությունների հետ, բայց առևանգվում է և ներկայացվում որպես «ցեղասպանություն իրականացրած անձ»։ Հայտնել է, որ ռուս խաղաղապահներից և Կարմիր խաչից ստացվող տեղեկությունների համաձայն՝ 68-ամյա արցախցու առողջական վիճակը «կարծես վերահսկելի է»։
«Ոչ ոք իրավունք չունի կասկածի տակ դնելու և սահմանափակելու մեր ինքնորոշման իրավունքը»
Հայտարարել է Արայիկ Հարությունյանը՝ Հայաստանի իշխանություններին կոչ անելով «շատ զգույշ» լինել ԼՂ-ի հետ կապված հարցերում։ Նրա բնորոշմամբ՝ Արցախի ինքնորոշման իրավունքը բացառիկ իրավունք է, որը չի տրվել իշխանությունների կողմից․
«Այդ իրավունքի առումով պատրաստակամություն է հայտնել պայքարելու Արցախի ժողովուրդը, որին սատար է կանգնում հայ ժողովուրդը»։
Նրա համոզմամբ՝ Երևանը պետք է զերծ մնա այնպիսի քայլերից և հայտարարություններից, որոնք կարող են կասկածի տակ դնել Արցախի ինքնորոշումը։
«Շարունակելու ենք մեր ինքնորոշման պայքարը»
Հարությունյանը վստահեցրել է, որ Արցախի իշխանությունները առաջնորդելու են ժողովրդի պայքարը հանուն ինքնորոշման։
«Զրկանքները ժամանակավոր են և անցողիկ։ Իհարկե, հետևանքներ ունենում են, բայց ես չեմ ուզում, որ այդ փոքր հետևանքները առաջին պլան մղվեն և մեր գլխավոր նպատակը ստորադասեն։ Դրա համար [պայքարելու ենք]՝ հանուն Արցախի փրկության, հանուն Արցախի ապագայի»,- հայտարարել է նա։
Հարությունյանը տեղեկացրել է, որ ուղերձ է հղելու միջազգային հանրությանը, դերակատարներին՝ ակնկալելով ՄԱԿ-ի ԱԽ-ում հրատապ քննարկում, տարբեր այլ դերակատարների մասնակցություն և ճնշում Ադրբեջանի վրա։
«Դեռ չենք կորցրել մեր հույսը միջազգային ազդեցության առումով, դրա համար այս փուլում մեր պայքարը շարունակվելու է այդ հարթակներում։ Ակնկալում ենք որոշակի հաջողություններ ունենալ»,- ամփոփել է նա։
Հետևեք մեզ — Facebook | Youtube | Telegram
Արցախի նախագահը՝ պայքարը շարունակելու մասին
